Qe tbʼanel noticia kubʼ ttzʼibʼin Juan

2 Toj toxin qʼij, ok jun boda toj tnam Caná te Galilea ex ok jun waʼn. Ex otoq pon ttxuʼ Jesús. 2 Ax ikx xi qʼoʼn invitación tiʼj Jesús ex qe tdiscípulo tuʼn kypon toj boda.

3 Tej chʼinxtoq tkubʼaj vin, xi tqʼamaʼn ttxuʼ Jesús te: «Ya ma kubʼaj vin». 4 Pero xi ttzaqʼweʼn Jesús te: «Aya xuʼj,* ¿tiquʼn in tzaj tqʼamaʼna jlu weye?* Naʼmx tpon or tuʼn wok ojtzqiʼne kyuʼn xjal». 5 Pero xi tqʼamaʼn ttxuʼ Jesús kye qeju in che sipin tiʼj vin: «Kybʼinchanxe tkyaqilju tzul tqʼamaʼn kyeye». 6 Toj lugar aju, otoq che kubʼ qʼoʼn seis matij* xar bʼinchaʼn tuʼn abʼj tuʼn tajbʼen te tkubʼil aʼ. E kubʼ qʼoʼn tuʼn tel kytxʼajoʼn judiy kyqʼabʼ naʼmxtoq kyxiʼ wal ik tzeʼn kykostumbr. Toj teyele junjun matij xar, xi bʼaj kabʼe moqa oxe xar aʼ mas tal chʼin.* 7 Entonces xi tqʼamaʼn Jesús kye: «Kynojsame qe xar tuʼn aʼ». Atzun jlu bʼant kyuʼn tzmaxi tej kynoj. 8 Ex xi tqʼamaʼntl Jesús kye: «Jaʼlo kyiʼnktze chʼin ex kyqʼonxe te xjal organizaril boda». Ex atzun jlu bʼant kyuʼn. 9 Nyatoq ojtzqiʼn tuʼn xjal organizaril boda jatumel tzaj vin, pero atzun kye majen jatz kyiʼn aʼ ojtzqiʼntoq kyuʼn. Tuʼntzunju tej t-xi tprobarin aʼ otoq tzʼok te vin, tzaj ttxkoʼn novio 10 ex xi tqʼamaʼn te: «Kykyaqil xjal tnejel in netz kysipen tbʼanel vin, pero aj tbʼaj nim vin kyuʼn xjal in netz kysipen vin nya bʼaʼn. Atzun teya ma t-xi tkʼuʼna tbʼanel vin de último». 11 Aju bʼant tuʼn Jesús toj tnam Caná te Galilea atzun tnejel milagro* bʼant tuʼn. Iktzun tten kubʼ tyekʼin tipumal ex ok qeʼ kykʼuʼj tdiscípulo tiʼj.

12 Tej tbʼaj jlu, xiʼ Jesús toj Capernaúm junx tukʼil ttxuʼ, qe terman ex qe tdiscípulo, pero nya nim qʼij e kyaj ten toj tnam.

13 Tej chʼinxtoq tpon ambʼil tuʼn tkubʼ kyikʼsaʼn judiy Pascua, jax Jesús toj Jerusalén. 14 Tej tokx toj templo, ok tkeʼyin qe xjal in che kʼayin wakx, qe rit* ex qe paloma, ex qe xjal qʼuqli in che cambiarin pwaq. 15 Tuʼntzunju kubʼ tbʼinchaʼn jun asyal ex e jex tlajoʼn kykyaqil toj templo junx kyukʼil qe rit ex qe wakx. Ax ikx el tchitun qe moneda ajbʼen kyuʼn xjal in che cambiarin pwaq ex jaw tpichʼkuʼn kymes. 16 Atzun kye xjal in che kʼayin paloma xi tqʼamaʼn kye: «¡Kyimixe tkyaqil tzalu! ¡Miʼn tzʼok kyqʼoʼne tja Nmane te jun merkad!».* 17 Tej tok kykeʼyin tdiscípulo tkyaqil jlu, tzaj kynaʼn qa e kubʼ tzʼibʼin yol lu: «Aju kʼujlabʼil in kubʼ nnaʼne tiʼj tjaya in nok ik tzeʼn jun qʼaqʼ in kʼant toj wanmiye».

18 Tej tok kykeʼyin judiy jlu, xi kyqanin te: «¿Alkye señal tzul tyekʼina qeye tuʼn tel qnikʼe tiʼj qa at toklena tuʼn tbʼant jlu tuʼna?». 19 Xi ttzaqʼweʼn Jesús kye: «Qa ma kubʼ kyxitene templo lu, jaku jaw nbʼinchaʼne juntl maj toj oxe qʼij». 20 Atzun kye judiy xi kytzaqʼweʼn te: «Xi tiʼn 46 abʼqʼi tuʼn tbʼant templo lu, ¿atzun teya in tzaj tqʼamaʼna qa kjawil tbʼinchaʼna juntl maj toj oxe qʼij?». 21 Pero aju templo yolin Jesús tiʼj atzun t-xmilal. 22 Tuʼntzunju tej tjaw anqʼin kyxol kyimni, tzaj kynaʼn tdiscípulo aju tqʼama ex xi kyokslaʼn aju tzaj tqʼamaʼn tyol Dios ex qe tyol Jesús.

23 Tej tten Jesús toj Jerusalén, e bʼant milagro* tuʼn toj fiesta te Pascua ex ok qeʼ kykʼuʼj nim xjal tiʼj* tej tok kykeʼyin aju bʼant tuʼn. 24 Pero mintiʼ ok qeʼ tkʼuʼj Jesús kyiʼj porke ojtzqiʼn qetoq kykyaqil tuʼn. 25 Ex nyatoq il tiʼj tuʼn t-xi qʼamaʼn te tiʼ in che ximen xjal tiʼj porke ojtzqiʼntoq tuʼn tiʼ tkuʼx toj kyanmi.