Kukx qo ajbʼen te Jehová

1, 2. ¿Tiquʼn jun tbʼanel techel aju tamiwbʼil Jonatán tukʼil David tuʼn kukx qajbʼen?

JAWLO labʼin Jonatán tiʼj kuʼxin David tuʼnju mintiʼtoq t-xobʼil. Otoq kubʼ tbʼyoʼn Goliat ex ttzaj tiʼn «twiʼ» toj tqʼabʼ tuʼn t-xi tyekʼun te ttat Jonatán, aju aj kawil Saúl te tnam Israel (1 Samuel 17:57). Qʼuqlitoq tkʼuʼj Jonatán tiʼj qa at Jehová tukʼil David, ex atxix toj ambʼil aju, xi tzyet jun tbʼanel tamiwbʼil tukʼil David. Kyaj bʼant tiʼj jun kyyol tuʼn tkubʼ kybʼinchaʼn aju bʼaʼn kyxolx te jumajx (1 Samuel 18:1-3). Akux in nanqʼintoq, kukx kubʼ tbʼinchaʼn Jonatán aju bʼaʼn te David.

² Maske a David jaw skʼoʼn tuʼn Jehová tuʼn tok te aj kawil kyibʼaj aj Israel ex nya Jonatán, kukx kubʼ tbʼinchaʼn Jonatán aju bʼaʼn te David. Ex tej in jyontoq Saúl tumel tuʼn tkubʼ tbʼyoʼn David, tzaj bʼaj tkʼuʼj Jonatán tiʼj tamiw. Ojtzqiʼntoq tuʼn qa atz in ewintoq tibʼ David toj tzqij txʼotxʼ te Hores ex xiʼ qʼuqbʼal tkʼuʼj tuʼn tok qeʼxix tkʼuʼj tiʼj Jehová. Xi tqʼamaʼn Jonatán jlu te David: «Miʼn xobʼa, porque mlay kneta tuʼn nmane Saúl. Kpol jun qʼij aya kʼokel te rey kyxol aj Israel, atzun weye chin okele te jun xjal mas maʼ toklen ttxlaja» (1 Samuel 23:16, 17).

3. a) ¿Alkyetoq mas nim toklen toj twitz Jonatán twitzju tuʼn kukx tajbʼen te David? b) ¿Tiquʼn ojtzqiʼn quʼn qa mas nimtoq toklen toj twitz Jonatán tuʼn kukx tajbʼen te Jehová? (Qʼonka twitza tiʼj tnejel tilbʼilal).

³ Chʼixme tkyaqil maj bʼaʼn in nela toj qwitz qeju xjal kukx in che ajbʼen te juntl xjal. Noqtzun tuʼnj, nya oʼkx tbʼanel in nela Jonatán toj qwitz noq tuʼnju kukx ajbʼen te David, sino tuʼnju mas nimtoq toklen toj twitz Jonatán tuʼn kukx tajbʼen te Jehová. Atzun jlu onin tiʼj Jonatán tuʼn kukx tajbʼen te David ex mintiʼ tzaj tqʼoj tiʼj. Axpe ikx, onin Jonatán tiʼj David tuʼn tok qeʼ tkʼuʼj tiʼj Jehová. Kykabʼel kukx e ajbʼen te Jehová ex kukx e ajbʼen te teyele junjun kye. Japun twiʼ kyyol tej kyqʼama jlu: «A Qman o tzʼok te testiw tiʼj, ex o txi qqanin te tuʼn tten qxol te jumajx ex tuʼn tten kymojbʼabʼl kyibʼ qe tiyjila kyukʼil qeju weye wiyjil» (1 Samuel 20:42).

4. a) ¿Alkye in tzaj qʼonte axix tok tzalajbʼil qe ex tbʼanel toj qanqʼibʼil? b) ¿Tiʼ qo xnaqʼtzal tiʼj toj xnaqʼtzbʼil lu?

⁴ Ax ikx qe qajbʼil tuʼn kukx qajbʼen kye toj qja, kye qamiw ex kye qeju qerman jatumel in nok qchmon qibʼ (1 Tesalonicenses 2:10, 11). Noqtzun tuʼnj, aju mas nim toklen twitz tkyaqil jlu, aju tuʼn kukx qajbʼen te Jehová. Tuʼnju oʼkx te in tzaj qʼonte qchwinqlal (Apocalipsis 4:11). Qa kukx in qo ajbʼen te, a jlu in tzaj qʼonte axix tok tzalajbʼil qe ex mas tbʼanel qanqʼibʼil in ten. Axpe ikx kukx qo ajbʼel te Jehová aj qok weʼ twitz nya bʼaʼn. Toj xnaqʼtzbʼil lu, qo xnaqʼtzal tiʼj alkye tten jaku tzʼonin qiʼj aju techel kyaj tqʼoʼn Jonatán tuʼntzun kukx qajbʼen te Jehová toj kyaje tten: 1) aj tkubʼ qnaʼn qa nya nim toklen tuʼn t-xi qnimen jun xjal at toklen, 2) aj tkubʼ qximen alqe kukx qo ajbʼel, 3) qa at jun erman qʼil twitz aqʼuntl in nok tbʼinchaʼn jun tiʼ nya toj tumel qiʼj ex 4) aj tkubʼ qnaʼn qa kwest tuʼn tjapun twiʼ qyol.

AJ TKUBʼ QNAʼN QA NYA NIM TOKLEN TUʼN T-XI QNIMEN JUN XJAL AT TOKLEN

5. ¿Tiquʼn kwest ela toj kywitz aj Israel tuʼn kukx kyajbʼen te Jehová akux in kawin Saúl?

⁵ Ateʼtoq Jonatán ex tnam Israel twitz jun nya bʼaʼn. Aju aj kawil Saúl, aju ttat Jonatán, ya mintiʼtoq in xi tbʼiʼn Jehová ex tuʼntzunju el ikʼun tuʼn Jehová (1 Samuel 15:17-23). Noqtzun tuʼnj, kukx xi tqʼoʼn Jehová ambʼil te Saúl tuʼn tkawin toj nim abʼqʼi. Ax ikx kwesttoq tuʼn kukx kyajbʼen aj Israel te Jehová, tuʼnju aju aj kawil otoq jaw skʼoʼn tuʼn tkubʼ «qeʼ tuj tqʼuqbʼil» Jehová in kubʼtoq tbʼinchaʼn nim nya bʼaʼn (1 Crónicas 29:23).

6. ¿Alkye tten kubʼ tyekʼun Jonatán qa kukx ajbʼen te Jehová?

⁶ Kukx ajbʼen Jonatán te Jehová. ¿Tiquʼn ojtzqiʼn quʼn? Ximana tiʼjju bʼant tuʼn tej ya mintiʼtl xi tbʼiʼn Saúl Jehová (1 Samuel 13:13, 14). Toj ambʼil aju, e pon nim kysoldad aj Filisteo tukʼil 30,000 kʼuxbʼil te qʼojbʼil tuʼn kyok tzoqpaj kyiʼj aj Israel. Atzunte Saúl oʼkx attoq 600 t-soldad ex oʼkx te tukʼil Jonatán attoq kykʼuxbʼil te qʼojbʼil. Noqtzun tuʼnj, mintiʼ tzaj xobʼ Jonatán ex tzaj tnaʼn qeju yol kyaj tqʼamaʼn t-sanjel Dios Samuel: «Atzunte Qman, mlay che kyaj koline tuʼn noq tuʼnju maʼ toklen tbʼi» (1 Samuel 12:22). Tuʼntzunju, xi tqʼamaʼn Jonatán te jun soldad qa jaku che kambʼan tuʼn Jehová «qa kyukʼil nim xjal ex qa kyukʼil nikʼxi xjal». Ex e ok tzoqpaj Jonatán tukʼilju soldad kyiʼj jun kʼloj kysoldad aj Filisteo ex e kubʼ kybʼyoʼn junlo 20 soldad. Qʼuqlitoq tkʼuʼj Jonatán tiʼj Jehová ex tzaj tkʼiwlaʼn Jehová te tuʼn jlu. Tzaj jun kyaqnajnabʼ tuʼn Jehová ex e tzaj xobʼ aj Filisteo. Akux in che qʼojintoq aj Filisteo, kubʼ kybʼyon kyibʼ kyxolx ex iktzun tten e kambʼan aj Israel tiʼj qʼoj (1 Samuel 13:5, TNM, 15, 22; 14:1, 2, 6, 14, 15, 20).

7. ¿Alkye tmod Jonatán ten tukʼil ttat?

⁷ Maske kukx kubʼ tbʼinchaʼn Saúl nya bʼaʼn twitz Jehová, atzunte Jonatán ok tilil tuʼn, tuʼn t-xi tbʼiʼn ttat qa jakutoq bʼant. Jun techel, e qʼojin junx tuʼn tklet ttnam Jehová kyuʼn (1 Samuel 31:1, 2).

8, 9. ¿Alkye tten kukx in qo ajbʼen te Jehová aj t-xi qnimen qeju at kyoklen?

⁸ Ik tzeʼn te Jonatán, kukx jaku qo ajbʼen te Jehová qa ma chex qbʼiʼn qeju aj kawil toj tnam jatumel najli qoʼ qa jaku bʼant. In xi tqʼoʼn Jehová ambʼil kye qeju «aj sanjelal te gobierni» tuʼn kykawin qibʼaj ex tajbʼil tuʼn kyxi qnimen (kjawil uʼjit Romanos 13:1, 2). Tuʼntzunju, il tiʼj tuʼn tok tilil quʼn tuʼn t-xi qnimen jun xjal at toklen tuʼn tkawin, axpe ikx qa in sbʼun ex qa in kubʼ qnaʼn qa nya nim toklen tuʼn t-xi qnimen. Ax ikx tajbʼil Jehová tuʼn kyxi qnimen kykyaqil qeju o txi tqʼoʼn Jehová kyoklen (1 Corintios 11:3; Hebreos 13:17).

⁹ At jun ermana te tnam Sudamérica aju Olga tbʼi, kubʼ tyekʼun qa kukx ajbʼen te Jehová tej nimen te tchmil^[1] (tqanil jun). In noktoq tbʼinchaʼn tchmil nya bʼaʼn tiʼj. At maj mintiʼtoq in xi yolin tchmil Olga te moqa in xitoq tqʼamaʼn junjun yol nya bʼaʼn te noq tuʼnju testigo de Jehová. Axpe ikx xi tqʼamaʼn te Olga qa oktoq kjel ttzaqpiʼn ex qa oktoq che xel tiʼn tkʼwaʼl tukʼil. Atzun te Olga kukx nimen te tchmil ex mintiʼ aj tqʼoʼn «t-xel mya bʼaʼn», sino ok te jun tbʼanel xuʼjilbʼaj. In kubʼtoq tbʼinchaʼn twa tchmil, in bʼajtoq ttxʼajoʼn t-xbʼalun ex in noktoq t-xqʼuqin qe toj tja (Romanos 12:17). Ex qa attoq ambʼil tiʼj aj t-xi tchmil visitaril qe toj tja ex qe tamiw in xiʼtoq tukʼil. Jun techel, tej tkyim ttat tchmil Olga toj juntl tnam, kubʼ tbʼinchaʼn Olga tkyaqilju kʼajbʼeltoq kye toj bʼe tuʼntzun kyxiʼ tiʼj kyimni. Akux attoq tchmil ttxlaj ttat aju otoq kyim, yon Olga tiʼj tchmil tiʼjxi iglesia. Tej tikʼ nim abʼqʼi, kubʼ tyekʼun tchmil Olga tbʼanel tmod tukʼil tuʼnju ten nim tpasens ex kukx nimen te tchmil. Toj ambʼil jaʼlo in xi tqʼamaʼn tchmil te tuʼn t-xiʼ kyoj chmabʼil ex in xiʼ wabʼilte kyoj chmabʼil. Axpe ikx, at junjun maj in kyaj ten tukʼil toj chmabʼil (1 Pedro 3:1).

AJ TKUBʼ QXIMEN ALQE KUKX TUʼN QAJBʼEN

10. ¿Tzeʼn el tnikʼ Jonatán tiʼj alqetoq tuʼn tajbʼen?

¹⁰ Tej tqʼama Saúl qa in jyontoq tumel tuʼn tkubʼ tbʼiyoʼn David, ok weʼ Jonatán twitz jun nya bʼaʼn. Tajbʼiltoq Jonatán tuʼn kukx tajbʼen te ttat, noqtzun tuʼnj, ax ikx tajbʼiltoq tuʼn kukx tajbʼen te David. Ojtzqiʼntoq tuʼn Jonatán qa attoq Jehová tukʼil David ex nya tukʼil Saúl, tuʼntzunju, jaw tjyoʼn tuʼn tajbʼen te David. Xi tqʼamaʼn te David tuʼn t-xi tewin tibʼ ex xi tqʼamaʼn te Saúl tuʼn miʼn tkubʼ tbʼyoʼn David (kjawil uʼjit 1 Samuel 19:1-6).

11, 12. ¿Alkye tten in nonin qiʼj aju qkʼujlabʼil tiʼj Jehová tuʼn tkubʼ qximen tuʼn kukx qajbʼen te?

¹¹ At jun ermana te tnam Australia aju Alice tbʼi, kubʼ t-ximen alqe tuʼn tajbʼen. Tej in xnaqʼtzantoq tiʼj Tyol Dios, xi tqʼamaʼn aju in neltoq tnikʼ tiʼj kye toj tja. Ax ikx xi tqʼamaʼn kye qa ya mlaytoq kubʼ tikʼsaʼn aju Navidad ex xi tchikʼbʼaʼn kye tiquʼn. Tnejel tzaj nim kybʼis qe toj tja Alice tiʼj, yajxitl tzaj nim kyqʼoj tiʼj. Kubʼ kynaʼn toj tja Alice qa ya mintiʼtoq tkʼujlabʼil kyiʼj. Xitzun tqʼamaʼn ttxuʼ te qa ya nyatoq tajbʼil tuʼn tok tqʼoʼn twitz tiʼj Alice juntl maj. Tqʼama Alice jlu: «Tzaj bʼajxix nkʼuʼje tuʼn jlu ex tzaj nbʼise tuʼn, tuʼnju kʼujlaʼnqetoq toj njaye wuʼne. Noqtzun tuʼnj, kubʼ nximane qa a Jehová ex Jesús iltoq tiʼj tuʼn tok nkʼujlaʼne, ex tej tok juntl nimaq chmabʼil jaw aʼ nwiʼye, moqa in bʼyane» (Mateo 10:37).

¹² Qa kʼujlaʼn Jehová quʼn, kukx qo ajbʼel te twitz alkyexku juntl tiʼ, ik tzeʼn tuʼn qten toj jun saqchbʼil, toj jun tja xnaqʼtzbʼil, moqa tuʼn tok qqʼoʼn mas nim toklen aju tnam jatumel in qo anqʼin. Jun techel, tgantoq Henry tuʼn t-saqchan tiʼj ajedrez kyukʼil qeju tukʼil toj tja xnaqʼtzbʼil ex tajbʼiltoq tuʼn tkambʼan tiʼj jun saqchbʼil toj tja xnaqʼtzbʼil. Tuʼnju in saqchantoq Henry tkyaqil maj aj tkubʼ bʼaj junjun seman, mintiʼtoq ambʼil tiʼj tuʼn tex pakbʼal moqa tuʼn t-xiʼ kyoj chmabʼil. Tqʼama Henry qa otoq tzʼok tqʼoʼn mas nim toklen aju tuʼn tajbʼen toj tja xnaqʼtzbʼil twitzju tuʼn kukx tajbʼen te Jehová. Tuʼntzunju, kubʼ t-ximen tuʼn miʼntl t-saqchan tiʼjju ajedrez toj tja xnaqʼtzbʼil (Mateo 6:33).

13. Qa kukx in qo ajbʼen te Jehová, ¿alkye tten jaku tzʼonin qiʼj tuʼn qex kywitz nya bʼaʼn in che tzaj kyukʼil qe toj qja?

¹³ At maj kwest tuʼn qajbʼen kye toj qja toj junx ambʼil. Jun techel, in tzaj tqʼamaʼn ermano Ken tbʼi jlu: «Wajtoqe tuʼn kukx nxiʼye visitarilte ntxuʼye aju otoq tijen ex kyoj junjuntl maj tuʼn tkyaj ten qukʼile. Noqtzun tuʼnj, mintiʼtoq jun tbʼanel at kyxol ntxuʼye tukʼil nxuʼjile. Mlaytoq bʼant tuʼn ttzalaj jun wuʼne ex tuʼn miʼn ttzaj tqʼoj juntl». Kubʼtzun ten Ken ximel tiʼjju in tzaj tqʼamaʼn Tyol Dios tiʼj jlu ex eltzun tnikʼ tiʼj qa mas nim toklen tuʼn ttzalaj t-xuʼjil tuʼn ex tuʼn kukx tajbʼen te. Tuʼntzunju, kanet jun tumel tuʼn, tuʼn ttzalaj t-xuʼjil. Yajxitl, xi tqʼamaʼn te t-xuʼjil tiquʼn nim toklen tuʼn tkubʼ tyekʼun tbʼanel tmod tukʼil ttxuʼ. Ax ikx xi tqʼamaʼn te ttxuʼ tiquʼn bʼaʼn tuʼn tok tqʼoʼn toklen t-xuʼjil (kjawil uʼjit Génesis 2:24; 1 Corintios 13:4, 5).

AJ TOK TBʼINCHAʼN JUN ERMAN JUN TIʼ NYA TOJ TUMEL QIʼJ

14. ¿Alkye tmod Saúl ten tukʼil Jonatán?

¹⁴ Ax ikx kukx jaku qo ajbʼen te Jehová qa at jun erman qʼil twitz aqʼuntl in nok tbʼinchaʼn jun tiʼ nya toj tumel qiʼj. Otoq jaw skʼoʼn Saúl tuʼn Jehová, noqtzun tuʼnj, ok tbʼinchaʼn nya bʼaʼn tiʼj tkʼwaʼl. Mintiʼ el tnikʼ tiʼj tiquʼn ok tkʼujlaʼn Jonatán te David. Ex tej tonin Jonatán tiʼj David, tzaj nim tqʼoj Saúl tiʼj Jonatán ex kubʼ tqʼoʼn tchʼixwi Jonatán kywitz nim xjal. Atzunte Jonatán kukx xi tnimen ttat. Tojx ambʼil aju, kukx ajbʼen Jonatán te Jehová ex te David, aju otoq jaw t-skʼoʼn Jehová tuʼn tok te aj kawil toj tnam Israel (1 Samuel 20:30-41).

15. Qa ma tzʼok tbʼinchaʼn jun erman jun tiʼ nya toj tumel qiʼj, ¿tiʼ kbʼantel quʼn?

¹⁵ Toj ambʼil jaʼlo, aʼyeju erman qʼil twitz aqʼuntl toj Ja te Chmabʼil in nok tilil kyuʼn tuʼn tten jun tbʼanel kymod kyukʼil kykyaqil. Noqtzun tuʼnj, nya tzʼaqli qe. Tuʼntzunju, atlo maj mlay tzʼel kynikʼ tiʼj tiquʼn in kubʼ qbʼinchaʼn junjun tiʼchaq (1 Samuel 1:13-17). Qa at maj in nok kybʼinchaʼn ju tiʼ nya toj tumel qiʼj, tzʼok tilel quʼn tuʼn kukx qajbʼen te Jehová.

AJ TKUBʼ QNAʼN QA KWEST TUʼN TJAPUN TWIʼ QYOL

16. ¿Toj alkye ambʼil kukx qo ajbʼel te Jehová ex nya oʼkx tuʼn qximen qiʼjx?

¹⁶ Tajbʼiltoq Saúl tuʼn tok Jonatán te aj kawil ex nya David (1 Samuel 20:31). Noqtzun tuʼnj, kʼujlaʼntoq Jehová tuʼn Jonatán ex kukx ajbʼen te. Mintiʼ el tikʼun Jonatán David, sino ok te jun tbʼanel tamiw David ex japun twiʼ tyol aju kyaj bʼant tiʼj tukʼil David. In tzaj tqʼamaʼn Xjan Uʼj qa aqeju xjal kukx in che ajbʼen te Jehová ex qa kʼujlaʼn kyuʼn, in japun twiʼ kyyol «maske mya bʼaʼn ma tzʼela» kye (Salmo 15:4). Tuʼntzunju, qa qajbʼil tuʼn kukx qajbʼen te Jehová, il tiʼj tuʼn tjapun twiʼ qyol. Jun techel, qa ma kyaj bʼant tiʼj jun yol quʼn tiʼj jun kʼaẍjel, il tiʼj tuʼn tjapun twiʼ qyol, axpe ikx qa kwest tuʼn tjapun quʼn. Ex qa ma tzaj junjun nya bʼaʼn toj qmejebʼleʼn, kbʼel qyekʼun qa kʼujlaʼn Jehová quʼn qa kukx ma qo ten tukʼil qxuʼjil moqa qchmil (kjawil uʼjit Malaquías 2:13-16).

17. ¿Alkye tten ma tzʼonin xnaqʼtzbʼil lu tiʼja?

¹⁷ Qajbʼil tuʼn kukx qajbʼen te Jehová aj qok weʼ twitz nya bʼaʼn ik tzeʼn te Jonatán. Ax ikx kukx jaku qo ajbʼen kye qerman aj ttzaj qbʼis kyuʼn. Iktzun tten ktzalajel Jehová quʼn ex tuʼn jlu mas qo tzalajel (Proverbios 27:11). Jaku tzʼok qeʼ qkʼuʼj tiʼj qa kʼokel t-xqʼuqin Jehová qe. Toj juntl xnaqʼtzbʼil, kʼelel qnikʼ tiʼj tiʼ jaku tzʼel qkanoʼn kyiʼj junjun xjal kukx e ajbʼen te Jehová toj ambʼil tej tten David ex kyiʼj junjuntl nya kukx e ajbʼen te Jehová.