Rut ex Noemí

Pon jun ambʼil jatumel tzaj waʼyij toj tnam Israel. Tuʼntzun jlu xiʼ jun xuʼj aj Israel Noemí tbʼi tukʼix tchmil ex kabʼe tal najal toj txʼotxʼ te Moab. Yajxitl, kyim tchmil Noemí. Aʼyeju tal e kubʼ mojeʼ kyukʼil kabʼe xuʼj te Moab: aju Rut ex Orpá kybʼi. Bʼisbʼajilxix tuʼnju tej tbʼet ambʼil ax ikx e kyim qeju kabʼe tal.

Tej tok tbʼiʼn Noemí qa ya mintiʼ waʼyij toj tnam Israel, kubʼ t-ximen tuʼn tmeltzʼaj toj ttnam. I eʼx Rut ex Orpá tukʼil, noqtzun tuʼnj, tej in che bʼettoq xi tqʼamaʼn Noemí jlu kye: «Tbʼanel xuʼjilbʼaj qeye ex tbʼanel elibʼaj qeye. Wajbʼile tuʼn kykubʼ mojeʼye juntl maj. Kyaj meltzʼaje toj kyjaye toj tnam Moab». Xi kytzaqʼweʼn xuʼj te: «Kʼujlaʼnxixa quʼne, nya qaje tuʼn tkyaj qqʼoʼne tjunalxa». Xi tqʼamaʼn Noemí juntl maj kye tuʼn kyaj meltzʼaj toj kytxʼotxʼ. Aj meltzʼaj Orpá tja, atzunte Rut ax kyaj ten. Xi tqʼamaʼn Noemí jlu te Rut: «Ma tzʼaj meltzʼaj te Orpá toj ttnam ex kyukʼil tdios. Txiʼya tukʼil ex meltzʼaja tja ttxuʼya». Atzunte Rut xi tqʼamaʼn jlu te: «Mlayx kyaj ntzaqpiʼna. Aju ttnama kʼokel te ntname, ex aju Tdiosa kʼokel te Ndiose». ¿Tiʼtzulo tnaʼ Noemí tej t-xi tqʼamaʼn Rut jlu te?

Pon Rut ex Noemí toj tnam Israel tej t-xi tzyet tuʼn tjaw chmet twitz cebada. Jun qʼij, xiʼ Rut chmol twitz awal otoq kyaj ten toj tkojbʼil Boaz, aju tal Rahab. Ok tbʼiʼn Boaz qa tzajni Rut toj tnam Moab, aju kʼujlaʼnxixtoq Noemí tuʼn ex otoq kyaj ten tukʼil. Xi tqʼamaʼn Boaz kye taqʼunal tuʼn tkyaj kyqʼoʼn chʼintl twitz awal toj tkojbʼil tuʼntzun tjaw tchmoʼn Rut.

Toj qonikʼen aju, xi tqanin Noemí te Rut: «¿Toj alqe kojbʼil ma tzʼaqʼunana jaʼlo?». Xi ttzaqʼweʼn Rut: «Toj tkojbʼil Boaz». Xitzun tqʼamaʼn Noemí te: «At t-xilen nchmile tukʼil Boaz. Kukx tzʼaqʼunana toj tkojbʼil kyukʼil txqantl txin. Mas bʼaʼn ktela atztzun».

Kukx aqʼunan Rut toj tkojbʼil Boaz tzmaxe tej tjaw bʼaj twitz awal. El tnikʼ Boaz tiʼj Rut qa jun tbʼanelxix xuʼjtoq ex bʼaʼnxixtoq tzʼaqʼunan. Toj ambʼil aju, qa at jun xinaq ma kyim ex mintiʼ saj tkʼwaʼl, ax jun toj tja jakutoq kubʼ mojeʼ tukʼil t-xuʼjil. Tuʼntzunju kubʼ mojeʼ Boaz tukʼil Rut. Tzaj jun kykʼwaʼl ex ok kyqʼoʼn tbʼi te Obed. Tej tbʼet ambʼil, ok Obed te tchman aj kawil David. In che tzalajxixtoq tamiw Noemí. Ex in xitoq kyqʼamaʼn jlu te: «Tnejel, tzaj tqʼoʼn Jehová Rut teya, aju o kubʼ tyekʼin tbʼanel tmod tukʼila. Ex atzun jaʼlo ma tzaj jun tal tchmana. Qnimsaʼnktz Jehová tuʼn jlu».