ʼYá chjotanijin xi testigole Jeobá maijin

Tiyoníjin jngo tjíjtsa Sonʼnde kʼoa ali tsa yajin nijngokoaijin yaonajin kao xi kjaʼaí relijión. Tsandalani ya tíjna ya Estados Unidos je oficina xi tíjnatítjonnajin, xinxin naxinandá tinijcháijin yaonajin. Jngo tjíjtsa Sonʼnde tsʼato jin miyón manijin kʼoa tsʼato 230 naxinandáyʼai kao ʼnde ʼmiyaijin Biblia. Kʼoasʼin nitjosuinjin jmeni xi kitso Jesucristo kʼianga i̱ kitso: “Je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá” (Mateo 24:14).

Tojñani tsainjin, ʼyaxkónníjin je kjoatéxoma xi tjín ya naxinandánajin, tonga alikui kjoa polítika nojinjin yaonajin. Kʼoasʼin nitjosuinjin je xi kitsole Jesucristo chjotale nga i̱ kitso: “Jon likui i̱ tsaon [sonʼndebi]”. Kuinga tsín kjoa polítika nisinnijin kʼoa nga tsín kjoajchán mangínjinnijin (Juan 15:19; 17:16). Kʼoa nga tsín kʼoanʼiaijin, kʼianga kisʼejna je Kjoajchántse xi majaoni nʼio nkjín testigole Jeobá xi ndoyá kinikatíoʼya, xi kinikiʼaon kʼoa xi saʼnda kinikʼien. Jngo xi obispo koan xi Alemania tsʼe i kitso: “Tojékjoán je testigole Jeobá xi koa̱nle kʼoakuitso nga tsín ya kitsjoanganʼiole nga tsakatéxoma chjota nazi”.

Ali tsakuijin xi tsonile tsa tsín koa̱n chja̱koaijin je chjota. Nga̱ je Jesús ali tsakuijin xi kisijéle Niná nga xin sikatío je chjotale (Juan 17:15). Kʼoatinʼiaijin josʼín ngatsʼi chjota, nixáníjin, mangínkindaníjin tsojmi kʼoa mangínníjin skuela.