Tzʼajbʼenx jw.org quʼn toj pakbʼabʼil: «Preguntas sobre la Biblia»

Toj jw.org, tkubʼ aju «Enseñanzas bíblicas», ex toj xnaqʼtzbʼil lu tkubʼ juntl aju tok tbʼi: «Preguntas sobre la Biblia». Qa ojtzqiʼn quʼn aʼyeju xnaqʼtzbʼil ateʼkux toj nim tajbʼen lu toj qpakbʼabʼil, tuʼnju qa at jun xjal ma tzaj tqanin jun xjel aju tkuʼx toj xnaqʼtzbʼil lu, jaku txi qyekʼun te xjal aju qtembʼil toj Internet tuʼn t-xi yekʼet tzaqʼwebʼil. Ax ikx jaku che ajbʼen qeju xjel lu quʼn tuʼn t-xi tzyet tuʼn qyolin kyukʼil xjal. Jun techel, jaku jaw qjyoʼn jun xjel aju tbʼanel jaku tzʼel toj kywitz xjal atz jatumel in qo pakbʼan, jaku txi qqanin tiʼ t-xim tiʼj ex bʼaʼn tuʼn t-xi qchikʼbʼaʼn aju in tzaj tqʼamaʼn Tyol Dios tukʼe onbʼil in tzaj tqʼoʼn jw.org. Yajxitl, jaku txi qqʼamaʼn qa jaku kanet tqanil lu quʼn toj jw.org ex jaku txi qyekʼun qtembʼil toj Internet te xjal. Juntl tten, tuʼn t-xi qqʼoʼn ambʼil te xjal tuʼn tkubʼ tuʼjin tzaqʼwebʼil tojxix qtembʼil. Tzaj tqʼamaʼn jun t-xuʼjil ansyan in bʼet kyojele Ja te Chmabʼil qa tbʼanel aju onbʼil lu, chi kyjalu: «At nim xjal in kubʼ kyximen qa a Dios in tzaj qʼonte yajbʼil. ¿Tajbʼila tuʼn tel tnikʼa tiʼj tzaqʼwebʼil? Nya nim ambʼil kxel tiʼn». In noktzun tqʼoʼn xnaqʼtzbʼil tuʼn tok tbʼiʼn xjal, aju o kutz tiʼn toj jw.org toj tyolbʼil, ex tuʼn tkubʼ bʼaj in xi tyekʼun xnaqʼtzbʼil 11 toj uʼj ¿Tiʼ in tzaj t-xnaqʼtzaʼnxix Tyol Dios?