TBʼI XNAQʼTZBʼIL TOK TIʼJ T-XKʼOMIL: ¿ALKYE TTEN JAKU TZʼONIN TKAWBʼIL DIOS QIʼJ?

¿Alkye tten jaku tzʼonin Tkawbʼil Dios qiʼj?

Ik tzeʼn saj qʼamaʼn kyoj xnaqʼtzbʼil ma che kyaj, nimxix toklen Tkawbʼil Dios toj kywitz testigos de Jehová. Ex tbʼanel-lo in che ela toj twitza aju junjun kʼiwlabʼl tzul tiʼn Tkawbʼil Dios xqo yolin kyiʼj. Ax ikx in ximenlo teya tiʼj qa ax tok jlu moqa nya ax tok.

Bʼaʼn in bʼant tuʼna qa mintiʼ in nok qeʼ tkʼuʼja tiʼj tkyaqilju in nok tbʼiʼna (Proverbios 14:15). Chʼixmi ax bʼantju kyuʼn xjal te tnam Berea.a Tbʼanel ela toj kywitz xjal te Berea aju ok kybʼiʼn tiʼj Tkawbʼil Dios, noqtzun tuʼnj, nya oʼkx tbʼanel ela toj kywitz tuʼnju kyajtoq tuʼn tkubʼ kyximen qa ax tok jlu, quʼn e ok tenxix xnaqʼtzal tiʼj Tyol Dios tuʼn «tel kynikʼ tiʼj qa ax tok aju yol xi» qʼamaʼn kye (Hechos 17:11). Toj juntl yol, kux kyjyoʼn xjal te Berea toj Tyol Dios qa ax tok tbʼanel tqanil xi qʼamaʼn kye. Tej tbʼet ambʼil, ok qeʼ kykʼuʼj qa aju tbʼanel tqanil ok kybʼiʼn in tzaj t-xnaqʼtzaʼn toj Tyol Dios.

In che txoken testigos tuʼn tkyaqil kykʼuʼj tiʼja tuʼn t-xnaqʼtzana ik tzeʼn bʼant kyuʼn okslal lu. In xi kyqʼoʼn testigos de Jehová xnaqʼtzbʼil tiʼj Tyol Dios noq kukx, jaku xnaqʼtzana tiʼj Tyol Dios kyukʼe tuʼn tel tnikʼa tiʼj tiquʼn in nok qeʼ kykʼuʼj tiʼj Tkawbʼil Dios.

Nya oʼkx jaku tzʼonin t-xnaqʼtzbʼila tiʼj Tyol Dios tuʼn tel tnikʼa tiʼj Tkawbʼil Dios, ax ikx jaku tzʼonin tiʼja tuʼn tkanet tzaqʼwebʼil kyiʼj junjun nimaq qxjelbʼitz toj qanqʼibʼil, ik tzeʼn:

¿Jatumel xqo tzaj?
¿Tiquʼn xqo kubʼ bʼinchaʼn?
¿Tiquʼn in tzaj tqʼoʼn Dios ambʼil tuʼn ttzaj nya bʼaʼn qiʼj?
¿Jatumel in qo pon aj qkyim?
¿Okpe kbʼel xiten Txʼotxʼ?
¿Tiʼ jaku bʼant quʼn tuʼn qtzalaj kyukʼe toj qja?

Nya oʼkxju, ax ikx qa ma xnaqʼtzana tiʼj Tyol Dios ok kʼonil tiʼja tuʼn txi laqʼeʼya «ttxlaj Dios» (Santiago 4:8). Ax ikx tuʼn jlu jaku tzaj laqʼeʼ Dios ttxlaja, nya oʼkxju, ax ikx mas ok kʼokel tqʼoʼn twitza kyiʼj qe kʼiwlabʼil in tzaj tqʼoʼn Tkawbʼil Dios, nya oʼkx toj ambʼil jaʼlo ax ikx te jumajx. Ax Jesús xi qanin te jlu te Ttat toj naʼj Dios: «Atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok, ex tuʼn wojtzqinjtze kyuʼn, aqine Jesucrist ma chin tzaj t-samaʼna» (Juan 17:3).

In najbʼen uʼj lu kyuʼn testigos de Jehová tuʼn t-xi qqʼoʼn xnaqʼtzbʼil tiʼj Tyol Dios kye xjal.

Qa tajbʼil jun xnaqʼtzbʼil tiʼj Tyol Dios, qaninxa te jun testigo de Jehová moqa qaninxa toj www.pr2711.com /mam. (Tokxa toj «Qaninxa jun xnaqʼtzbʼil tiʼj Tyol Dios aju naq kukx in tzaj qʼoʼn».)

a Atz taʼ Berea toj tnam Macedonia ojtxe.

¿Tiquʼn nimxix toklen Tkawbʼil Dios toj twitz?

Tzma xbʼant chʼin ambʼil, tzaj qʼamaʼn te jun txin te laj abʼqʼi, aju Folake tbʼi, tuʼn tyolin tiʼj jun xnaqʼtzbʼil toj tja xnaqʼtzbʼil aju tok tbʼi: «Aju mas kʼujlaʼn wuʼne tzalu twitz Txʼotxʼ». Jaw tjyoʼn Folake tuʼn tyolin tiʼj tiquʼn nimxix toklen toj twitz aju tuʼn tyolin kyukʼil xjal tiʼj Tkawbʼil Dios.

Xi tqʼamaʼn Folake jlu: «Ax tok jun Kawbʼil aju Tkawbʼil Dios. Noqtzun tuʼnj, mintiʼ qʼanchaʼl axpe ikx qa ma tzʼok qqʼoʼn qlentes».

Kubʼ ttzʼibʼen Folake aqeju kʼiwlabʼil tzul tiʼn Tkawbʼil Dios, mas aʼyeju in ayon tiʼj. Yolin chʼin tiʼjju nya bʼaʼn kʼelel tiʼn Tkawbʼil Dios, kubʼ ttzʼibʼen jlu: «In tzaj nbʼise aj tok nqʼoʼn nwitze kyiʼj xjal mintiʼ kyja ex in che anqʼin toj bʼe», ax ikx «qeju tal kʼwaʼl in che kyim tuʼn weʼyaj twitz tkyaqil Txʼotxʼ». Ex tqʼamatl jlu: «In chin tzalaje aj t-xi wuʼjine Isaías 65:21». Aju taqikʼ Tyol Dios lu in yolin kyiʼj qeju xjal che anqʼil tjaqʼ Tkawbʼil Dios, ex in tzaj ttziyen jlu: «Kjawil kybʼinchaʼn xjal kyja ex ax qe che najal tuj, ex kbʼelex kyawaʼn tqan uva ex ax qe che loʼl tiʼj twitz».

Tqʼama Folake qa ax ikx in ayon tiʼj ambʼil aj tel tiʼn Tkawbʼil Dios tkyaqil yabʼil. Ax ikx yolin Folake tiʼj taqikʼ Tyol Dios tkuʼx toj Apocalipsis 21:4, aju in tzaj tqʼamaʼn jlu: «Kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj». Kubʼ bʼaj xnaqʼtzbʼil tuʼn Folake tej ttzaj tqʼamaʼn qa «a Jehová ex Tkawbʼil mas kʼujlaʼn tuʼn twitz tkyaqil». A jlu in tzaj tyekʼun qa kʼujlaʼnxix Tkawbʼil Dios tuʼn tkyaqil tanmi tal txin lu.