¿Tiquʼn at nim ikʼbʼil?

Kukx at nim ikʼbʼil kyxol xjal. ¿Tiquʼn? Tuʼn tel qnikʼ tiʼj jlu, tnejel qo xnaqʼtzan tiʼj tiʼ aju ikʼbʼil, tiquʼn in chʼiy toj kyanmi xjal ex alkye tten in nel kykanoʼn xjal ikʼbʼil.

¿Tiʼ aju ikʼbʼil?

Atz in yolin jlu tiʼjju aj tkubʼ tnaʼn jun xjal ikʼbʼil tiʼj juntl xjal moqa tiʼj jun kʼloj xjal. Ex nya oʼkx at toklen jlu tukʼilju aj tkubʼ tnaʼn jun xjal qʼoj tiʼj juntl toj chʼin ambʼil.

¿TIQUʼN IN CHʼIY IKʼBʼIL TOJ KYANMI XJAL?

At nim tiquʼn in kubʼ kynaʼn xjal ikʼbʼil. Chʼixme tkyaqil maj mintiʼ in nel kyikʼun xjal kywitz txqantl tuʼnju in bʼant kyuʼn, sino tuʼnju alkyeqe. Bʼalo in kubʼ kyximen junjun qa nya bʼaʼn xjal qe, qa jaku tzʼok kybʼinchaʼn nya bʼaʼn kyiʼj, qa mlay chʼexpaj kymod, qa mintiʼ kyoklen ex qa tuʼn kypaj in che tzaj nya bʼaʼn. Ax ikx, ateʼ nim xjal in kubʼ kynaʼn ikʼbʼil tuʼnju o tzʼok bʼinchaʼn nya bʼaʼn kyiʼj, tuʼnju mintiʼ xi bʼinchaʼn tiʼj jun tiʼ toj tumel ex tuʼnju o tzikʼ junjuntl tiʼ toj kyanqʼibʼil.

¿ALKYE TTEN IN NEL KYKANOʼN XJAL IKʼBʼIL?

At maj, in nel kyikʼun xjal kywitz txqantl maske nya ojtzqiʼn qe kyuʼn. Jun techel, bʼalo tbʼanel jaku tzʼela toj twitz jun xjal aju nya bʼaʼn t-ximbʼetz jun tamiw maske mintiʼ in nel tnikʼ tiʼj. Tuʼntzunju, qa in kubʼ tyekʼin jun xjal ikʼbʼil kyiʼj junjuntl, jun rat naj jaku tzʼel kykanoʼn txqantl tiʼj.

Aj tel qnikʼ tiʼj qa jun rat naj in nel kykanoʼn xjal ikʼbʼil, in nel qnikʼ tiʼj tiquʼn ateʼ nim xjal in kubʼ kyyekʼin mod lu. Pero tuʼn tnaj ikʼbʼil, nim toklen tuʼn tok qojtzqiʼn jatumel tzaj tzyet nya bʼaʼn lu. In tzaj tqʼamaʼn Tyol Dios jatumel tzaj tzyet.

IN TZAJ TQʼAMAʼN TYOL DIOS TIQUʼN AT IKʼBʼIL

In tzaj tyekʼin jun dibujo tzeʼn ikʼbʼil at kyxol xjal. 1. Jaku tzaj qʼamaʼn nya ax tok tqanil kyuʼn qe kyukʼil, kyuʼn qe redes sociales moqa kyuʼn qe qʼol noticia 2. Mintiʼxix kyojtzqibʼil tiʼj jun tnam, tiʼj kyanqʼibʼil junjuntl xjal moqa tiʼj kyokslabʼil txqantl. 3. In che tzaj xobʼ kyuʼn chʼixpubʼil, tuʼnju jaku t-xi naj jun tiʼ kye moqa tuʼnju mintiʼ kyojtzqibʼil tiʼj jun tiʼ. 4. Jaku tzaj junjuntl nya bʼaʼn tuʼn ikʼbʼil ik tzeʼn qʼoj ex bʼiybʼel.

NYA AQE XJAL KUBʼ KYYEKʼIN TNEJEL MAJ IKʼBʼIL. Tzaj tzyet nya bʼaʼn lu toj kyaʼj tuʼnju el tpan tibʼ jun anjel tiʼj Dios, aju in nok tbʼi te Satanás ex Tajaw il. Tej tel tpan tibʼ tiʼj Dios ok te jun bʼyol xjal. Tuʼntzunju, kukx at ikʼbʼil ex bʼiybʼil tuʼnju jun «nikʼal yolte ex atzun in tzaj nikʼaj yol tukʼil» (Juan 8:44; 1 Juan 3:11, 12). In tzaj tqʼamaʼn Biblia qa mintiʼ tkʼujlabʼil Satanás, qa in bʼiyen ex qa at nimxix tqʼoj (Job 2:7; Apocalipsis 12:9, 12, 17).

AX IKX KYE XJAL O TZʼEL KYIQEN IKʼBʼIL. Aju tnejel xjal Adán tbʼi, ok lepeʼ tiʼj Satanás. Tuʼntzunju, o che kyaj kykyaqil xjal tjaqʼ il ex nya tzʼaqli qe (Romanos 5:12). Ax ikx te Caín, aju tnejel tkʼwal Adán, attoq ikʼbʼil toj tanmi ex tuʼn jlu kubʼ tbʼyoʼn titzʼin, aju Abel tbʼi (1 Juan 3:12). Maske in nok tilil quʼn tuʼn tkubʼ qyekʼin qkʼujlabʼil ex qʼaqʼbʼil qkʼuʼj, mas fácil tuʼn qximen qiʼjx, tuʼn tpon qkʼuʼj tiʼjju at te juntl ex tuʼn tjaw qnimsan qibʼ tuʼnju aj il qoʼ, ex tuʼn jlu mas in ten ikʼbʼil (2 Timoteo 3:1-5).

IN CHʼIY IKʼBʼIL TUʼNJU MINTIʼ KYPASENS XJAL. Tuʼnju at nim nya bʼaʼn kymod xjal ex nya bʼaʼn kybʼinchbʼen, at nim ikʼbʼil. Ex tuʼnju «kykyaqil xjal twitz txʼotxʼ ateʼ tjaqʼ tipumal tajaw il» moqa Satanás, tkyaqil qʼij mintiʼ in ten kypasens, in nel kyikʼun kyyajil txqantl, in che yasun, in che xmayin ex in che elqʼan (1 Juan 5:19).

Nya oʼkx in tzaj tqʼamaʼn Tyol Dios tiquʼn at ikʼbʼil, sino ax ikx in tzaj tqʼamaʼn alkye tten kbʼel naj.