Chjota xi nʼio yʼai kʼoa nʼio ngʼa koankjoan i̱ Sonʼnde

TSA jngo chjota kjoaʼainrʼoeli xi nʼio ngʼa kji kʼoa tsa saʼnda bichókangi jko̱ ya ndʼiali, jósí. ¡Jmé sikji ngʼani síjin! Kisʼe jngo nichxin nga tsakatio chjota xi kʼoakoankjoan i̱ Sonʼnde. Ya Biblia kʼoatso kʼianga je xi xíjchále koan jéní ánkje xi tjío ya ngʼajmi. Tonga, jókoannile.

A faʼaitsjenli, je ánkje tsʼen Satanás tse kjoa tsakajngi. Saʼnda tsakásjaile jokisʼin nga je ánkjele Niná kʼoati tsʼen katama. Xijeki nichxin, tjínkʼa ánkje xi tosa je kinrʼoéle Satanás. Kisikatío xá xi kitsjoale Niná ya ngʼajmi. I̱ Sonʼnde jaʼai kʼoa chjota kisikʼóya yaole. A ʼyaní ánni.

Ya Biblia kʼoatso kʼianga kui nga je kiskotsenle yánchjín xi naskánakjoan i̱ Sonʼnde kʼoa koanmele nga je tsakatiokao. Kuinga i̱ jaʼaisíni kʼoa je chixankaosíni. Ya Biblia kʼoatso nga chʼaotjín jebi, nga Niná kui xá kisindani nga ya koatio ngʼajmi.

Kʼianga kisʼele ʼndílee yánchjínle ánkje je, kjaʼai koankjoan ʼndíle. Nga sʼa títjon tsakui nichxin likui tsen kjoan. Tonga kʼianga koanjchínga sayʼai sayʼai koankjoan, kʼoa satse satse nganʼio kisʼele, saʼnda nga nʼio ngʼa koankjoan.

Tsʼen koan chjota xokjoan. Kʼoa nga kʼoasi koankjoan yʼai kʼoa nga kʼoasikji nganʼio kisʼele, totaon tsabe chjota. Tsakʼénele chjota nga kʼoatisʼin tsʼen katama ngatsʼi.

Kʼianga je kʼien Enoc, tsakʼejna ijngo chjota i̱ Sonʼnde xi nda chjota koan. Noé tsakʼin. Kui kʼoakisʼin ngantsjai jmeni xi mele Niná.

Jngo nichxin kʼoakitsole Niná je Noé, nga je kichó nichxin nga sikjeson ngatsʼi chjota tsʼen. Tonga Niná kʼoasjentjai Noé kao yaniʼyale kʼoa kao cho̱. Chótsenlalee jókisʼin.