¿Tiʼ jaku bʼant tuʼna tuʼn tten juntl maj tamiwbʼila tukʼil Jehová?

TKYAQIL abʼqʼi, ateʼ nim tmajen Jehová in che meltzʼaj toj ttnam. Jaku txi qqʼamaʼn qa at nim tzalajbʼil toj kyaʼj aj in meltzʼaj jun t-ẍneʼl Jehová (Luc. 15:7, 10). Qa o meltzʼaj teya toj kʼloj okslal, jaku tzʼok qeʼ tkʼuʼja tiʼj qa in tzalaj Jesús, qe anjel ex Jehová. Noqtzun tuʼnj, akux in nok tilil tuʼna tuʼn tten tamiwbʼila juntl maj tukʼil Jehová, jaku tzʼok weʼya twitz junjun nya bʼaʼn. ¿Alkyeqe nya bʼaʼn jaku tzʼok weʼya twitz ex tiʼ jaku tzʼonin tiʼja?

QEJU NYA BʼAʼN

Aj in che meltzʼaj tmajen Jehová toj ttnam, nim kye in nok tilil kyuʼn tuʼn tkubʼ tiʼj bʼis kyuʼn tuʼnju in kubʼ kyximen junjun tiʼchaq nya toj tumel. Qa a jlu in bʼaj tiʼja, in nel-lo tnikʼa tiʼjju kubʼ tnaʼn aj kawil David. Axpe ikx, tqʼama jlu tej otoqxi kubʼ najsaʼn til: «Axju nbʼinchbʼene mya bʼaʼn ma kubʼ tzʼaq wibʼaje» (Sal. 40:12; 65:3). Aj tmeltzʼaj jun erman, jakulo kubʼ tnaʼn qa a at tpaj ex jaku tzaj chʼixwi kyoj nimku abʼqʼi. Atzun jlu bʼaj tiʼj Isabelle tej tel tpan tibʼ tiʼj Jehová toj mas te 20 abʼqʼi.a Tqʼama jlu: «Kwest ela toj nwitze tuʼn t-xi nnimane qa otoq kubʼ tnajsaʼn Jehová wile». Qa ma tzaj bʼaj tkʼuʼja, jaku chewix tamiwbʼila juntl maj tukʼil Jehová (Prov. 24:10). Bʼaʼn tuʼn tok tilil tuʼna tuʼn miʼn tbʼaj jlu tiʼja.

Atzun junjuntl, in kubʼ kynaʼn qa il tiʼj tuʼn tbʼant nim tiʼchaq kyuʼn tuʼn tten juntl maj kyamiwbʼil tukʼil Jehová. Tej otoqxi meltzʼaj Antoine toj kʼloj okslal, tqʼama jlu: «Tkyaqilju bʼant wuʼne tej wajbʼene te Jehová, otoq tzikʼ tnaʼl wuʼne». Tuʼn jlu, ateʼ junjun kwest in nela toj kywitz tuʼn kyajbʼen te Jehová juntl maj.

Qo ximen tiʼj jun techel. Qa ma naj jun ja tuʼn nim jbʼal, jaku tzaj choʼn twiʼ tajaw ja aj t-ximen tiʼj tkyaqil aqʼuntl ex ambʼil tuʼn tbʼant tja juntl maj. Chʼixmi ax jlu jaku bʼaj tiʼja. Qa o naj tamiwbʼila tukʼil Jehová tuʼnju kubʼ tzʼaqa toj jun il, jakulo kubʼ t-ximana qa kxel tiʼn nim ambʼil tuʼn tok laqʼeʼya juntl maj ttxlaj Jehová. Pero nya tjunalxa at.

In tzaj tqʼoʼn Jehová txokbʼil lu qiʼj: «Kytzaje, qo yolin tuʼn tbʼant tiʼj jlu quʼn» (Is. 1:18). Ya o tzʼok tilil tuʼna tuʼn tkyaj nya bʼaʼn toj ttxolil tukʼil Jehová, tuʼntzunju, kʼujlaʼna tuʼn. Ximana tiʼj qa jaku tzʼajbʼen aju in bʼaj tiʼja tuʼn Jehová tuʼntzun tkubʼ tyekʼin qa nya ax tok tyol Satanás (Prov. 27:11, TNM).

Tuʼnju o meltzʼaja tukʼil Jehová, ya o tzʼok laqʼeʼya ttxlaj ex in tzaj ttziyen qa ax jlu kbʼantel tuʼn tukʼila (Sant. 4:8). In che tzalaj erman tuʼnju o meltzʼaja toj ttnam Jehová, pero ax ikx il tiʼj tuʼn tbʼant juntl tiʼ tuʼna. Il tiʼj tuʼn tok tilil tuʼna tuʼn tchʼiy tkʼujlabʼila tiʼj Jehová, aju Tmana ex Tamiwa. ¿Tzeʼn jaku bʼant tuʼna?

XIMANA TIʼJJU JAKU BʼANT TUʼNA

Ximana tiʼj tuʼn t-xi tbʼinchaʼna junjun tiʼchaq jaku bʼant tuʼna. Bʼalo kukx naʼn tuʼna aju o tzʼel tnikʼa tiʼj Jehová ex qe ttziybʼil. Pero il-lo tiʼj tuʼn tok tilil tuʼna tuʼn tbʼant junjun tiʼchaq tuʼna toj tajbʼebʼila te Jehová ik tzeʼn tuʼn texa pakbʼal, tuʼn t-xiʼya kyoj chmabʼil ex tuʼn ttena kyukʼil erman. Qo xnaqʼtzan kyiʼj junjun tiʼchaq jaku bʼant tuʼna.

Paʼmila ambʼil tuʼn tyolina tukʼil Jehová. In nel tnikʼ Jehová tiʼj qa kwest tuʼn tyolina tukʼil tuʼnju in kubʼ tnaʼna qa aya at tpaj tiʼj il bʼant tuʼna (Rom. 8:26). Pero bʼaʼn tuʼn tel tpaʼna ambʼil tuʼn tnaʼna Dios ex tuʼn t-xi tqʼamaʼna te Jehová qa taja tuʼn toka te tamiw juntl maj (Rom. 12:12). Naʼnx jlu tuʼn Andrej: «Kubʼ nnaʼne qa aqine at tpaj tiʼjju otoq bʼant wuʼne ex tzaj nim nchʼixwiye. Pero tej tok tilil wuʼne tuʼn nnaʼne Dios, kubʼ nnaʼne bʼaʼn». Qa mintiʼ ojtzqiʼn tuʼna tiʼ tuʼn t-xi tqʼamaʼna te Jehová toj tnaʼj Diosa, ximana kyiʼj tnaʼj Dios David tej otoqxi tzʼajtz tiʼj tanmi. Atz tkuʼx qe tnaʼj Dios toj salmo 51 ex 65.

Paʼmila ambʼil tuʼn kukx t-xnaqʼtzana tiʼj Tyol Dios. Kʼonil jlu tiʼja tuʼn tchʼiy qʼuqbʼil tkʼuʼja ex tkʼujlabʼila tiʼj Jehová (Sal. 19:7-11). Tqʼama jun ermano Felipe tbʼi: «Chewix wamiwbʼile tukʼil Jehová ex kubʼ nbʼinchaʼne il tuʼnju mintiʼtoq in chin xnaqʼtzane ex mintiʼtoq in chin leerine tiʼj Xjan Uʼj. Tuʼnju nya waje tuʼn tikʼ juntl maj jlu wiʼje, ok tilil wuʼne tuʼn tok nxqʼuqine wibʼe ex tuʼn xnaqʼtzane tiʼj Tyol Dios». Ax jlu jaku bʼant tuʼna. Qa mintiʼ ojtzqiʼn tuʼna alkye xnaqʼtzbʼil jaku xnaqʼtzana tiʼj, jaku txi tqanina onbʼil te jun tamiwa o chʼiy toj tokslabʼil.

Bʼaʼn tuʼn tok tamiwen tibʼa juntl maj kyukʼil erman. Ateʼ junjun erman in tzaj bʼaj kykʼuʼj aj in che meltzʼaj toj ttnam Jehová tuʼnju in kubʼ kyximen qa nya kykyaqil erman in che tzalaj kyiʼj. Tqʼama Larissa jlu: «Tzaj nim nchʼixwiye. Kubʼ nnaʼne qa otoq tzaj kybʼis erman wuʼne. Atzun jlu kubʼ nnaʼne toj nim ambʼil». Jaku tzʼok qeʼ tkʼuʼja tiʼj qa kyaj ansyan ex junjuntl erman tuʼn kyonin tiʼja tuʼn tten juntl maj tamiwbʼila tukʼil Jehová. (Qʼonka twitza tiʼj recuadro «Aju jaku bʼant kyuʼn ansyan»). In che tzalaj tuʼnju o meltzʼaja ex kyaj tuʼn ttzalaja (Prov. 17:17).

¿Tiʼ jaku bʼant tuʼna tuʼn kukx ttena kyukʼil erman? Bʼaʼn tuʼn t-xiʼya kyoj kykyaqil chmabʼil ex bʼaʼn tuʼn texa pakbʼal kyukʼil. ¿Tzeʼn jaku tzʼonin jlu tiʼja? Tqʼama Félix jlu: «In che ayontoq erman wiʼje tej nmeltzʼaje. Kubʼ nnaʼne qa kʼujlaʼn qine kyuʼn. Kykyaqilx e onin wiʼje tuʼn tkubʼ nnaʼne qa at woklene toj ttnam Jehová, qa otoq kubʼ najsaʼn wile ex qa jaku tzʼok tilil wuʼne». (Qʼonka twitza tiʼj recuadro «Aju jaku bʼant tuʼna»).

MIʼN SIKTA

Akux in nok tilil tuʼna tuʼn tten juntl maj tamiwbʼila tukʼil Jehová, kukx kʼokel tilil tuʼn Satanás tuʼn tkubʼ numja (Luc. 4:13). Tuʼn miʼn tkubʼ tiʼja tuʼn Satanás, nim toklen tuʼn tchʼiy qʼuqbʼil tkʼuʼja.

In tzaj ttziyen Jehová jlu kyiʼj t-ẍneʼl: «Chin okel tene jyol kye qe ẍneʼl otoq cheʼx tzpet, che ajetz wiʼne qeju otoq che elnaj tiʼj kybʼe, kʼokel npotzine tiʼj kyqan otoq toqj, chin onile kyiʼj qeju mintiʼ kyipun» (Ezeq. 34:16). O tzʼonin Jehová kyiʼj nim tmajen tuʼn tten juntl maj kyamiwbʼil tukʼil. Tuʼntzunju, jaku tzʼok qeʼ tkʼuʼja tiʼj qa ax ikx taj tuʼn tonin tiʼja tuʼn tchʼiy tamiwbʼila tukʼil.

Aju jaku bʼant kyuʼn ansyan

Nim jaku che onin ansyan kyiʼj erman in che meltzʼaj toj kʼloj okslal tuʼntzun tten juntl maj kyamiwbʼil tukʼil Jehová. Qo xnaqʼtzan kyiʼj junjun tiʼchaq jaku bʼant kyuʼn.

Jaku txi kyqʼuqbʼaʼn kykʼuʼj. Ojtzqiʼntoq tuʼn apóstol Pablo qa aj tmeltzʼaj jun erman, jaku kyaj «ten tuj nim bʼis» (2 Cor. 2:7). Bʼalo in tzaj chʼixwi ex in tzaj bʼaj tkʼuʼj. Tuʼntzunju, xi tqʼoʼn apóstol Pablo consej jlu kye okslal: «Noq oʼkx tuʼn tkubʼ kynajsaʼne til ex tuʼn t-xi kyqʼuqbʼaʼne tkʼuʼj». Aj in che meltzʼaj erman, kyaj tuʼn t-xi qʼamet kye qa kʼujlaʼn qe tuʼn Jehová ex kyuʼn erman. Nim jaku tzʼonin kyiʼj qa ma txi qqʼuqbʼaʼn kykʼuʼj, qa ma txi qqʼamaʼn tbʼanel yol kye ex qa ma txi qqʼamaʼn kye qa jaku qo onin kyiʼj.

Jaku che naʼn Dios kyukʼil. «Aju tnaʼj Dios ju xjal tzʼaqlxix at nim tipumal ex nim in tbʼinchaʼn» (Sant. 5:16). Tqʼama Larissa jlu, aju ma qo yolin tiʼj: «Xi nqʼamaʼne kye ansyan aju jawje nkʼuʼje tiʼj ex aju in tzaj xobʼe tuʼn. E naʼn Dios wiʼje. Tuʼn jlu, el nnikʼe tiʼj qa mintiʼtoq in che qʼojin wiʼje. Kyajtoq tuʼn kyonin wiʼje tuʼn tten juntl maj wamiwbʼile tukʼil Jehová». Ex tqʼama jun ermano jlu, aju Theo tbʼi: «E onin kynaʼj Dios ansyan wiʼje tuʼn tok qeʼ nkʼuʼje tiʼj qa ax tok kʼujlaʼn qine tuʼn Jehová ex qa in nok tqʼoʼn twitz tiʼjju tbʼanel tkuʼx toj wanmiye ex nya oʼkx tiʼjju in chin el txalpaje tiʼj».

Jaku tzʼok kyamiwen kyibʼ kyukʼil. Kyaj erman in che meltzʼaj tuʼn kyten kyamiw toj kʼloj okslal. In tzaj tqʼamaʼn jun ansyan Justin tbʼi jlu: «Bʼaʼn tuʼn tajbʼen alkyexku ambʼil quʼn tuʼn t-xi qqʼoʼn txokbʼil kyiʼj tuʼn kyex pakbʼal ex tuʼn qxiʼ visitaril kye. Nim toklen tuʼn tok qamiwen qibʼ kyukʼil». In tzaj tqʼamaʼn juntl ansyan jlu, aju Henry tbʼi: «Qa ma tzʼok kyamiwen kyibʼ ansyan kyukʼil erman in che meltzʼaj toj kʼloj okslal, ax jlu jaku bʼant kyuʼn txqantl erman aj tok kykeʼyin».

Jaku che onin kyiʼj tuʼn kyxnaqʼtzan kyjunalx. Jaku tzʼonin jun erman tiʼj jun tmajen Jehová in meltzʼaj tuʼn kukx t-xnaqʼtzan tiʼj Tyol Dios. In tzaj tqʼamaʼn jun ansyan Darko tbʼi jlu: «Ngane tuʼn t-xi nyekʼine kye qeju in che meltzʼaj aju tbʼanel xnaqʼtzbʼil in nel nnikʼe tiʼj aj in chin xnaqʼtzane tiʼj Tyol Dios tuʼntzun tel kynikʼ tiʼj qa in chin tzalaje tiʼj xnaqʼtzbʼil». In tzaj tqʼamaʼn juntl ansyan Clayton tbʼi jlu: «In xi nqʼamaʼne kye tuʼn t-xi kyjyoʼn qe txʼolbʼabʼil toj Tyol Dios kyiʼj tmajen Jehová e ikʼ kyoj nya bʼaʼn ik tzeʼn kye».

Tuʼn kyxqʼuqin kyiʼj. Kykyaqil qeju in che meltzʼaj toj ttnam Jehová, o tzʼok kykeʼyin tzeʼn xi qʼoʼn kawbʼil kye kyuʼn ansyan tuʼnju in che ok ik tzeʼn jun jwes, atzun jaʼlo nim toklen tuʼn tel kynikʼ tiʼj qa in che xqʼuqin kyiʼj ik tzeʼn jun tbʼanel xqʼuqil ẍneʼl (Jer. 23:4). Aqeye ansyan, bʼaʼn tuʼn tok kyqʼoʼne kywiʼye kyiʼj erman in che meltzʼaj toj kʼloj okslal ex kyqʼamanxe tbʼanel yol kye. Tej tyolin jun ermano Marcus tbʼi tiʼjju in bʼant tuʼn aj in xiʼ visitaril kye qeju in che meltzʼaj, tqʼama jlu: «In jaw quʼjine jun taqikʼ Tyol Dios ex in qo yoline tiʼj. Ax ikx, in xi qqʼamaʼne tbʼanel yol kye ex in xi qqʼamaʼne qa in tzalaj Jehová ik tzeʼn qeye tiʼj tkyaqilju otoq bʼant kyuʼn tuʼn kymeltzʼaj. Ex aj qbʼaj yoline, in kyaj bʼant tiʼj quʼne alkye qʼij tuʼn qpone juntl maj visitaril kye».

a Ma che kubʼ chʼixpet bʼibʼaj ateʼkux toj xnaqʼtzbʼil lu.