In che onin ansyan qiʼj tuʼn qtzalaj

1. ¿Tiʼ tqanil ok tbʼiʼn Pablo kyiʼj okslal te Corinto ex tiquʼn jaw tzalaj tuʼn jlu?

TOJ abʼqʼi 55, ok tbʼiʼn apóstol Pablo qa tzaj nim nya bʼaʼn kyxol erman te tnam Corinto. E ok tkʼujlaʼn Pablo qe erman ex e ok tqʼoʼn ik tzeʼn qe tkʼwal, tuʼntzunju xi ttzʼibʼin jun uʼj kye tuʼn kyxi tkawin (1 Corintios 1:11; 4:15). Ax ikx, xi tqʼamaʼn te Tito tuʼn t-xi visitaril kye erman, yajxitl xi tqʼamaʼn te tuʼn tok tchmon tibʼ tukʼil atz Troas tuʼntzun tok tbʼiʼn tzeʼn ateʼ erman. Tej tikʼ junjuntl xjaw, in yontoq Pablo tiʼj Tito atz ttzi nim aʼ te tnam Troas pero mintiʼ pon, tuʼntzunju xiʼ Pablo toj tnam Macedonia. Tej tikʼ chʼintl ambʼil, nimxix jaw tzalaj Pablo tej tok tkaʼyin tibʼ tukʼil Tito. Xi tqʼamaʼn Tito te Pablo qa otoq txi kybʼiʼn okslal te Corinto qe consej xi tqʼamaʼn kye ex qa kyajtoq tuʼn tok kyqʼoʼn kywitz tiʼj. Mas jaw tzalaj Pablo tej tok tbʼiʼn jlu (2 Corintios 2:12, 13; 7:5-9).

2. a) ¿Tiʼ xi ttzʼibʼin Pablo kye okslal te Corinto? b) ¿Alkye xjel kxel qqʼoʼn tzaqʼwebʼil tiʼj toj xnaqʼtzbʼil lu?

² Tej tikʼ chʼintl ambʼil, xi ttzʼibʼin Pablo juntl carta kye aj Corinto. Xi tqʼamaʼn jlu kye: «Myatzun qajbʼile tuʼn qok tene kawil kyeye tiʼj kyokslabʼle, porke waʼl qeye tuj kyokslabʼle; noq oʼkx qajbʼile tuʼn qonine kyukʼile tuʼn tten kytzalajbʼile» (2 Corintios 1:24). ¿Tiʼ t-xilen aju tqʼama Pablo ex tiʼ xnaqʼtzbʼil jaku tzʼel kyiʼn ansyan kyiʼj tyol?

AJU QOKSLABʼIL EX TZALAJBʼIL

3. a) ¿Tiʼ tzaj tqʼamaʼn Pablo tej tqʼama qe yol lu: «Waʼl qeye tuj kyokslabʼle»? b) ¿Tzeʼn in nel kykanoʼn ansyan techel kyaj tqʼoʼn Pablo?

³ Xi tqʼamaʼn Pablo kabʼe mod nim toklen kye okslal moqa nimel te Corinto, aju qokslabʼil ex tzalajbʼil. Tnejel qo yolin tiʼj qokslabʼil moqa qʼuqbʼil qkʼuʼj. Xi tqʼamaʼn Pablo jlu kye erman: «Waʼl qeye tuj kyokslabʼle». Toj juntl yol, xi tqʼamaʼn jlu kye: «Kukx in che ajbʼene te Jehová tuʼnju at kyokslabʼile, ex nya tuʼnju in chin onine kyiʼje moqa juntl erman». Ojtzqintoq tuʼn Pablo qa kʼujlaʼntoq Dios kyuʼn ex kyajtoq tuʼn tkubʼ kybʼinchaʼn aju bʼaʼn. Tuʼntzunju, tqʼama jlu kye: «Myatzun qajbʼile tuʼn qok tene kawil kyeye tiʼj kyokslabʼle». Tukʼil jlu, tqʼama Pablo qa nyatoq taj tuʼn tcontrolarin tiʼjju in bʼant kyuʼn erman (2 Corintios 2:3). Toj ambʼil jaʼlo, in nel kykanoʼn ansyan tiʼj Pablo tuʼnju qʼuqli kykʼuʼj tiʼj qa at kyokslabʼil erman tiʼj Dios ex qa in che ajbʼen te tuʼn tkyaqil kykʼuʼj (2 Tesalonicenses 3:4). Ax ikx, mintiʼ in xi kyqʼamaʼn tkyaqilju kbʼantel kyuʼn erman. Sino in najbʼen Tyol Dios kyuʼn ex tkyaqil tqanil in tzaj tqʼoʼn ttnam Jehová tuʼntzun kyonin kyiʼj erman tuʼn tel kynikʼ tiʼj tiʼ tuʼn tbʼant kyuʼn. Ik tzeʼn te Pablo, mintiʼ in che ok ansyan te tajaw kyokslabʼil erman (1 Pedro 5:2, 3).

4. a) ¿Tiʼtzun kyxilen yol tqʼama Pablo: «Qajbʼile tuʼn qonine kyukʼile tuʼn tten kytzalajbʼile»? b) ¿Tzeʼn in nel kykanoʼn ansyan tiʼj Pablo?

⁴ Ax ikx tqʼama Pablo jlu: «Qajbʼile tuʼn qonine kyukʼile tuʼn tten kytzalajbʼile». ¿Alkyeqe e onin moqa e mojin kyiʼj okslal te Corinto? A Pablo ex junjuntl erman ten tukʼil. ¿Tiquʼn in xi qqʼamaʼn jlu? Tuʼnju toj tkabʼin uʼj xi ttzʼibʼin kye okslal te Corinto, tqʼama qa otoq tzʼonin Silvano ex Timoteo tiʼj tuʼn kypakbʼan toj tnam lu (2 Corintios 1:19). Ax ikx, kyoj junjuntl uʼj kubʼ ttzʼibʼin Pablo, yolin kyiʼj junjuntl okslal otoq che onin tiʼj tok pakbʼabʼil ik tzeʼn Apolos, Áquila, Prisca, Timoteo ex Tito (Romanos 16:3, 21; 1 Corintios 3:6-9; 2 Corintios 8:23). ¿Tiʼtzun kyxilen yol tqʼama Pablo: «Qajbʼile tuʼn qonine kyukʼile tuʼn tten kytzalajbʼile»? A t-xilen qa ok tilil tuʼn Pablo ex junjuntl okslal tuʼn kyonin kyiʼj erman te Corinto tuʼn kytzalaj toj kyajbʼebʼil te Jehová. Ax ikx toj ambʼil jaʼlo, in nok tilil kyuʼn ansyan tuʼn kyonin kyiʼj erman tuʼn kytzalaj tuʼn kyajbʼen te Jehová (Salmo 100:2; Filipenses 1:25).

5. ¿Tiʼ xjel xi qanin kye nim erman ex tiʼ jaku bʼant tuʼna akux in qo xnaqʼtzan tiʼjju kyqʼama?

⁵ Kʼitzqeku xi tqanin junjun xjel kye junjun erman twitz tkyaqil Txʼotxʼ. Xi qanin kye tzeʼn e onin ansyan kyiʼj tuʼn kukx kytzalaj. ¿Tajpe teya tuʼn tok tbʼiʼna tiʼ tzaj kyqʼamaʼn? Akux in qo xnaqʼtzan tiʼj, ximana tiʼj tiʼ o tzaj kyqʼamaʼn ansyan teya moqa tiʼ o bʼant kyuʼn tuʼn kyonin tiʼja tuʼn ttzalaja toj tajbʼebʼila te Jehová. Ax ikx, ximana tiʼj tiʼ jaku bʼant tuʼna tuʼn tonina kyiʼj erman jatumel in nok tchmon tibʼa tuʼn kukx kytzalaj.a

«KYQʼONXE NQʼOLBʼEBʼLE TE ERMAN XUʼJ PÉRSIDA»

6, 7. a) ¿Tiʼ jaku tzʼel kykanoʼn ansyan tiʼj Jesús, tiʼj Pablo ex kyiʼj junjuntl tmajen Dios? b) ¿Tiquʼn bʼaʼn in nela toj kywitz erman aj ttzaj qnaʼn kybʼi?

⁶ Ateʼ nim erman tzaj kyqʼamaʼn qa in kubʼ kynaʼn bʼaʼn aj tkubʼ kyyekʼin ansyan qa in che ximen kyiʼj. ¿Tiʼ jaku tzʼonin kyiʼj ansyan tuʼn tbʼant jlu kyuʼn? Aju qa ma tzʼel kykanoʼn tiʼj techel kyaj tqʼoʼn David, Elihú ex Jesús (kjawil uʼjit 2 Samuel 9:6, Job 33:1 ex Lucas 19:5). Tej tyolin David, Elihú ex Jesús kyukʼil junjuntl, ajbʼen kybʼi kyuʼn. Tuʼn jlu kubʼ kyyekʼin qa in che ximen kyiʼj. Ax ikx, el tnikʼ apóstol Pablo tiʼj qa nim toklen tuʼn ttzaj tnaʼn kybʼi erman. Tej otoq bʼaj ttzʼibʼin uʼj xi tsamaʼn kye okslal te Roma, tqʼama mas te 25 kybʼi ermano ex ermana. Jun techel, tqʼamaʼn jlu: «Kyqʼonxe nqʼolbʼebʼle te erman xuʼj Pérsida, aju at nkʼuʼje tiʼj» (Romanos 16:3-15).

⁷ Ateʼ junjun ansyan kwest in nela toj kywitz tuʼn ttzaj kynaʼn kybʼi erman. Noqtzun tuʼnj, qa ma tzʼok tilil kyuʼn tuʼn ttzaj kynaʼn, kbʼel kynaʼn erman qa kʼujlaʼn qe kyuʼn (Éxodo 33:17). Ax ikx, aj tjaw kyiʼn erman kyqʼabʼ tuʼn t-xi kyqʼoʼn kyyol kyoj chmabʼil, kygan tuʼn ttzaj kyqʼamaʼn ansyan kybʼi (mojbʼankuya jlu tukʼil Juan 10:3).

«NIM O TZʼAQʼNAN TUJ TAQʼUN QAJAW»

8. ¿Tzeʼn el tkanoʼn Pablo tiʼj Jehová ex tiʼj Jesús?

⁸ Juntl tiʼ jaku tzʼonin kyiʼj erman tuʼn kyajbʼen te Dios tukʼil tzalajbʼil, aju qa ma txi qqʼamaʼn kye qa in bʼant jun tbʼanel aqʼuntl kyuʼn. Jun techel, tej t-xi ttzʼibʼin Pablo tuʼj kye okslal te Corinto xi tqʼamaʼn kye qa in tzalaj kyiʼj (2 Corintios 7:4). Qʼuqli qkʼuʼj tiʼj qa nimlo e onin tyol Pablo kyiʼj. Ax ikx, xi tqʼamaʼn Pablo tbʼanel yol kye junjuntl kʼloj okslal tiʼj tbʼanel aqʼuntl bʼant kyuʼn (Romanos 1:8; Filipenses 1:3-5; 1 Tesalonicenses 1:8). Tej otoqxi txi tqʼolbʼeʼn Pablo Pérsida toj uʼj xi ttzʼibʼin kye okslal te Roma, ax ikx tqʼama jlu tiʼj: «Nim o tzʼaqʼnan tuj taqʼun Qajaw» (Romanos 16:12). Nimlo jaw tzalaj Pérsida tej tok tbʼiʼn qe yol lu. El tkanoʼn Pablo tiʼj Jehová ex tiʼj Jesús, tuʼnju xi tqʼamaʼn kye erman qa in tzalaj tiʼj tbʼanel kyaqʼun (kjawil uʼjit Marcos 1:9-11 ex Juan 1:47; Apocalipsis 2:2, 13, 19).

9. ¿Tiquʼn nim toklen tuʼn t-xi kyqʼamaʼn ansyan kye erman qa tbʼanel aqʼuntl in bʼant kyuʼn?

⁹ In nel kynikʼ ansyan tiʼj qa nim toklen tuʼn t-xi kyqʼamaʼn kye erman qa in che tzalaj tiʼj aqʼuntl in bʼant kyuʼn toj kyajbʼebʼil te Jehová (Proverbios 3:27; 15:23). Tuʼntzunju, in xi kyqʼoʼn chjonte kye erman tiʼj aqʼuntl in bʼant kyuʼn. Ex atzun jlu kyaj erman tuʼn tok kybʼiʼn. In tzaj tqʼamaʼn jun ermana te mas te 50 abʼqʼi qa chʼixme tkyaqil maj mintiʼ in tzaj qʼoʼn chjonte te toj taqʼun aj tbʼant jun tbʼanel aqʼuntl tuʼn. Mintiʼ in che ximen tukʼil toj aqʼuntl kyiʼj txqantl ex in nok tilil kyuʼn tuʼn kycompetirin. Tuʼntzunju, aj t-xi kyqʼamaʼn ansyan jun tbʼanel yol te tiʼjju in bʼant tuʼn, in tzalaj ex in kubʼ tnaʼn qa kʼujlaʼn tuʼn Jehová. Atzun jlu bʼaj tiʼj jun ermano in xqʼuqin kyiʼj kabʼe tkʼwal, naʼnx tuʼn tiʼ xi tqʼamaʼn jun ansyan te: «Tbʼanelxix taqʼuna in bʼant». Onin jlu tiʼj tuʼn tok tilil tuʼn tuʼn ttzalaj tanmi Jehová tuʼn. In nel qnikʼ tiʼj qa nim toklen tuʼn t-xi kyqʼamaʼn ansyan tbʼanel yol kye erman. Iktzun tten, jaku che onin kyiʼj erman tuʼn miʼn kysikt ex tuʼn kukx kytzalaj tuʼn kyajbʼen te Jehová (Isaías 40:31).

IN CHE XQʼUQIN ANSYAN KYIʼJ ERMAN

10, 11. a) ¿Tiʼ xnaqʼtzbʼil jaku tzʼel kyiʼn ansyan tiʼj Nehemías? b) ¿Tzeʼn jaku che onin ansyan tuʼn tchʼiy qʼuqbʼil kykʼuʼj erman aj kyxiʼ visitaril kye?

¹⁰ ¿Tiʼ mas jaku bʼant kyuʼn ansyan tuʼn kyonin kyiʼj erman tuʼn kytzalaj toj kyajbʼebʼil te Jehová? Jaku che ximen tiʼj alkyeqe erman kyaj qʼuqbʼil kykʼuʼj ex bʼaʼn tuʼn t-xi kyqʼoʼn naj (kjawil uʼjit Hechos 20:28). Atzun jlu bʼant kyuʼn nimku tmajen Jehová toj ambʼil ojtxe. Jun techel, tej tel tnikʼ Nehemías tiʼj qa otoq tzaj kybʼis junjun aj Judiy, jun rat naj xi tqʼuqbʼaʼn kykʼuʼj (Nehemías 4:14). Ax jlu in bʼant kyuʼn ansyan toj ambʼil jaʼlo. Aj tel kynikʼ tiʼj qa at jun erman in bʼisun, in nok tilil kyuʼn tuʼn t-xi kyqʼoʼn onbʼil te. At maj, in cheʼx visitaril kye erman kyja tuʼntzun t-xi kyqʼamaʼn jun taqikʼ Tyol Dios kye ex tuʼn t-xi kyqʼuqbʼaʼn kykʼuʼj (Romanos 1:11). ¿Tiʼtzun jaku txi kyqʼamaʼn ansyan?

¹¹ Naʼmxtoq kyxiʼ ansyan visitarilte jun erman, bʼaʼn tuʼn tel kypaʼn ambʼil tuʼn kyximen tiʼj kyiʼj xjel ik tzeʼn jlu: «¿Alkyeqe nya bʼaʼn in nok weʼ erman twitz? ¿Tiʼ jaku txi nqʼamaʼne tuʼn tkubʼ tnaʼn bʼaʼn? ¿Alkye jun texto jaku txi wuʼjine te moqa alkye jun techel toj Tyol Dios jaku tzʼonin tiʼj?». Qa ma bʼant jlu kyuʼn ansyan, kʼonil kyiʼj tuʼn t-xi kyqʼamaʼn jun tiʼ jaku tzʼonin tiʼj erman. Ax ikx, nim toklen tuʼn t-xi kyqʼoʼn ambʼil kye erman tuʼn kyyolin ex tuʼn tok kyqʼoʼn kywiʼ tiʼj kyyol (Santiago 1:19). Tqʼama jun ermana jlu: «In chewix nkʼuʼje aj tok kybʼiʼn ansyan aju in xi nqʼamaʼne kye» (Lucas 8:18).

12. ¿Alkyeqe erman kyaj qʼuqbʼil kykʼuʼj ex tiquʼn?

¹² ¿Alkyeqe kyaj qʼuqbʼil kykʼuʼj toj kʼloj okslal? Xi tqʼamaʼn Pablo kye ansyan tuʼn kyxqʼuqin kyiʼj kykyaqil okslal. Tuʼntzunju, kykyaqil erman kyaj qʼuqbʼil kykʼuʼj, axpe ikx qeju ma tzikʼ nim abʼqʼi kyoklen te pakbʼal ex qeju in che ajbʼen te precursor. ¿Tiquʼn? ¿Ya mintiʼpe in nok qeʼ kykʼuʼj tiʼj Jehová? Kukx at qʼuqbʼil kykʼuʼj tiʼj Jehová, pero bʼalo in tzaj nya bʼaʼn kyiʼj ex in kubʼ kynaʼn qa mlay che ex twitz. Tuʼntzunju kyaj onbʼil. Tuʼn tel qnikʼ tiʼj jlu, qo yolin tiʼjju bʼaj tiʼj aj kawil David.

ONIN ABISAI TIʼJ DAVID

13. a) ¿Toj alkye ambʼil kubʼ t-ximen Isbí-benob tuʼn tkubʼ tbʼyoʼn David? b) ¿Tiquʼn bʼant tuʼn tonin Abisai tiʼj David?

¹³ Tej tzmatoq kuʼxun David jaw skʼoʼn tuʼn tok te aj kawil toj tnam Israel. Tej tikʼ chʼin ambʼil, qʼojin tukʼil jun xjal matij tweʼ aju Goliat tbʼi ex atztoq tzajni tiʼj kyyajil refaím. Pero mintiʼ tzaj xobʼ David ex kyim Goliat tuʼn (1 Samuel 17:4, 48-51; 1 Crónicas 20:5, 8). Tej tikʼ mas abʼqʼi, ax ikx qʼojin David tukʼil jun xjal matij twaʼl toj jun qʼoj ok kyukʼil aj Filisteo. Isbí-benob tbʼi xjal lu ex atztoq tzajni kyxol xjal te refaím (2 Samuel 21:16). Noqtzun tuʼnj, toj ambʼil aju chʼixme kyim David. ¿Tiquʼn? ¿Tzajpe xobʼ? Mintiʼ tzaj xobʼ, sino in tzaj tqʼamaʼn Tyol Dios qa otoq sikt toj qʼoj. Tej tlonte xjal lu qa otoq sikt David, kubʼ t-ximen jlu: «Atzun ambʼil lu tuʼn tkubʼ nbʼyoʼne». Pero jun rat xiʼ Abisai onil David ex kubʼ tbʼyoʼn filisteo (2 Samuel 21:15-17). Ik tzeʼn in nel qnikʼ tiʼj, toktoq twitz Abisai tiʼj David ex tej tlonte qa chʼixtoq tkyim, jun rat xiʼ onil te. Xilo tqʼoʼn David nim chjonte tiʼj jlu. ¿Tiʼ xnaqʼtzbʼil jaku tzʼel qiʼn tiʼj jlu?

14. a) ¿Tiʼ il tiʼj tuʼn tbʼant quʼn tuʼn kukx qajbʼen te Jehová aj qok weʼ twitz jun nya bʼaʼn? b) Aj tkubʼ qnaʼn siktleʼn, ¿tzeʼn jaku che onin ansyan qiʼj tuʼn kukx qtzalaj toj qajbʼebʼil te Jehová? Qʼamantza jun techel.

¹⁴ Qkyaqilx o tzaj junxichaq nya bʼaʼn qiʼj, pero kukx in qo ajbʼen te Jehová. ¿Tiʼtzun o tzʼonin qiʼj? Ok qeʼ qkʼuʼj tiʼj qa tzul tqʼoʼn Jehová qipumal, ik tzeʼn bʼant tuʼn David tej tkubʼ tbʼyoʼn Goliat. Noqtzun tuʼnj, kukx in qo qʼojin tukʼil Satanás ex qeju in che onin tiʼj, ex at maj in qo sikt. Kyoj ambʼil lu, bʼalo in kubʼ qnaʼn qa mintiʼ qipumal tuʼn qex kywitz nya bʼaʼn. ¿Nyape tbʼanel qa ma tzʼonin jun ansyan qiʼj toj ambʼil lu? Aj kyonin ansyan qiʼj in nok juntl maj qipumal ex kukx in qo ajbʼen te Dios tukʼil tzalajbʼil. ¿Ope tzʼonin jun ansyan tiʼja? Atzun jlu bʼaj tiʼj jun precursora aju qʼin junlo 65 abʼqʼi tuʼn. Tqʼama jlu: «Toj jun ambʼil kubʼ nnaʼne siktleʼn toj pakbʼabʼil. El tnikʼ jun ansyan wiʼje ex tzaj tqanin weye tiʼtoq in bʼaj wiʼje. Tzaj tqʼamaʼn jun taqikʼ Tyol Dios weye ex nimxix onin wiʼje. In tzalaje tuʼnju ok tqʼoʼn twitz tiʼjju bʼaj wiʼje ex tuʼnju tzaj tqʼoʼn onbʼil weye». Tbʼanel aj tok qqʼoʼn qwitz tiʼj qa in che ximen ansyan qiʼj ex qa kyaj tuʼn kyonin qiʼj, ik tzeʼn bʼant tuʼn Abisai tukʼil David.

BʼIʼNTOQ KYUʼN QA KʼUJLAʼN QETOQ TUʼN PABLO

15, 16. a) ¿Tiquʼn ok kʼujlaʼn Pablo kyuʼn erman? b) ¿Tiquʼn in che ok qkʼujlaʼn qe ansyan?

¹⁵ In nok tilil kyuʼn ansyan tuʼn kyonin kyiʼj erman, at maj mintiʼ in che jtan ex in che jaw weʼ toj qonikʼen tuʼn kynaʼn Dios kyiʼj moqa tuʼn t-xi kyqʼoʼn onbʼil kye (2 Corintios 11:27, 28). Ik tzeʼn te Pablo, in che tzalaj ansyan aj tbʼant kyaqʼun. Toj uʼj xi ttzʼibʼin Pablo kye okslal te Corinto, xi tqʼamaʼn kye qa kʼoniltoq kyiʼj maske jakutoq sikt (2 Corintios 12:15). Tajtoq tuʼn tonin kyiʼj erman tuʼnju e ok tkʼujlaʼn (kjawil uʼjit 2 Corintios 2:4; Filipenses 2:17; 1 Tesalonicenses 2:8). Tuʼntzun jlu, ok kʼujlaʼn Pablo kyuʼn erman (Hechos 20:31-38).

¹⁶ Ax ikx qe, kʼujlaʼn qe ansyan quʼn ex in xi qqʼoʼn chjonte te Jehová tuʼnju in che ajbʼen tuʼn tuʼn kyxqʼuqin qiʼj. Kukx in che ximen qiʼj ex in che ul visitaril qe tuʼn ttzaj kyqʼuqbʼaʼn qkʼuʼj ex in che onin qiʼj tuʼn tten qipumal tuʼn qex kywitz nya bʼaʼn. Tuʼn onbʼil in tzaj kyqʼoʼn qe, kukx jaku qo ajbʼen te Jehová tukʼil tzalajbʼil.