KYXJEL KUʼXUN

¿Ilpe tiʼj tuʼn wok ojtzqiʼne kyoj redes sociales?

Tqʼama jun txin jlu aju Elaine tbʼi: «Tej tok nkeʼyine qa nim kyseguidor wukʼile toj escuela, kubʼ nximane jlu: ‹Guau, ojtzqiʼn kywitz kyuʼn nim xjal›. Wajtoqe tuʼn tbʼaj axju wiʼje».

¿Ope kubʼ tnaʼna jlu? Qa ikju, kʼonil xnaqʼtzbʼil lu tiʼja tuʼn miʼn ttzaj tbʼisa qa nya ojtzqiʼn twitza kyuʼn xjal kyoj redes sociales.

¿Alkyeqe nya bʼaʼn jaku che tzaj?

In tzaj tqʼamaʼn Tyol Dios jlu toj Proverbios 22:1: «Mas bʼaʼn qa in yolinjtz bʼaʼn tiʼj jun xjal twitzju tuʼn tten tqʼinumabʼl». Tuʼntzunju, bʼaʼn qa in kubʼ t-ximana tuʼn tyolinjtz bʼaʼn tiʼja ex tuʼn ttena bʼaʼn kyukʼil txqantl.

Pero atlo maj taja tuʼn tok ojtzqiʼn twitza kyuʼn txqantl ex jaku tzaj tbʼisa qa mintiʼ ma bʼaj jlu. ¿Tiʼ jaku tzaj tuʼn jlu? In tzaj tqʼamaʼn Onya jlu, jun txin te 16 abʼqʼi:

«O tzʼok nqʼoʼn nwitze tiʼj qa in bʼant junjun tiʼchaq nya toj tumel kyuʼn junjun kuʼxun ik tzeʼn tuʼn ttzaj kyxon kyibʼ toj tkabʼin nivel te escuela. In bʼant jlu kyuʼn noq tuʼn tok ojtzqiʼn kywitz kyuʼn txqantl».

At maj, in nel kygrabarin kuʼxun video kyiʼj junjun tiʼchaq peligros in bʼant kyuʼn tuʼntzun tjax kyqʼoʼn toj internet ex tuʼn kyok keʼyin kyuʼn txqantl. Jun techel, jax kyqʼoʼn junjun kuʼxun jun video jatumel in xi kykʼaʼn junjun pastilla bʼinchaʼn maj tiʼj jabón. Jaku tzaj nya bʼaʼn qiʼj tuʼn jlu. Mintiʼ tuʼn tbʼant jlu tuʼn jun xjal.

In tzaj tqʼamaʼn Tyol Dios jlu: «Miʼn kybʼinchaye jun tiʼxti tukʼil qʼoj, ex miʼn jaw kyniman kyibʼe» (Filipenses 2:3).

Ximana tiʼj jlu:

¿Nimpe toklen toj twitza tuʼn tok ojtzqiʼna kyoj redes sociales?
¿Tajpe teya tuʼn tok ojtzqiʼna kyuʼn txqantl maske ma tzaj jun yabʼil tiʼja moqa ma kyima?

Aju in tzaj kyqʼamaʼn junjuntl kuʼxun

«Qa in kubʼ t-ximana tuʼn tbʼant alkyexku tiʼ tuʼna noq tuʼn tok ojtzqiʼna kyuʼn xjal, jaku tzaj nya bʼaʼn tiʼja tuʼn. Ateʼ junjun xjal, junxitl tten che yolin, junxitl kyxbʼalun in nok kyqʼoʼn ex junxitl kymod in kubʼ kyyekʼin aj kyajbʼen redes sociales kyuʼn noq tuʼn tok ojtzqiʼn kywitz. Pero yajxitl tzul tbʼisa qa ma kubʼ tbʼinchaʼna jun nya bʼaʼn noq tuʼn tok ojtzqiʼn twitza kyuʼn txqantl» (Leana).

Kyaj tuʼn tkubʼ t-ximana qa ojtzqiʼn kywitz kyuʼn txqantl

Nya kykyaqil xjal in xi kybʼinchaʼn junjun tiʼchaq peligros noq tuʼn kyok ojtzqiʼn kyuʼn txqantl, pero ateʼ junjuntl in bʼant junjun tiʼchaq kyuʼn ik tzeʼn in tzaj tqʼamaʼn Erika te 22 abʼqʼi:

«Ateʼ junjun kuʼxun in jax kyqʼoʼn foto tiʼj tkyaqilju in bʼant kyuʼn tuʼntzun tkubʼ kyximen txqantl qa ateʼ nim kyamiw ex qa ateʼ kyukʼil toj tkyaqil ambʼil. Kyaj tuʼn tkubʼ t-ximana qa ojtzqiʼn kywitz kyuʼn nim xjal».

In tzaj tqʼamaʼn Cara, jun txin te 15 abʼqʼi, qa ateʼ junjun mintiʼ in tzaj kyqʼamaʼn ax tok aj tjax kyqʼoʼn kyfoto, tqʼama jlu:

«In jax kyqʼoʼn junjun kuʼxun jun kyfoto tuʼn tkubʼ kyximen txqantl qa ateʼ toj jun fiesta, pero atz ateʼ kyja».

Tzaj tqʼamaʼn Matthew te 22 qa bʼant chʼixmi ax jlu tuʼn:

«Jax nqʼoʼne jun foto ex xi nqʼamaʼne qa atz atine toj monte Everest maske naʼmx nxiʼye toj Asia».

In tzaj tqʼamaʼn Tyol Dios jlu: «Qajbʼile tuʼn qbʼinchanteye aju bʼaʼn tuj tkyaqil» (Hebreos 13:18).

Ximana tiʼj jlu:

¿Ope jax tqʼoʼna jun tiʼ nya ax tok kyoj redes sociales noq tuʼn tok ojtzqiʼna kyuʼn txqantl?
¿Tiʼ in tzaj kyyekʼin foto ex qe comentario in che jax tqʼoʼna kyoj redes sociales tiʼj tmoda ex tiʼjju nimen tuʼna?

Aju in tzaj kyqʼamaʼn junjuntl kuʼxun

«Ateʼ junjun in xi kybʼinchaʼn noq alkyexku tiʼ noq tuʼn ttzaj qʼoʼn nim ‹me gusta› tiʼjju in jax kyqʼoʼn kyoj redes sociales. Pero tiʼ t-xima tiʼj, ¿taja tuʼn tok ojtzqiʼna tuʼnju tzeʼn yolina, kyuʼn tiʼchaq at teya ex tuʼnju alkye t-xbʼaluna in nok tqʼoʼna? ¿Moqa taja tuʼn tok ojtzqiʼna tuʼn tbʼanel tmoda ex tuʼnju in ximana kyiʼj txqantl? Qkyaqilx qaj tuʼn kytzalaj txqantl qiʼj, pero tbʼanel qa ma bʼant kyuʼn kyiʼj tiʼchaq jaku qo tzalaj tiʼj yajxitl» (Hannah).

¿Nimpe toklen tuʼn kyten qseguidor ex tuʼn ttzaj qʼoʼn like tiʼjju in jax qpublicarin?

In kubʼ kyximen nim kuʼxun qa nim toklen tuʼn kyten nim kyseguidor ex tuʼn ttzaj qʼoʼn like tiʼjju in jax kypublicarin tuʼntzun kyok ojtzqiʼn toj internet. Tzaj tqʼamaʼn Matthew, aju ma qo yolin tiʼj, qa atzun jlu kubʼ t-ximen:

«In xitoq nqanine jlu kye txqantl: ‹¿Jteʼ tseguidora at?› Moqa ‹¿jniʼ me gusta mas o tzaj qʼoʼn tiʼj jun tiʼ o jax tpublicarina?›. Tuʼn kyten nim nseguidore, in noke te kyseguidor xjal mintiʼ ojtzqiʼn wuʼne ex wajtoqe tuʼn tbʼant ax jlu kyuʼn. Wajtoqe tuʼn wok ojtzqiʼne kyuʼn txqantl, ex mas tej tajbʼen redes sociales wuʼne».

Qe tilbʼilal: 1. In tzeʼn jun txin aj tok tkeʼyin jteʼ «me gusta» ma tzaj qʼoʼn tiʼjju ma jax tqʼoʼn kyoj redes sociales. 2. Axju txin, qʼiʼn jun laq duls tuʼn ex in xi twaʼn. 3. Ma tzaj choʼn tkʼuʼj txin tuʼn nim duls xi twaʼn. — Qa qaj tuʼn tok ojtzqiʼn qwitz kyuʼn txqantl, in nok jlu ik tzeʼn aj t-xi qwaʼn nim duls. Tnejel, jakulo qo tzalaj tiʼj, pero yajxitl jakulo tzaj tiʼn jun yabʼil qiʼj.

In tzaj tqʼamaʼn María te 25 abʼqʼi qa ateʼ junjun xjal in ten kyximbʼetz toj tumel moqa nya toj tumel kyiʼjx noq tuʼnju jteʼ kyseguidor at ex jteʼ me gusta in tzaj qʼoʼn tiʼj jun kypublicación.

«Qa ma tzʼel tiʼn jun txin tfoto ex mintiʼ ma txi kyqʼoʼn xjal nim ‹me gusta› tiʼj, jaku kubʼ t-ximen qa nya bʼaʼn keʼyin. Mintiʼ ttxolil jlu, pero ax jlu jaku kubʼ kyximen nim xjal. Tuʼn jlu, aʼyex in che xmayin kyiʼjx aj tkubʼ kyximen qa nya bʼaʼn che keʼyin».

In tzaj tqʼamaʼn Tyol Dios jlu: «Miʼn jaw qniman qibʼ. Miʼn tzʼok qikʼlen qibʼ qxolx. Miʼn tzaj tloʼch qkʼuʼj tiʼj juntl» (Gálatas 5:26).

Ximana tiʼj jlu:

¿In nokpe tcompararin tibʼa kyukʼil txqantl aj kyajbʼen redes sociales tuʼna?
¿Maspe nim toklen toj twitza tuʼn kyten nim tseguidora twitzju tuʼn kyten tamiwa in che ximen tiʼja?

Aju in tzaj kyqʼamaʼn junjuntl kuʼxun

«Qa qaj tuʼn tok ojtzqiʼn qwitz kyuʼn txqantl kyoj redes sociales, chʼixme tkyaqil maj il tiʼj tuʼn qok ik tzeʼn kye. Tuʼn jlu, oʼkx jaku tzʼok tqʼoʼn twiʼya tiʼj tiʼ in kubʼ kyximen txqantl tiʼja ex tzeʼn tuʼn kytzalaj. Tbʼanel qa ma tzʼok ojtzqiʼn qwitz kyuʼn txqantl, pero mintiʼ tuʼn tok qqʼoʼn qwiʼ oʼkx tiʼj jlu» (Joshua).

Xqʼuqink tibʼa tuʼn miʼn tjaw tnimsan tibʼa kyukʼil tyola

Ateʼ xjal mintiʼ in kubʼ kyyekʼin qa in jaw kynimsan kyibʼ tiʼjju in bʼant kyuʼn. Pero tukʼil kyyol, in nel nikʼbʼaj tiʼj qa nya ax tok jlu. Jun techel, at maj in tzaj kyqʼamaʼn jlu:

«Ma bʼaj ngane tuʼnju in tzaj kyqanin txqantl weye tuʼn kyxiʼ wiʼne toj akʼaj nkare».
«Nya ngane aj ttzaj kyqʼamaʼn txqantl weye qa ma kuʼtz walile».

Aj ttzaj tqʼamaʼn jun xjal jun tyol ik tzeʼn jlu, jakulo kubʼ t-ximen qa mintiʼ in jaw tnimsan tibʼ, pero nya ax tok jlu.

Xqʼuqink tibʼa: Chʼixme tkyaqil maj aj tbʼant jlu tuʼn jun xjal, in nel kynikʼ txqantl tiʼj tiʼ taj tuʼn tbʼant tuʼn. Pero mas in tzaj kyqʼoj xjal kyiʼj qeju ik kymod ik tzeʼn jlu, kywitz qeju in kubʼ kyyekʼin qa in jaw kynimsan kyibʼ.

Aj tjax tqʼoʼna jun teya tfoto moqa jun tyola kyoj redes sociales, xqʼuqink tibʼa tuʼn miʼn tjaw tnimsan tibʼa kyukʼil tyola. Sino mas bʼaʼn tuʼn t-xi tbʼiʼna aju consej lu in tzaj tqʼamaʼn Tyol Dios: «Mas bʼaʼn qa ma jaw nimsaʼna kyuʼn txqantl xjal, porke mya bʼaʼn tuʼn tjaw tnimsan tibʼa tuʼnxa» (Proverbios 27:2).