In qo ok laqʼeʼ ttxlaj Dios kyuʼn bʼitz

Jun tbʼanel oyaj qe bʼitz tuʼn Jehová. Jaku che onin qiʼj tuʼn kyten tbʼanel qximbʼetz, tuʼn qtzalaj ex tuʼn tten qgan tuʼn t-xi qbʼinchaʼn jun tiʼ. Atzun jlu in kubʼ qnaʼn aj in che ok qbʼiʼn bʼitz, ik tzeʼn qeju in che etz toj JW Broadcasting®. Ex in che onin qiʼj tuʼn qok laqʼeʼ ttxlaj Jehová.

Atxix toj 2014 tzaj tzyet tuʼn kyetz bʼitz ex jaʼlo at mas te 70. Jun kyxol qe jlu, at toj mas te 500 yol. Bʼalo jaku kubʼ t-xjelina: «¿Tzeʼn in che bʼant qe bʼitz lu ex alkye in kubʼ bʼinchan kye?».

Aju aqʼuntl mintiʼ in nok qqʼoʼn qwitz tiʼj

A kʼloj erman in che aqʼunan tiʼj música te Kʼloj onil tiʼj Audio ex Video in che bʼinchan kyiʼj bʼitz in che etz toj JW Broadcasting ex junjuntl. Ex in nok tkeʼyin Kʼloj Ximel Xnaqʼtzbʼil te Kʼloj Xjal Qʼil Twitz Aqʼuntl aju aqʼuntl in bʼant kyuʼn. At 13 kybʼet erman in che aqʼunan tiʼj música, in bʼaj kynukʼun aqʼuntl tzeʼn tuʼn tetz tqʼajqʼajel bʼitz, tuʼn tbʼant letra ex junjuntl tiʼ tuʼn tbʼant. Ax ikx, o txi tqʼoʼn Kʼloj Ximel Xnaqʼtzbʼil ambʼil kye junjun erman twitz tkyaqil Txʼotxʼ tuʼn kyonin tiʼj aqʼuntl lu atz kyja. Kyxol jlu, ateʼ junjun in che bʼinchan tiʼj letra, in che bʼinchan tiʼj tqʼajqʼajel bʼitz ex junjuntl in che bʼitzin. Mintiʼ in najbʼen kyojtzqibʼil erman lu noq tuʼn kyjaw nimsaʼn kyuʼn txqantl, sino in kubʼ kyin kyibʼ.

¿Tzeʼn in che bʼant qe bʼitz? Tnejel, in jaw tjyoʼn Kʼloj Ximel Xnaqʼtzbʼil alkyeqe taqikʼ Tyol Dios che ajbʼel toj bʼitz ex tiʼ kbʼel kynaʼn erman tuʼn. Yajxitl, in kubʼ t-ximen kʼloj erman in che aqʼunan tiʼj música alkye kbʼel bʼinchante tqʼajqʼajel bʼitz ex letra. Ex in kubʼ grabarit jun bʼitz te yekʼbʼil tuʼntzun tok tqʼoʼn Kʼloj Ximel Xnaqʼtzbʼil twitz tiʼj ex tuʼn ttzaj tqʼamaʼn tiʼ junjuntl tiʼ tuʼn t-xi bʼinchet. Yajxitl, in bʼaj tbʼinchaʼn kʼloj erman in che aqʼunan tiʼj música chʼintl bʼitz ex in kubʼ kygrabarin tuʼntzun tetz. In che kubʼ grabarin bʼitz kyoj junxichaq lugar, ik tzeʼn kyoj sucursal ex kyoj junjuntl ja.

Tuʼn kybʼant bʼitz ex tuʼn kykubʼ grabarit, in najbʼen junxichaq programa toj computadora kyuʼn erman. Ex in che ajbʼen qe instrumento musical, qe mezcladoras de sonido, qe amplificadores, qe altavoces ex qe micrófono. Teyele junjun micrófono, bʼalo 100 moqa mas te 1,000 dólar twiʼ. Toj abʼqʼi 2020, xi gastarit 116,000 dólar kyiʼj tiʼchaq in che ajbʼen tiʼj grabación.

¿Tiʼ in bʼant tuʼn miʼn t-xi najset nim pwaq? Oʼkx junjun erman in che aqʼunan tiʼj música toj Betel, tuʼntzunju in xi qanit onbʼil kye junjuntl erman tuʼn kyaqʼunan atz kyja. Ax ikx, mintiʼ in nok kychmon kyibʼ jun kʼloj erman tuʼn tkubʼ grabarit música, sino in najbʼen música digital kyuʼn.

«In che onin tuʼn tchʼiy qʼuqbʼil nkʼuʼje»

Kygan erman tuʼn tok kybʼiʼn qe bʼitz. Jun techel, in tzaj tqʼamaʼn Tara jlu, te tnam Alemania: «Qa ma tzaj bʼaj nkʼuʼje, in chewix wanmiye kyuʼn bʼitz. Aj kyok nbʼiʼne toj nyole, in kubʼ nnaʼne qa in chinx chleʼne tuʼn Jehová». In tzaj tqʼamaʼn Dimitri jlu, aju in nanqʼin Kazajistán: «Ngane tuʼn kyok nbʼiʼne bʼitz ex mintiʼ in tzaj bʼaj nkʼuʼje tiʼ kʼeletz qʼamaʼn kyoj tuʼnju ojtzqiʼn wuʼne qa atz toj Tyol Dios in che jatz. Ex in che onin wiʼje tuʼn tok nqʼoʼn nwiʼye tiʼj wajbʼebʼile te Jehová».

In tzaj tchikʼbʼaʼn Delia te Sudáfrica qe tiʼ in kubʼ tnaʼn kyuʼn bʼitz: «In che onin tuʼn tchʼiy qʼuqbʼil nkʼuʼje. Aj ttzaj nbʼise moqa aj wok weʼye twitz jun nya bʼaʼn, in netz jun bʼitz aju in nonin wiʼje. At maj, oʼkx aj tok nbʼiʼne música ya in kubʼ nnaʼne bʼaʼn».

Ateʼ nim erman mas kygan junjun bʼitz kyxol qe lu. Tqʼama Lerato te tnam Sudáfrica jlu: «In che onin bʼitz Nqayin taʼ qʼij ex Aju Tbʼanel Najbʼil tzul tuʼn nximane tiʼj ambʼil aj tjaw anqʼin ntxuʼye. Aj kyok nbʼiʼne bʼitz lu, in kubʼ nnaʼne qa kyjaʼ ttzaj chlel weye».

Onin jun bʼitz tiʼj jun txin te Sri Lanka. In tzaj tqʼamaʼn jlu: «Tzaj tqʼamaʼn maestra in qʼon xnaqʼtzbʼil tiʼj Ciencias nim nya bʼaʼn yol weye kywitz txqantl kʼwal tuʼnju testigo de Jehová qine. Nim in tzaj xobʼe ex mintiʼ bʼant tuʼn t-xi nqʼamaʼne jun tiʼ. Tej npone njaʼye, tzaj tqʼamaʼn ntxuʼye weye tuʼn tok nbʼiʼne bʼitz Fuerte tú serás. Onin bʼitz lu wiʼje tuʼn tel nnikʼe tiʼj qa iltoq tiʼj tuʼn t-xi njyoʼne mas tqanil tuʼntzun t-xi nqʼoʼne jun tbʼanel tzaqʼwebʼil. Toj juntl qʼij, in yoline tukʼil maestra. In nok bʼiʼne tuʼn ex tqʼama qa el tnikʼ tiʼjju nimen wuʼne. In xi nqʼoʼne chjonte te Jehová tuʼnju in che etz tbʼanel bʼitz tuʼn ttnam».

¿Jatumel in tzaj pwaq tuʼn kybʼant qe bʼitz lu? In che bʼant tuʼn onbʼil in tzaj kyqʼoʼne tiʼj aqʼuntl in bʼant twitz tkyaqil Txʼotxʼ toj junxichaq tten toj donate.jw.org. Chjontexix kyeye tuʼn onbʼil in tzaj kyqʼoʼne.