Qqʼonk tilil tuʼn tbʼant-xix qpakbʼan: qqʼonkj aju uʼj in tzaj t-xnaqʼtzaʼnxix

¿Tiquʼn nim toklen? Aju uʼj ¿Tiʼ in tzaj t-xnaqʼtzaʼnxix Tyol Dios? mas in najbʼen quʼn toj qpakbʼabʼil. Ex tuʼn tajbʼenxix uʼj lu quʼn tuʼn t-xi qqʼoʼn xnaqʼtzbʼil, tnejel il tiʼj tuʼn tkyaj qqʼoʼn kye xjal. Tuʼntzunju, bʼaʼn tuʼn tok tilil quʼn tuʼn tkyaj qqʼoʼn toj pakbʼabʼil (Prov. 22:29). At nim tumel tuʼn tkyaj qqʼoʼn, kyjuʼtzun jaku jaw qjyoʼn alkye mas bʼaʼn tuʼn tbʼant atz jatumel in qo pakbʼan.

¿Tzeʼn jaku bʼant?

Qaninxa jun xjel te xjal tuʼn ttzaj tajbʼil tiʼj jun xnaqʼtzbʼil toj uʼj. Jaku jaw tjyoʼna jun kyxol qeju xjel ateʼku twiʼ teyele junjun xnaqʼtzbʼil. Aj tbʼaj tbʼiʼna tzaqʼwebʼil tzul tqʼoʼn xjal, jaku txi tuʼjina jun taqikʼ Tyol Dios ex, toj chʼinx ambʼil, jaku kubʼ kyxnaqʼtzaʼne jun taqikʼ tkuʼx toj uʼj aju in yolin tiʼjju in che yoline tiʼj.
Juntl tumel, aju qa ma che ajbʼen qe tnejel t-xaq uʼj tuʼna tuʼn t-xi tyekʼuna te xjal tuʼntzun tel bʼaʼn xnaqʼtzbʼil toj twitz, ex jaku txi tyekʼuna te xjal aju in tzaj tqʼamaʼn Tyol Dios tiʼj xnaqʼtzbʼil lu. Jun techel, aj tbʼaj yolina tiʼj jun nya bʼaʼn tqanil in che yolin xjal tiʼj, jaku txi tqʼamaʼna qa at nim xjal in che ximen kyiʼj xjel ik tzeʼn tkuʼx toj t-xaq 3. Moqa jaku txi tqʼamaʼna qa in che visitarine tuʼn kyyoline kyukʼe xjal tiʼj jun tbʼanel kbʼajel toj ambʼil tzul. Jaku txi tyekʼuna qe tilbʼilal ateʼ toj t-xaq 4 ex 5, ex jaku txi tqanina jlu te: «¿Alkye kyxol jlu tajbʼila tuʼn tjapun?». Juntl tumel, aju qa ma txi tqʼamaʼna te xjal qa in visitarina chʼin tuʼn kyyoline tiʼj junjun xjel aju qkyaqilx in qo ximen tiʼj. Yekʼunxa qeju xjel te aju tkuʼx aj tkupin bʼaj t-xaq 6 ex qaninxa te alkye jun kyxol jlu taj tuʼn tel tnikʼ tiʼj.
Qʼonka tilil tuʼn bʼiʼx t-xi tzyet xnaqʼtzbʼil tuʼna tukʼil xjal. Jaku txi tqʼamaʼna jlu: «In kyaj qqʼoʼne uʼj lu kye xjal tuʼn t-xnaqʼtzet Tyol Dios. ¿O tzʼok tqʼoʼnxi twitza tiʼj uʼj lu? [Qʼonxa ambʼil te xjal tuʼn ttzaj ttzaqʼweʼn.] Qa at chʼin ambʼil tiʼja, wajbʼile tuʼn t-xi nyekʼune teya alkye tten jaku tzʼajbʼen uʼj lu tuʼna tuʼn t-xnaqʼtzana tiʼj Tyol Dios».

Qʼonka tilil tuʼn tbʼant jlu tuʼna toj jun xjaw

Toj ambʼil in xi kyqʼoʼne kyukʼil toj kyjaye te Jehová, ax ikx bʼaʼn tuʼn tel kypaʼne ambʼil tuʼn kyxnaqʼtzaʼne tiʼj junjun tten tuʼn tkyaj kyqʼoʼne uʼj lu.
Aj tpakbʼana tukʼil juntl pakbʼal, qʼamanxa te aju tumel ma bʼaj t-ximana tuʼn tkyaj tqʼoʼna uʼj (Prov. 27:17). Qa nyaxix bʼaʼn jlu, bʼaʼn tuʼn tkubʼ tchʼexpuʼna.