Qkanoʼmel kyiʼj qe pakbʼal in bʼant-xix kypakbʼan

Nimxix kyoklen toj qwitz aʼyeju pakbʼal in bʼant-xix kypakbʼan. At junjun ma bʼet-xi ambʼil in che ajbʼen te Jehová. At junjuntl kʼitzqeku ma bʼant-xix kypakbʼan. Kykyaqil o tzʼel kynikʼ tiʼj qa a Jesús qʼil twitz aqʼuntl toj ttnam Dios kyoj qeju mankbʼil qʼij ex in nonin tiʼj pakbʼabʼil ex tuʼn t-xi qʼet xnaqʼtzbʼil (Mat. 28:19, 20). Tuʼnju ma bʼet nim ambʼil in che pakbʼan, at nimxix kyipumal, ex a jlu in nonin kyiʼj tuʼn kyex twitz nya bʼaʼn (2 Cor. 4:7). At nimxix kygan tuʼn t-xi kyxnaqʼtzaʼn kye txqantl aju o tzʼel kynikʼ tiʼj ex atzun qe nim jaku tzʼel qkanoʼn tiʼjju o tzʼelxix kynikʼ tiʼj (Sal. 71:18). ¿Alkye tten jaku tzʼel qkanoʼn?

Toj pakbʼabʼil. Tuʼn tbʼant-xix kypakbʼan qeju tzma in xi tzyet tuʼn kyex pakbʼal, il tiʼj tuʼn t-xi qʼoʼn xnaqʼtzbʼil kye kyuʼn qeju in bʼant-xix kypakbʼan. Nimxix jaku tzʼel qkanoʼn qa ma tzʼok qqʼoʼn qwitz tiʼj alkye tten in che pakbʼan qeju pakbʼal in bʼant-xix kypakbʼan. (Qʼonk twitza tiʼj taqikʼ oxe tjaqʼ subtítulo «Ayude a los nuevos», te xnaqʼtzbʼil «Cómo mantener el entusiasmo en la predicación», aju tkuʼx toj uʼj Aju Xqʼuqil, aju etz toj kastiy te 15 te febrero te 2015.) ¿Alkye tten o tzʼonin tiʼja tuʼnju in pakbʼana kyukʼe pakbʼal in bʼant-xix kypakbʼan?

Bʼaʼn tuʼn t-xi tqʼamaʼna kye tuʼn kyex pakbʼal tukʼila. Qa yabʼ taʼ pakbʼal, jaku txi tiʼna jun kyxol qeju xjal in che xnaqʼtzan tukʼila tja tuʼntzun t-xi kyqʼoʼne xnaqʼtzbʼil te. Aj tkubʼaj xnaqʼtzbʼil, qaninxa te pakbʼal in bʼant-xix tpakbʼan alkye t-xim tiʼj ex qaninxa tuʼn ttzaj tqʼoʼn junjun nabʼil teya.

Paʼmila ambʼil tuʼn ttena kyukʼil. Qʼonka tilil tuʼn kyok tojtzqiʼna qe pakbʼal lu. Bʼaʼn tuʼn ttzaj ttxkoʼna jun tuʼn tten toj ambʼil in xi tqʼoʼna kyukʼe toj tjaya te Jehová ex qaninxa junjun xjel te. Qaninxa te alkye tten sok tojtzqiʼn axix tok, alkye tten o tzaj kʼiwlaʼn tuʼn Jehová, alkye tten o chʼiy kʼloj okslal jatumel in nok tchmon tibʼ atxix tej tok te testigo de Jehová ex alkye tbʼanelxix o tzikʼ tiʼj tuʼnju in najbʼen te Dios. Qa yabʼ taʼ pakbʼal jaku txiʼya tja tuʼn tkubʼ ikʼset ambʼil in xi qʼet kyukʼe toj qja te Jehová.

Bʼaʼn tuʼn tten jun tbʼanel t-xima kyiʼj. Ik tzeʼn qe, aʼyeju ma bʼet nim ambʼil in che pakbʼan at junxichaq tiʼchaq in bʼant kyuʼn (Rom. 12:6-8). At junjun ma che tijen ex mintiʼ nim ambʼil kyiʼj tuʼn kyten qukʼe. Noqtzun tuʼnj, nim jaku tzʼel qkanoʼn kyiʼj ex tiʼj kyajbʼebʼil te Jehová.