Aju nikʼaj yol tiʼj qa at Oxe Kybʼet Dios

AJU IN TZAJ KYQʼAMAʼN XJAL

In tzaj tqʼamaʼn Diccionario Akal crítico de Teología jlu: «Aju [xnaqʼtzbʼil tiʼj] Trinidad atz in yolin tiʼj junx Dios at toj oxe xjal, aju Tatbʼaj, Kʼwalbʼaj ex Xewbʼaj Xjan». Ax ikx in tzaj tqʼamaʼn uʼj Diccionario abreviado del cristianismo jlu: «In nok qeʼ kykʼuʼj Católico, qe ortodoxo, qe anglicano ex qe protestante tiʼj xnaqʼtzbʼil lu».

AJU IN TZAJ TQʼAMAʼN TYOL DIOS

Mintiʼ tqʼama Jesús qa a in nok te Dios. ¿Tiquʼn? Tuʼnju tqʼama jlu: «Ma chinxe tukʼil Nmane; porke ate Nmane mas at toklen nwitze» (Juan 14:28). Ax ikx xi tqʼamaʼn jlu te jun t-xnaqʼtzbʼen: «Chin jawixe tukʼil Nmane ex Kymane, tukʼil Ndiose ex Kydiose» (Juan 20:17).

Nya jun xjal xewbʼaj xjan. Aqeju okslal te tnejel syent abʼqʼi «bʼaj noj tuj kyanmi tuʼn Xewbʼaj Xjan», ex tqʼama Jehová jlu: «Tuj mankbʼil qʼij ktzajel nqʼoʼne Nxewe tuj kyanmi kykyaqil xjal» (Hechos 2:1-4, 17). Aju xewbʼaj xjan atzun tipumal Dios ex mintiʼ toklen tukʼil xnaqʼtzbʼil tiʼj Trinidad.

¿TIQUʼN NIM TOKLEN TUʼN TEL TNIKʼA TIʼJ JLU?

In tzaj tqʼamaʼn aj xnaqʼtzal católico Karl Rahner ex Herbert Vorgrimler qa mlay tzʼel qnikʼ tiʼj xnaqʼtzbʼil tiʼj Trinidad «qa mintiʼ ma tzaj yekʼin qe toj jun witzikʼ, ex maske tzaj yekʼin qe toj jun witzikʼ, mlayx tzʼel qnikʼ tiʼj». ¿Jakupe tzʼok qkʼujlaʼn jun xjal qa mintiʼ ojtzqiʼn quʼn? Mlayx. Tuʼntzunju, in nel tiʼn xnaqʼtzbʼil tiʼj Trinidad ambʼil qe tuʼn tok qkʼujlaʼn Dios.

Tqʼama Marco, aju ma qo yolin tiʼj toj tnejel xnaqʼtzbʼil, qa el tiʼn xnaqʼtzbʼil tiʼj Trinidad ambʼil te tuʼn tel tnikʼ tiʼj Dios. Tqʼama jlu: «Kubʼ nximane qa nya tajtoq Dios tuʼn tel nnikʼe tiʼj ex tuʼn jlu kwesttoq tuʼn wok laqʼeʼye ttxlaj». Noqtzun tuʼnj, taj Dios tuʼn tel qnikʼ tiʼj (1 Corintios 14:33). Ex in tzaj tqʼamaʼn qe alkye tbʼi. Tqʼama Jesús jlu: «Atzun qeye in qo kʼulune twitz ju ojtzqiʼn quʼne» (Juan 4:22).

Tqʼamatl Marco jlu: «Tej tel nnikʼe tiʼj Dios, el nnikʼe tiʼj qa mintiʼ toklen tukʼil xnaqʼtzbʼil tiʼj Trinidad ex xi tzyet tuʼn tten jun wamiwbʼile tukʼil». Aj tel qnikʼ tiʼj qa axix tok at Jehová, kʼonil qiʼj tuʼn tok qkʼujlaʼn. In tzaj tqʼamaʼn Biblia jlu: «Alkye mintiʼ tkʼujlalil, naʼnx tel tnikʼ tiʼj Dios, porke ate Dios at tkʼujlalil» (1 Juan 4:8).