¿Ateʼpe xuʼj in che pakbʼan kyxol testigos de Jehová?

Ateʼqe xuʼj lu kyxol qeju in che pakbʼan tiʼj Tkawbʼil Dios ik tzeʼn kyaj tqʼamaʼn Jehová toj Salmo 68:11, jatumel in tzaj tqʼamaʼn jlu: «Nimku xuʼj e ok ten qʼmalte tqanil».

Junxitl tten kypakbʼabʼil xuʼj testigo de Jehová twitzju kypakbʼabʼil xuʼj kye junjuntl okslabʼil moqa nimbʼil. ¿Tiquʼn junxitl aju in bʼant kyuʼn?

Kyoj okslabʼil nya ax tok, in che ok xuʼj te pal ex te nejenel toj ky-iglesia. Tuʼntzunju mas in che yolin tiʼj Tyol Dios kyukʼil xjal in che pon toj ky-iglesia. Atzun kye xuʼj testigos de Jehová, mas in che yolin tiʼj Tyol Dios kyukʼil xjal nya Testigo qe, ik tzeʼn aj kypakbʼan ttziyele ja moqa jatumel ateʼ nim xjal.

Juntl tiʼ in bʼant kyuʼn xuʼj te junjuntl iglesia, in che kubʼ nej kywitz xjal ateʼ toj ky-iglesia ex in xi kyqʼoʼn xnaqʼtzbʼil kye. Atzun kye xuʼj testigos de Jehová, oʼkx in bʼant jlu kyuʼn qa mintiʼ jun xinaq o jaw aʼ twiʼ. Tuʼnju oʼkx jaku bʼant aqʼuntl lu kyuʼn ermano o txi qʼoʼn kyoklen (1 Timoteo 3:2; Santiago 3:⁠1).

Aj tyolin Tyol Dios kyiʼj qeju e kubʼ nej twitz kʼloj okslal toj ambʼil ojtxe, oʼkx in yolin kyiʼj xinaq. Ex atzun jlu xi tqʼamaʼn apóstol Pablo te juntl ansyan Tito tbʼi. Tqʼama jlu: «Kyjaʼtzun xi nmaʼne teya tuʼn tkyaja tuj txʼotxʼ Creta, [...] tuʼn tok tqʼoʼna anciano tuj junjun tnam» (Tito 1:​5). Ax ikx tqʼama qa bʼaʼn tuʼn tok «te anciano aju mintiʼ tpaltil, ex noq junx t-xuʼjil at» (Tito 1:⁠6). Chʼixme ax jlu tqʼamaʼn apóstol Pablo toj carta xi tsamaʼn te Timoteo. Xi ttzʼibʼin jlu: «Qa at jun erman taj tuʼn tok te nejenel kyxol okslal, bʼaʼn ju aqʼuntl lu qa taj tuʼn taqʼnan tiʼj. Ex aju nejenel il tiʼj tuʼn tten mintiʼ tpaltil, ex noq jun t-xuʼjil tuʼn tten. [...] Ex atwit tnabʼl tuʼn tqʼonte xnaqʼtzbʼil» (1 Timoteo 3:​1, 2).

Noqtzun tuʼnj, ¿tiquʼn oʼkx qe xinaq in xi qʼet kyoklen te ansyan toj kʼloj okslal? Ax Pablo tzaj chikʼbʼante jlu: «Porke mintiʼ in xi nqʼoʼne ambʼil kye xuʼj tuʼn kyqʼonte xnaqʼtzbʼil kye xinaq ex qa tuʼn kykawin kyibʼaj xinaq, oʼkx tuʼn kykubʼ txuleʼ. Porke ate Adán kubʼ bʼinchaʼn nej, te tibʼajxi kubʼ bʼinchaʼn Eva» (1 Timoteo 2:​12, 13). Toj juntl yol, tuʼnju kubʼ tbʼinchaʼn Dios xinaq tnejel twitz xuʼj, in tzaj tyekʼin jlu qa tajtoq Dios tuʼn t-xi tqʼoʼn toklen xinaq tuʼn tqʼon xnaqʼtzbʼil ex tuʼn tok te nejenel.

Tuʼnju a Jesús nejni kywitz tmajen Jehová, in nok tilil kyuʼn tuʼn tel kykanoʼn tiʼj. Tqʼama Lucas qa «in bʼettoq Jesús kyuj nimku tnam ex kyuj nimku aldey, in pakbʼantoq ex in xi tmaʼn tqanil bʼaʼn tiʼj tkawbʼil Dios» ¿Ex tiʼ bʼant kyuʼn t-xnaqʼtzbʼen Jesús tej t-xi tqʼamaʼn kye tuʼn tbʼant ax aqʼuntl lu kyuʼn? E «bʼet kyuj kykyaqil tal tnam, in che pakbʼan tiʼj tqanil kolbʼil» (Lucas 8:1; 9:​2-6).

Toj ambʼil jaʼlo in nok tilil kyuʼn tmajen Jehová, ik tzeʼn qe xinaq ex qe xuʼj, tuʼn kyonin tuʼn tjapun kywi yol tkuʼx toj Mateo 24:14. Tqʼama Jesús jlu: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil».