KJOAʼMIYA 4

Nʼio tsjoa kisʼele je nʼaile kʼoa kao Jeobá

Je Jefté jé Jeobá tísíjéle nganʼio nga katabasenkao nga koaikján kao chjota kontrale — Jméni xi títsole Jefté je Jeobá

Jé tsotile tíkjoeya je Jefté nga jekichoni ya ndʼiale nga ki kjoajchán — Ninga tsín choa ñʼai koanle je tsotile Jefté kisitjoson jmeni xi kitso je pale

A ʼyaní je tsotiʼndí xosíkji faʼaitʼa ibi... Je Biblia alikui kʼoatso jotsakʼin, tonga tsoyaná nga Jefté tsakʼin nʼaile. Je Jeobá kʼoa kao je Jefté nʼio tsjoa kisatiole jmeni xi kisʼin tsoti jebi. A meli jchasai xi tʼatsʼe Jefté kao tsotile.

Nʼio nda chjota koan je Jefté. Xi ijngosani, nʼio tse nichxin kisikʼayale nga kitsoyale je tsotile xi tʼatsʼe Jeobá. Kʼoati nʼio taja koan Jefté kʼoa be josʼin koandiaale je naxinandá. Kʼoa kuinga kʼoakitsosínile chjota israelita nga je katabasentítjonle nga koaikján kao chjota kontrale.

Je Jefté jé Jeobá kisijéle nganʼio nga katabasenkao nga kuinje̱le kjoajchán. Kʼiatsa je kuinje̱le kjoajchán, kʼoakitso nga je Jeobá tsjoátʼale je chjota xi títjon kuitjo, xi skoéya kʼianga jekuichoni niʼyale. Jósʼin tsoyanile nga je Jeobá tsjoátʼale chjota xi títjon kuitjo. Kui tsoyanile nga ya kʼoéjna kʼoa ya sixá ya ndʼianajñole Jeobá tokʼia saʼndani. Je ndʼianajño kui xá kisʼejnani nga ya kichokʼétsʼoale Jeobá je chjota. A kinjele kjoajchán je Jefté. Jaon. Kʼoa kʼianga kichoni niʼyale, a ʼyaní ʼya chjotani xi títjon kitjo...

Jé tsotile. Kʼoa tojngo mani tsotile, kʼoa tjínnele sikasén nga ya katafik’ejna ya ndʼianajñole Jeobá. Ba koanle Jefté, tonga a faʼaitsjenli nga jela tsjoátʼale Jeobá je xi títjon skoéya. Je tsotile i kitso: “Tsa jekʼoatsakʼinlai Jeobá tjínneli nga si̱tjosuin”.

Nga tsakʼejna je tsotile Jefté ya ndʼianajñole Jeobá kichosíxatʼa je xtiyánchjín miyole — Je xtiyánchjín miyole tsotile Jefté xki̱ nó kichosíxatʼa

Kʼoati ba koanle tsotile Jefté nga títjon. Ánni. Kuinga kʼianga jeya kʼoéjna ya ndʼianajñole Jeobá alikui koa̱n kuixan kʼoa alikui koa̱n xti sʼe̱le. Tonga koanmele nga kisitjoson jmeni xi kitso je nʼaile. Kʼoa kʼoati koanmele nga tsjoa katasʼele Jeobá xi tʼatsʼe, kʼoa kuisa xi ngisa chjí tsabekon tikʼoajinni tsa kuixan kʼoa tsa xti sʼe̱le. Kuinga kini ya ndʼianajñole Jeobá kʼoa tondiaa yaa tsakʼejna jokjitse tsakʼejnakon.

A tsjoa kisatiole je Jeobá kʼoa kao Jefté xi tʼatsʼe tsoti jebi... Jaon, nʼio tsjoa kisatiole. Ji kʼoati koa̱n kʼoasʼiain jokisʼin tsotile Jefté. Tsa tsjoachai je Jeobá kʼoa tsa nitjosuin jme xi ʼmili, je Jeobá nʼio tsjoa sʼe̱le. Kʼoa je pali kao mali kʼoati tsjoa koa̱nle.

KʼOÉXKIALA YA BIBLIA:

Deuteronomio 6:4-6
Jueces 11:30-40
1 Corintios 7:32-34