Iltiʼj tuʼn tok qojtzqiʼn qMan Dios

Tuʼn qok te tamiw qMan Dios, iltiʼj tuʼn tok qojtzqiʼn. Eyeqeʼ qamiw kyojtzqiʼn qbʼi ex in najbʼen kyuʼn, axtokjo? Ax ikx te qMan Dios taj tuʼn tok qojtzqiʼn tbʼi ix tuʼn tajbʼen quʼn. Atzun te tbʼi Jehová (Isaías 42:8; Mateo 6:9). Nya oʼkxjo, iltiʼj tuʼn tel qnikʼ tiʼjju taj ix nya taj, alkyeqeʼ tamiw ix alkyeqeʼ ajqʼoj te. Nxe tiʼn nim ambʼil tuʼn tok qojtzqiʼn jun xjal, a Xjan Uʼj nqʼmante qa tbʼanilxix tuʼn tel qpaʼn ambʼil tuʼn tok qojtzqiʼn Jehová (Efesios 5:15, 16).

Ayeʼ tamiw qMan Dios nkubʼ kbʼinchen aju tajxix. Ximinxpeye kyiʼj tamiwe. Qa ma tzʼok lipene kyiʼj ex qa ma kubʼ tbʼincheye nya kyajbʼil, okpetzule chi okelx te tamiwe? Melayx. Ax ikxjo, qa qaj tuʼn qok te tamiw qMan Dios, iltiʼj tuʼn tkubʼ qbʼinchen aju tajbʼilxix (Juan 4:24).

Nya kkyaqil okslabʼil nqo tzaj kyonin tuʼn qok te tamiw qMan Dios. A Jesús tbʼanilxix tamiw qMan Dios, yolin tiʼj kabʼe bʼe. Jun nim twitz ex nim xjal nbʼet tuj. Aju bʼe lu nchex tiʼn xjal tuj najsbʼil. Atzun juntl bʼe chʼin twitz nya nim xjal nbʼet tuj. Atzun jun bʼejo in chex tiʼn xjal tuj chwinqlal te jumajx. Atzun t-xilen jlu, qa qaj tuʼn tten qamiwbʼel tukʼe qMan Dios, iltiʼj tuʼn tel qnikʼ alkyexix tumel tuʼn tok qkʼulen (Mateo 7:13; 14).