¿TIʼ JAKU BʼANT QUʼN TUʼN TKUBʼ TIʼJ IKʼBʼIL?

1 | Miʼn tzʼok tqʼoʼna twitza tiʼj kyyajil xjal

In tzaj tqʼamaʼn Tyol Dios jlu:

«Mintiʼ in tkeʼyin Dios aju kyxilen xjal, noq oʼkx in tzalaj kyiʼj xjal at tchi Dios kye tuj tkyaqil nasyon, ex in kybʼinchaʼn aju tzʼaqlxix» (HECHOS 10:34, 35).

¿Tiʼ t-xilen jlu?

Mintiʼ in nok tqʼoʼn Jehováa twitz tiʼj qtnam, tiʼj qyajil, tiʼj qanqʼibʼil nix tiʼj qcolor. Sino atz in nok tqʼoʼn twitz tiʼjju in kubʼ qximen ex in kubʼ qnaʼn. In tzaj tqʼamaʼn Tyol Dios jlu: «Aju xjal oʼkx nnoʼk tqʼoʼn tkwent tiʼj tzaʼn keʼyin jun xjal, atzun weye atzun tok nkwente tiʼj tanmi xjal» (1 Samuel 16:7).

Ximinkuya tuʼn tbʼant jlu tuʼna:

Mlay tzʼel qnikʼ tiʼjju at toj tanmi jun xjal, pero jaku tzʼel qkanoʼn tiʼj Jehová qa mintiʼ ma tzʼok qkeʼyin tyajil. Qa ma tzʼel tnikʼa tiʼj qa at nya bʼaʼn t-ximbʼetza tiʼj jun xjal tuʼnju junxitl tyajil moqa junxitl ttnam, qaninxa tipumala te Dios tuʼn tnaj ikʼbʼil toj tanmiya ex tuʼn miʼn tten nya bʼaʼn t-ximbʼetza tiʼj kyyajil xjal (Salmo 139:23, 24). Ex tbʼanel tuʼn tok qeʼ tkʼuʼja tiʼj qa kʼonil Dios tiʼja (1 Pedro 3:12).

a In tzaj tqʼamaʼn Biblia qa Jehová tbʼi Dios (Isaías 42:8).

«Naʼmxtoq nyoline tukʼil jun saq xjal [...]. Atzun jaʼlo in chin tzalaje tuʼnju atine kyxol testigos de Jehová twitz tkyaqil Txʼotxʼ» (TITUS).

Aju in bʼaj toj ambʼil jaʼlo—TITUS

Ya mintiʼ kubʼ tnaʼn ikʼbʼil

Tokxtoq Titus kyxol mara ex in tzajtoq kyqʼoj kyiʼj ley xi tqʼoʼn ambʼil kye xjal tuʼn tel kyikʼun kyyajil junjuntl ex tuʼn tok kybʼinchaʼn nya bʼaʼn kyiʼj. In tzaj tqʼamaʼn jlu: «In qoʼxtoqe kyoj lugar jatumel in che el ikʼun xjal qʼeq, ik tzeʼn qe hotel ex qe bar, ex kyoj lugar aju ok qʼoj quʼne». In tzaj tqʼamaʼntl Titus tiʼ bʼaj tiʼj tuʼnju kubʼ tnaʼn ikʼbʼil: «Ajtoq tetz nqʼoje tukʼil jun xinaq moqa jun xuʼj, aʼyine in chin ok ten bʼiyel tnejel».

Chʼexpaj tanqʼibʼil Titus tej t-xi tzyet tuʼn t-xnaqʼtzan tiʼj Biblia kyukʼil testigos de Jehová. Nim onin Tyol Dios tiʼj tej tjaw tuʼjin ex pon toj tanmi tej tel tnikʼ tiʼjju kbʼantel tuʼn Dios toj ambʼil tzul tzalu twitz Txʼotxʼ. In tzaj tqʼamaʼn Biblia jlu: «Mintiʼtl kamik, ex mintiʼtl bʼis, ex mintiʼtl oqʼel» (Apocalipsis 21:3, 4).

Tnejel, kwest ela toj twitz tuʼn ya miʼn tkubʼ tnaʼn ikʼbʼil. In tzaj tqʼamaʼn jlu: «Kwest ela toj nwitze tuʼn tchʼexpaj nximbʼetze ex nmode». Pero nim e onin yol tkuʼx toj Hechos 10:34 ex 35 tiʼj, jatumel in tzaj tqʼamaʼn qa mintiʼ in nok tkeʼyin Dios kyyajil xjal.

¿Tiʼ tbʼanel tzaj tuʼn jlu? In tzaj tqʼamaʼn Titus jlu: «Tej tok nkeʼyine kʼujlabʼil in kubʼ kyyekʼin testigos de Jehová kyxolx maske junxitl kyyajil ex kycolor, ok qeʼ nkʼuʼje tiʼj qa atzun axix tok okslabʼil. Axpe ikx tej naʼmxtoq nbautisarine, tzaj tqʼoʼn jun Testigo saq xjal txokbʼil wiʼje tuʼn nxiʼye waʼl tja. Ok jlu ik tzeʼn jun witzikʼ tuʼnju naʼmxtoq nyoline tukʼil jun saq xjal ex bʼajxtoq chin waʼne tja. Atzun jaʼlo in chin tzalaje tuʼnju atine kyxol testigos de Jehová twitz tkyaqil Txʼotxʼ».