Bʼaʼn tuʼn tok qeʼ tkʼuʼja tiʼj qa o kubʼ tnajsaʼn Jehová tila

1, 2. ¿Tiʼ in bʼant tuʼn Jehová aj tajtz tiʼj qanmi ex tiʼ in kubʼ qnaʼn tuʼn jlu? (Ax ikx qʼonka twitza tiʼj tilbʼilal).

KUBʼ tnaʼn Rey David nim bʼis kyuʼn il bʼant tuʼn (Sal. 40:12; 51:​3, qe yol tkubʼ twi capítulo). Pero ajtz tiʼj tanmi ex kubʼ tnajsaʼn Jehová til (2 Sam. 12:13). Tej tel tnikʼ David tiʼj qa otoq kubʼ tnajsaʼn Jehová til, kubʼ tnaʼn nim tzalajbʼil (Sal. 32:1).

² Jaku kubʼ tnajsaʼn Jehová qil qa ma tzʼajtz tiʼj qanmi, qa ma txi qqʼamaʼn kye ansyan tiʼ il xbʼant quʼn ex qa mintiʼ xkubʼ qbʼinchaʼn juntl maj. Qa ma bʼant jlu quʼn, kbʼel qnaʼn tzalajbʼil ik tzeʼn te David (Prov. 28:13; Hech. 26:20; 1 Juan 1:9). In tzaj qʼuqbʼaʼn qkʼuʼj aj tel qnikʼ tiʼj qa in kubʼ tnajsaʼn Jehová qil te jumajx, ik tzeʼn mintiʼx o bʼant jun il quʼn (Ezeq. 33:16).

3, 4. ¿Tiʼ kubʼ tnaʼn Jennifer tej tbautisarin ex tiʼ kʼelel qnikʼ tiʼj toj xnaqʼtzbʼil lu?

³ Noqtzun tuʼnj, at maj kwest tuʼn tok qeʼ qkʼuʼj tiʼj qa o kubʼ tnajsaʼn Jehová qil. Atzun jlu kubʼ tnaʼn Jennifer. Xi xnaqʼtzaʼn axix tok te kyuʼn ttat, pero tej tchʼiy ok ten bʼinchal nya bʼaʼn ex kubʼ tewin kywitz. Tej tikʼ nim ambʼil, meltzʼaj juntl maj toj ttnam Jehová ex bautisarin. Tqʼama jlu: «Toj ambʼil ojtxe kubʼ nbʼinchaʼne nim nya bʼaʼn ik tzeʼn yaẍbʼil, in kʼane qʼeʼn, jurat in tzajtoq nqʼoje ex wajtoqe tuʼn tten nim tiʼchaq weye. Kubʼ nximane qa ya otoq kubʼ tnajsaʼn Jehová wile noq tuʼn chojbʼil bʼant tuʼn Jesús ex tuʼnju otoq tzʼajtz tiʼj wanmiye. Pero kwesttoq tuʼn t-xi nnimane qa ax tok jlu».

⁴ ¿Kwestpe tuʼn t-xi tnimana qa ya o kubʼ najsaʼn tila tuʼn Jehová? Jaku tzʼok qeʼ tkʼuʼja tiʼj, ik tzeʼn te David, qa ya o kubʼ tnajsaʼn Jehová tila tuʼnju at qʼaqʼbʼil tkʼuʼj. Toj xnaqʼtzbʼil lu, kʼelel qnikʼ tiʼj tiquʼn nim toklen tuʼn tok qeʼ qkʼuʼj tiʼj jlu ex tiʼ kʼonil qiʼj.

¿TIQUʼN NIM TOKLEN TUʼN TOK QEʼ QKʼUʼJ TIʼJ QA O KUBʼ TNAJSAʼN JEHOVÁ QIL?

5. ¿Tiʼ taj Satanás tuʼn tkubʼ qximen? Yolina tiʼj jun techel.

⁵ Qa qʼuqli qkʼuʼj tiʼj qa o kubʼ tnajsaʼn Jehová qil, mlay qo kubʼ tzʼaq kyoj ttramp Satanás. Bʼaʼn tuʼn ttzaj qnaʼn qa jaku bʼant noq alkyexku tiʼ tuʼn Satanás tuʼn ya miʼn qajbʼen te Jehová. Jun kyxol tramp in najbʼen tuʼn aju tuʼn tkubʼ qximen qa mlayx kubʼ tnajsaʼn Jehová jun matij il o bʼant quʼn. Qo ximen tiʼjju bʼaj tiʼj xjal te Corinto, kubʼ tbʼinchaʼn yaẍbʼil ex tuʼn jlu ex qʼiʼn toj congregación (1 Cor. 5:​1, 5, 13). Tej tikʼ ambʼil ajtz tiʼj tanmi, pero tajtoq Satanás tuʼn miʼn tkubʼ kynajsaʼn erman til ex tuʼn miʼn t-xi kyqʼoʼn ambʼil te tuʼn tmeltzʼaj toj congregación. Noqwit bʼaj jlu, jakutoq japun twi t-ximbʼetz Satanás tuʼn tkubʼ t-ximen xjal qa otoq kubʼ tbʼinchaʼn jun il aju mlay kubʼ tnajsaʼn Jehová. Tuʼn jlu jakutoq tzaj nim tbʼis ex jakutoq kubʼ t-ximen tuʼn tkyaj ttzaqpiʼn tuʼn tajbʼen te Jehová. Ax jlu in bʼant tuʼn Satanás toj ambʼil jaʼlo. Pero ya ojtzqiʼn quʼn «tzaʼn tten tmod» (2 Cor. 2:​5-11).

6. Qa kukx in kubʼ qnaʼn nya bʼaʼn tuʼn jun il o bʼant quʼn, ¿tiʼ kʼonil qiʼj?

⁶ Qa qʼuqli qkʼuʼj tiʼj qa o kubʼ tnajsaʼn Jehová qil, jaku tzʼonin qiʼj tuʼn qtzalaj juntl maj. Qkyaqilx in kubʼ qnaʼn bʼis aj tkubʼ qbʼinchaʼn jun nya bʼaʼn (Sal. 51:17). Toj tumel jlu tuʼnju in nonin qconciencia tuʼn tbʼant chʼixpubʼil quʼn ex tuʼn tkubʼ qbʼinchaʼn aju bʼaʼn (2 Cor. 7:​10, 11). Noqtzun tuʼnj, qa ma kubʼ qnaʼn nim bʼis maske otoq tzʼajtz tiʼj qanmi, jaku kyaj qtzaqpiʼn tuʼn qajbʼen te Jehová. Pero qa ma tzʼok qeʼ qkʼuʼj tiʼj qa o kubʼ tnajsaʼn Jehová qil, kʼonil qiʼj tuʼn ya miʼn tkubʼ qnaʼn nya bʼaʼn. Iktzun tten jaku tzʼok qeʼ qkʼuʼj tiʼj qa in tzalaj Jehová qiʼj ex jaku qo ajbʼen te tukʼil tzalajbʼil (Col. 1:​10, 11; 2 Tim. 1:3). Qo xnaqʼtzaʼn tiʼj tiʼ jaku tzʼonin qiʼj tuʼn tok qeʼ qkʼuʼj tiʼj qa o kubʼ tnajsaʼn Jehová qil.

¿TIʼ KʼONIL TIʼJA TUʼN TOK QEʼ TKʼUʼJA TIʼJ QA O KUBʼ TNAJSAʼN JEHOVÁ TILA?

7, 8. Ik tzeʼn in tzaj qʼamaʼn toj Éxodo 34:6 ex 7, ¿tiʼ tqʼama Jehová tiʼjx ex tzeʼn in nonin jlu qiʼj tuʼn tok qeʼ qkʼuʼj tiʼj qa o kubʼ tnajsaʼn qil?

⁷ Ximana tiʼjju tqʼama Jehová tiʼjx. Naʼntza tiʼ xi tqʼamaʼn Jehová te Moisés twiʼ witz Sinaí (kjawil uʼjit Éxodo 34:​6, 7).a Jakutoq tqʼama Jehová nim tiʼchaq tiʼjx, pero mas yolin tiʼj qʼaqʼbʼil tkʼuʼj. Entonces, ¿in kubʼpe t-ximana qa mlayx kubʼ tnajsaʼn Jehová til jun tmajen o tzʼajtz tiʼj tanmi? Qa mintiʼ ma kubʼ tnajsaʼn Jehová til tmajen, kbʼel tyekʼin qa mintiʼ qʼaqʼbʼil tkʼuʼj ex qa nya bʼaʼn tmod, pero mlayx bʼant jlu tuʼn Jehová.

⁸ Aj ttzaj tqʼamaʼn Jehová qa at qʼaqʼbʼil tkʼuʼj, axix tok tyol ex jaku tzʼok qeʼ qkʼuʼj tiʼj (Sal. 31:5). Pero qa kwest tuʼn t-xi tnimana qa o kubʼ tnajsaʼn Jehová tila, bʼaʼn tuʼn tkubʼ t-xjelina jlu: «¿In xipe nnimane qa axix tok in kubʼ tnajsaʼn Jehová kyil qeju in najtz tiʼj kyanmi?». Qa in xi tnimana jlu, ax ikx jaku tzʼok qeʼ tkʼuʼja tiʼj qa o kubʼ tnajsaʼn Jehová tila.

9. ¿Tiʼ in tzaj tyekʼin Salmo 32:5 qe tiʼj alkye tten in kubʼ tnajsaʼn Jehová qil?

⁹ Ximana tiʼjju in tzaj t-xnaqʼtzaʼn Jehová qe toj Biblia tiʼj tzeʼn in kubʼ tnajsaʼn qil. Jun techel, tqʼama David jlu te Jehová: «Kubʼ tnajsaʼna wile» (kjawil uʼjit Salmo 32:5). Aju yol hebreo in najbʼen toj texto lu ax ikx a t-xilen «tuʼn tjaw qʼiʼn» moqa «tuʼn t-xi qʼiʼn». Tej tkubʼ tnajsaʼn Jehová til David, ok ik tzeʼn el tiʼn Jehová iqtz tibʼaj ex xi tiʼn, tuʼntzunju kubʼ tnaʼn David nim tzalajbʼil (Sal. 32:​2-4). Ax ikx qe, jaku kubʼ qnaʼn tzalajbʼil qa axix tok ma tzʼajtz tiʼj qanmi. Ex mintiʼ tuʼn tkubʼ qnaʼn bʼis tuʼnju o tzʼel tiʼn ex o txi tiʼn Jehová qe qil, toj juntl yol o kubʼ tnajsaʼn qe qil te jumajx.

10, 11. ¿Tiʼ in tzaj tyekʼin Salmo 130:4 qe tiʼj Jehová?

¹⁰ (Kjawil uʼjit Salmo 130:4). Tqʼama salmista jlu tiʼj Jehová: «Tukʼila in knet najsbʼil qile». In kubʼ tnajsaʼn Jehová qil. ¿Tiquʼn in bʼant jlu tuʼn? «Tuʼnju kukx in tzaj qʼaqʼan tkʼuʼj» qiʼj. Ik tzeʼn el qnikʼ tiʼj toj xnaqʼtzbʼil kyaj, kukx in kubʼ tyekʼin Jehová tkʼujlabʼil kyiʼj tmajen ex mlayx che kyaj tkolin. A jlu in nonin tiʼj tuʼn tkubʼ tnajsaʼn kyil qeju in najtz tiʼj kyanmi (Is. 55:7). Qa kwest tuʼn t-xi tnimana qa in kubʼ tnajsaʼn Jehová tila, ximana tiʼj jlu: «¿In nokpe qeʼ nkʼuʼje tiʼj qa in kubʼ tnajsaʼn Jehová kyil kykyaqil qeju in najtz tiʼj kyanmi?». Qa ikju, «¿mintiʼpe tzaj qʼaqʼin tkʼuʼj wiʼje tej t-xi nqanine najsam te tiʼj wile?».

¹¹ In tzaj qʼuqbʼaʼn qkʼuʼj aj ttzaj tqʼamaʼn Biblia qa ojtzqiʼn tuʼn Jehová qa aj il xjal qo (Sal. 139:​1, 2). Qo yolin tiʼjju tqʼama David toj juntl salmo, aju kʼonil qiʼj tuʼn tok qeʼ qkʼuʼj tiʼj qa taj Jehová tuʼn tkubʼ tnajsaʼn qil.

BʼAʼN TUʼN TTZAJ QNAʼJ OʼKX AJU IN TZAJ TNAʼN JEHOVÁ QIʼJ

12, 13. Ik tzeʼn in tzaj tqʼamaʼn Salmo 103:​14, ¿tiʼ ojtzqiʼn tuʼn Jehová qiʼj ex tiʼ taj tuʼn tbʼant tuʼn qiʼj?

¹² (Kjawil uʼjit Salmo 103:14). Tqʼama David qa ojtzqiʼn tuʼn Jehová qa «tquqil txʼotxʼ qoʼ». Kyukʼil yol lu tqʼama qa jaku kubʼ tnajsaʼn Jehová qil qa ma tzʼajtz tiʼj qanmi tuʼnju ojtzqiʼn tuʼn qa aj il xjal qo. Qo xnaqʼtzaʼn tiʼj tiʼ mas tqʼama David toj versículo lu.

¹³ Tqʼama David qa «ojtzqiʼn tuʼn [Jehová] alkye bʼanin qoʼ tiʼj», toj juntl yol qa tquqil txʼotxʼ qo. Kubʼ tbʼinchaʼn Jehová Adán tiʼj «tquqil txʼotxʼ» tuʼntzunju ojtzqiʼn tuʼn tzeʼn bʼinchaʼn qe xjal ex tiʼ at tajbʼen kye. Noqwit mintiʼ kubʼ tbʼinchaʼn Adán il, ojtzqiʼn tuʼn Jehová qa iltoq tiʼj tuʼn kywaʼn, tuʼn kyjtan ex tuʼn kyrespirarin qe tkʼwal Adán che ul itzʼj yajxitl (Gén. 2:7). Pero tuʼnju kubʼ kybʼinchaʼn Adán ex Eva il, aju txol yol «tquqil txʼotxʼ» ax ikx jaku yolin tiʼj qa aj il xjal qo ex il tiʼj tuʼn tok tilil quʼn tkubʼ kyiʼj nya bʼaʼn quʼn. Nya oʼkx tqʼama David qa ojtzqiʼn tuʼn Jehová qa aj il xjal qo, sino ax ikx «bʼaʼn tuʼn». Aju yol hebreo ajbʼen tuʼn tkubʼ traducirit «bʼaʼn tuʼn» in tzaj tyekʼin qa ojtzqiʼn jlu tuʼn Jehová, pero ax ikx taj tuʼn tbʼant jun tiʼ tuʼn qiʼj. In tzaj tyekʼin versículo lu qa ojtzqiʼn tuʼn Jehová qa at maj in qo el txalpaj, pero qa ma tzʼajtz tiʼj qanmi kbʼel tyekʼin Jehová qʼaqʼbʼil tkʼuʼj qiʼj ex kbʼel tnajsaʼn qil (Sal. 78:​38, 39).

14. a) ¿Tiʼ in tzaj tyekʼin Salmo 103:12 qe tiʼj alkye tten in kubʼ tnajsaʼn Jehová qil? b) ¿Tiʼ xnaqʼtzbʼil jaku tzʼel qiʼn tiʼj alkye tten kubʼ tnajsaʼn Jehová til David? (Ax ikx qʼonka twitza tiʼj recuadro «In kubʼ tnajsaʼn Jehová qil ex in nikʼ tnaʼl tuʼn»).

¹⁴ ¿Tiʼ mas in tzaj t-xnaqʼtzaʼn Salmo 103 qe tiʼj alkye tten in kubʼ tnajsaʼn Jehová qil? (Kjawil uʼjit Salmo 103:12). Tqʼama David qa aj tkubʼ tnajsaʼn Jehová qil in kubʼ tqʼoʼn najchaq, «ik tzaʼn tjawitz qʼij ex telex qʼij najchaq kyxol». ¿Tiʼ t-xilen jlu? Qa aj tkubʼ tnajsaʼn Jehová qil in xi tiʼn najchaq, in nikʼ tnaʼl tuʼn ex mlayx che tzaj tnaʼn tuʼn qok tjusgarin (Ezeq. 18:​21, 22; Hech. 3:19).

15. ¿Tiʼ jaku bʼant tuʼna qa kukx in kubʼ tnaʼna nya bʼaʼn tuʼn il bʼant tuʼna ojtxe?

¹⁵ ¿Kukxpe in kubʼ tnaʼna nya bʼaʼn tuʼn il bʼant tuʼna ojtxe? Qa ikju, jaku tzʼonin Salmo 103 tiʼja tuʼn tok qeʼ tkʼuʼja tiʼj qa o kubʼ tnajsaʼn Jehová tila. Bʼaʼn tuʼn ttzaj tnaʼna qa ojtzqiʼn tuʼn Jehová qa aj il xjala. Ax ikx in kubʼ tnajsaʼn kyil qeju in najtz tiʼj kyanmi ex in bʼant chʼixpubʼil kyuʼn, ik tzeʼn o bʼant teya tuʼn. Ex bʼaʼn tuʼn ttzaj tnaʼna qa o tzikʼ tnaʼl qe tila tuʼn Jehová ex mlay che tzaj tnaʼntl. Qa ya mintiʼ in tzaj tnaʼn Jehová qe tila bʼant ojtxe, ax ikx teya ya mintiʼ tuʼn kytzaj tnaʼna (Sal. 130:3). Qa in nok qeʼ tkʼuʼja tiʼj qa o kubʼ tnajsaʼn Jehová tila, ya mintiʼ tuʼn tkubʼ tnaʼna nya bʼaʼn tiʼjju bʼant tuʼna ojtxe ex bʼaʼn tuʼn kukx tajbʼena te Jehová tukʼil tzalajbʼil.

16. ¿Tiquʼn nya bʼaʼn tuʼn kukx qximen tiʼj il bʼant quʼn ojtxe? (Ax ikx qʼonka twitza tiʼj tilbʼilal).

¹⁶ Ximana tiʼj jun techel. Akux in manejarin jun xjal tiʼj jun karro in nok tqʼoʼn twitz tiʼj retrovisor qa mintiʼ juntl in nul tiʼjxi. Jaku tzʼok tqʼoʼn twitz tiʼj espej junjun maj, pero qa kukx ma tzʼok tqʼoʼn twitz tiʼj jaku ttzaj jun aksident tiʼj, tuʼntzunju, il tiʼj tuʼn tok tqʼoʼn twitz tiʼj tbʼe. Chʼixme ax jlu in bʼaj qiʼj, at maj bʼaʼn qa ma qo ximen tiʼj il kubʼ qbʼinchaʼn, tuʼntzun miʼn tkubʼ qbʼinchaʼn juntl maj. Pero qa kukx ma qo ximen tiʼj jlu, jaku tzaj qbʼis tuʼn ex ya mlaylo qo ajbʼen te Jehová ik tzeʼn tajbʼil. Tuʼntzunju, kukx qo ajbʼen te Jehová ex qo ximen tiʼjju o tzaj ttziyen qe toj ambʼil tzul, jatumel ni jun ktzajel tnaʼn qe tiʼchaq bʼaj ojtxe (Is. 65:17; Prov. 4:25).

¿TIʼ BʼAʼN TUʼN TOK QEʼ QKʼUʼJ TIʼJ?

17. ¿Tiquʼn bʼaʼn tuʼn tok qeʼ qkʼuʼj tiʼj qa kʼujlaʼn qo tuʼn Jehová ex qa in kubʼ tnajsaʼn qil?

¹⁷ Qkyaqilx il tiʼj tuʼn tok qeʼ qkʼuʼj tiʼj qa kʼujlaʼn qo tuʼn Jehová ex qa taj tuʼn tkubʼ tnajsaʼn qil (1 Juan 3:19). ¿Tiquʼn? Tuʼnju in nok tilil tuʼn Satanás tuʼn tkubʼ qximen qa nya kʼujlaʼn qo tuʼn Jehová ex qa mlay kubʼ tnajsaʼn qil. Ax ikx in nok tilil tuʼn tuʼn miʼn qajbʼentl te Jehová, tuʼnju ojtzqiʼn tuʼn qa nya nim ambʼil ktel (Apoc. 12:12). Pero miʼn txi qqʼoʼn ambʼil te Satanás tuʼn qkubʼ tsbʼuʼn, sino kukx qo ajbʼen te Jehová.

18. ¿Tiʼ jaku bʼant tuʼna tuʼn tok qeʼ tkʼuʼja tiʼj qa kʼujlaʼna tuʼn Jehová ex qa o kubʼ tnajsaʼn tila?

¹⁸ Toj xnaqʼtzbʼil o kyaj el qnikʼ tiʼj tiʼ jaku tzʼonin tiʼja tuʼn tok qeʼ tkʼuʼja tiʼj qa kʼujlaʼna tuʼn Jehová. Ex toj xnaqʼtzbʼil lu ma tzʼel qnikʼ tiʼj tiʼ jaku bʼant tuʼna tuʼn tok qeʼ tkʼuʼja tiʼj qa o kubʼ tnajsaʼn Jehová tila. Bʼaʼn tuʼn tel tpaʼna ambʼil tuʼn t-ximana tiʼjju in tzaj tqʼamaʼn Biblia tiʼj alkye ten in kubʼ tnajsaʼn Jehová qil. Ex ojtzqiʼn tuʼn Jehová qa aj il xjal teya ex in kubʼ tyekʼin qʼaqʼbʼil tkʼuʼj tiʼja. Aj tkubʼ tnajsaʼn Jehová qil ya mintiʼ in tzaj tnaʼntl. Qa ma bʼant tkyaqil jlu tuʼna, jaku tqʼamaya ik tzeʼn tqʼama David: «Kubʼ tnajsaʼna wile» (Sal. 32:5).