¿Tiʼ in najbʼen tuʼn Dios tuʼn ttzaj tqʼamaʼn qe ttziybʼil kye xjal?

Atxix tej kybʼant xjal tuʼn Dios, o che ajbʼen anjel ex qe profeta tuʼn tuʼntzun tyolin kyukʼil. Ax ikx, kubʼ t-ximen tuʼn tkubʼ tzʼibʼin qe tqanil tzaj tqʼamaʼn ex qe ttziybʼil. In tzaj ttziyen Dios tuʼn qtzalaj toj ambʼil tzul, noqtzun tuʼnj, jakulo kubʼ qxjelin jlu: «¿Jatumel jaku che kanet ttziybʼil quʼn?».

In kanet t-ximbʼetz quʼn toj Xjan Uʼj (2 Timoteo 3:16). ¿Tzeʼn e ajbʼen profeta tuʼn Dios tuʼn tkubʼ kytzʼibʼin tqanil? Tzaj tqʼamaʼn Dios t-ximbʼetz kye xjal tuʼntzun tkubʼ kytzʼibʼin (2 Pedro 1:21). Qo ximen tiʼj jun techel, qa ma tzʼajbʼen jun secretario tuʼn jun xjal tuʼn tkubʼ ttzʼibʼin jun tqanil, mlay txi qqʼamaʼn qa te secretario t-ximbʼetz kbʼel ttzʼibʼin, sino te xjal. Axtzun jlu bʼant tuʼn Dios, maske e ajbʼen xjal tuʼn tuʼn tkubʼ kytzʼibʼin Xjan Uʼj, te t-ximbʼetz tkuʼx toj.

JAKU KANET TYOL DIOS KYUʼN KYKYAQIL XJAL

Nim toklen tqanil tkuʼx toj Tyol Dios, tuʼntzunju taj tuʼn tjaw kyuʼjin kykyaqil xjal ex tuʼn tel kynikʼ tiʼj. Toj ambʼil jaʼlo, ma pon kanin «tqanil kolbʼil [...] te jumajx» «kye kykyaqil nasyon, ex kye kykyaqil kyiyjil xjal, ex kye kykyaqil kʼloj xjal junxilchaq kyyol, ex kye kykyaqil tnam» (Apocalipsis 14:6). Tuʼn tonbʼil Dios, o kubʼ traducirin tkyaqil moqa noq jun plaj Xjan Uʼj toj mas te oxe mil yol ex mintiʼ juntl uʼj jaku pon ik tzeʼn jlu.