¡Tsjoa katabʼe tokuin ngantsjai xi tʼatsʼe kjoabijnachon xi sʼe i̱ Soʼnde!

Je xon jebi kui xá bitjo ni nga koasenkao li nga kataʼyai ʼyá xi kisinda Soʼnde kao ngayeje tsojmi xi tjín. Koan jin li kʼianga jé Niná xi kisinda Soʼnde, tjín le jaʼain xi tsʼe. Kʼoati i̱ kuitsoya li jmé xá kisinda ni Niná jé chjota kʼoa josʼín nga tsjoa sʼe tokuin ngantsjai xi tʼatsʼe kjoabijnachon xi sʼe i̱ Soʼnde.

Choya le kʼianga je sén xi nkjín faʼaitʼa koasenkao li nga ngisa sa nda koan jin li xi tʼatsʼe jebi. Kʼianga ngisa sa nda sikao li, tjínne li nga kʼuéxkiai je én xi faʼaitʼa Biblia xi tiya tjiótʼa ni le ngayeje sén xi faʼaitʼa. Kʼoa kʼoasʼin, ji soa kʼuéxkia kʼai je xi ndatjín xi tongi ni kinchja Niná xi i̱ faʼaitʼa Biblia kʼoa jme xi títso Niná xi tjínne le xi sʼiain kʼianga tjoe li nga kuitjoson kjoanda jebi.

Tsa me li kʼoati koan sichjain xon jebi kʼianga kuisenkoai chjota xi kjaʼai. Tsa tjín li xti koan sichjain nga kuisenkoai kʼianga katamajin le xi tʼatsʼe Niná. Tsa ya tinijchai yao li ya naxinandá jña nʼió nkjín chjota jchínga tjín xi tsín ma le bʼexkia xon, koan sichjain sén xi tjiótʼa nga kuisenkoai chjota jebi kʼianga koan jin le jña ni le xi tjínkon Niná, jméni nga kʼoati koan koasenkao si ni chjota xi tjio ndai niʼya le.

Ñaki choya ni ji̱n kʼianga kjoachotʼaya le xon jebi, kui xi skoʼai li ndia kʼianga tjoe li kjoanichikontʼain xi nʼió tse, saʼnda koan koakó lai xi kjaʼai jósʼin koatiokon ngantsjai i̱ Soʼnde.