Qaninxa te Dios tuʼn ttzaj kʼiwlaʼna tuʼn

O tzaj tqʼoʼn Dios jun tbʼanel oyaj qe; aju tuʼn qyolin tukʼil ex tuʼn t-xi qqʼamaʼn te tiʼ in kubʼ qnaʼn. Xi tqʼamaʼn profeta David (Daud) jlu te Dios: «Porke in tbʼiʼna aju qnaʼj Diose. Kykyaqil xjal in che ul tukʼila» (Salmo 65:2). Noqtzun tuʼnj, ¿alkye tten tuʼn qnaʼn Dios tuʼntzun qtzaj tbʼiʼn ex tuʼn qtzaj tkʼiwlaʼn?

QʼAMANXA TIʼ TKUʼX TOJ TANMIYA EX MIʼN JAW TNIMSAN TIBʼA

In tzaj tqʼamaʼn Salmo 62:8 jlu: «Che yoline tukʼil tuj naʼj Dios tuʼn tkyaqil kykʼuʼje». Aj qyolin tukʼil Dios, jaku txi qqʼamaʼn tkyaqilju tkuʼx toj qanmi te ex tkyaqilju in kubʼ qnaʼn. In nok tqʼoʼn Dios toklen qnaʼj Dios qa ma qo yolin tukʼil tuʼn tkyaqil qanmi.

TZʼAJBʼENX TBʼI DIOS TUʼNA AJ TYOLINA TUKʼIL

Maske at nim título in xi qʼamet tiʼj Dios, oʼkx jun tbʼi at. «Aqine Jehová porke atzun nbʼiye» (Isaías 42:8). Tkuʼx junlo wuq mil maj bʼibʼaj Jehová toj Xjan Uʼj. Ajbʼen tbʼi Dios kyuʼn profeta tuʼn kyxi yolin tukʼil. Tqʼama profeta Abrahán jlu: «Nman, [Jehová, TNM] chin kubʼsale twitza, miʼn jaw qʼojla wiʼje qa kukx in chin yoline» (Génesis 18:30). Ax ikx qe il tiʼj tuʼn tajbʼen tbʼi Jehová quʼn aj qyolin tukʼil.

NAʼNA DIOS TOJ YOL IN YOLINA TIʼJ

Qa ma qo naʼn Dios toj alkyexku yol, in nel tnikʼ Dios tiʼj qxim ex tiʼjju in kubʼ qnaʼn. In tzaj ttziyen Tyol jlu qe: «Mintiʼ in tkeʼyin Dios aju kyxilen xjal, noq oʼkx in tzalaj kyiʼj xjal at tchi Dios kye tuj tkyaqil nasyon, ex in kybʼinchaʼn aju tzʼaqlxix» (Hechos 10:34, 35).

Noqtzun tuʼnj, tuʼn qtzaj tkʼiwlaʼn Dios, nya oʼkx qo naʼl Dios te. Toj junjuntl xnaqʼtzbʼil kʼelel qnikʼ tiʼj tiʼ mas kbʼantel quʼn.