TBʼI XNAQʼTZBʼIL TOK TIʼJ T-XKʼOMIL
Aj tkyim jun xjal kʼujlaʼnxix quʼn
«Miʼn tzʼoqʼa... ojtzqiʼn tuʼn Dios alkye mas bʼaʼn».
Aʼyeju yol lu, i eʼx jaskʼoʼn toj t-ẍkin jun xuʼj, moqa qya aju Bárbara tbʼi.a Attoq Bárbara kyxol xjal tiʼjju tkyimlen ttat moqa tman, otoq kyim toj jun aksident tuʼn kar.
Naqʼlixixtoq Bárbara tiʼj tman. Tuʼn jun kyamiw qe toj tja Bárbara xi jaskʼoʼn qeju yol lu te, noqtzun tuʼnj, mintiʼ tzaj qʼuqbʼaʼn tkʼuʼj kyuʼn yol lu, noq oʼkx tzaj mas tbʼis, tqʼama jlu nim maj: «Nya mas bʼaʼn tuʼnju ma tzikʼ qʼiʼn ntate twitz Txʼotxʼ». Tej tikʼ junjuntl abʼqʼi, kyaj ttzʼibʼin Bárbara aju txʼolbʼabʼil lu toj jun uʼj, ex tzaj tyekʼun jlu qa kukxtoq in bʼisun.
Ik tzeʼn el tnikʼ Bárbara tiʼj, in xi tiʼn nim ambʼil tuʼn tel tbʼis jun xjal, ex mas qa naqʼlixix aju in bʼisun tiʼjju otoq kyim. In tzaj tqʼamaʼn Tyol Dios qa aju kamik in nok te jun «mankbʼil aj qʼoj» (1 Corintios 15:26). Aj tkyim jun toj qja, bʼiʼx in chʼexpaj qanqʼibʼil tuʼn, miʼn jun jaku mayonte ex mas qa nya ximen quʼn aj tel tiʼn aju xjal kʼujlaʼn quʼn. Mi jun qe jaku tzaqpaj tiʼjju in tzaj tuʼn. Tuʼntzunju, aj qok weʼ twitzju aj tkyim jun toj qja, mintiʼ tuʼn ttzaj bʼaj qkʼuʼj qa ma tzaj nim qbʼis ex aj ttzaj junjuntl tiʼ tuʼn.
Ole ximenxi teya kyiʼj xjel lu: «¿Jniʼ ambʼil in xi tiʼn tuʼn tel qbʼis? ¿Tiʼ jaku bʼant tuʼn jun xjal tuʼn tex twitzju bʼis? ¿Alkye tten jaku txi nqʼuqbʼaʼne kykʼuʼj qeju in che bʼisun? ¿Jakupe che jaw anqʼin qe toj qja aʼyeju o che kyim?».
a Ma che kubʼ chʼixpet bʼibʼaj ateʼkux toj xnaqʼtzbʼil lu.