Je tikjaʼmele Pablo nʼiojin koan

Kʼoeyanajmílale tʼatsʼe jngo ti xi tsakʼasjentjai je pastro Pablo. Je ti jebi alikui ʼyaa jotsakʼin, tokui xi ʼyaa nga tikjaʼmele koanni je Pablo. Je ti jebi nʼiojin koan. A meli kʼoaxínle jmeni xi kisʼin...

Nga kui nichxin je Pablo ndoyá tíjnaʼya ya Jerusalén. Kuinga kindoani nga tʼatsʼe Jesús kitsoyale chjota. Tsakatio kʼa chjota xi nʼio jtike koan kʼoa tsakjaoyani nga sikʼien. Chjota xokjoan mele koaikonle je ngʼajko̱le sondado kʼoa i̱ kuitsole: “Tikasáin je sondadoli kʼoa ya ngixko̱n kjoatéxoma katafikao je Pablo”. Kui xi koanmele nga ya koatiochjoale Pablo ya yandiaa kʼoa nga sikʼien kʼianga kjoaʼa.

Je tikjaʼmele Pablo kisʼejinle xi tʼatsʼe kjoa jebi. Jméni xi kisʼin. Kjoan kikʼéyanajmíle je tsinile. Kʼoa je Pablo i kitsole: “Sasa tʼinnrʼoeni je ngʼajko̱le sondado kʼoa kʼoatʼinlai ngayeje jebi”. Alikui choa ñʼai tíjna nga kʼoasʼin ti jebi, nga̱ je ngʼajko̱le sondado nʼio ʼyaxkón. A kitso kon je tikjaʼmele Pablo nga tsakjákao chjota jebi... Jaon, nʼiojin koan kʼoa tsakʼéyanajmíle ngayeje jmeni xi tjíobʼéndajin je chjota.

Je ngʼajko̱le sondado ñaki nda kinrʼoéle. Kʼianga kʼoasjentjai je Pablo xin ʼnde kisikasén, yaa kisikasén ya naxinandá xi Cesarea ʼmi. Xi ijngosani, aon sientola sondado kʼoakitsole nga katafikao, kitsole: “Kui nitje̱n jebi tangínkao”. A kitjontjai je Pablo axo yaa kisikʼien je chjotatsʼen xi jtike. Jósí ngái ji... Kitjontjainí, je chjotatsʼen xokjoan alikui jokisikao.

A kamatsjoachaní jmeni xi kaʼyaa ibi... A kaʼyaní kʼianga nʼiojin koan je tikjaʼmele Pablo. Kʼoati koa̱n nʼiojin koai̱n tsanda ji. Kjoanʼiojin machjén nga chjakoaa chjota xi tʼatsʼe Jeobá. A nʼiojin koai̱n kʼoa a tosi tonda kuinókjoani xi tʼatsʼe Jeobá... Tjínnele tosi tonda kuinókjoañá xi tʼatsʼe Jeobá. Tsa kʼoasʼiaan ngisa nkjín chjota kuitjontjai.