Xo̱n xi síkasénná Cuerpo Gobernante
Jon ʼndíndsʼe kao ʼndítichja:
Nʼio tsjoa manajin nga ijngokʼa tichjingánilaijin xi tsʼato ñato miyón maño xi kixi timangíntʼalao Jeobá jngo tjíjtsa Sonʼnde. Jósʼe tokon kʼianga jngo testigole Jeobá xi xin naxinandále ʼyaxkon, a tsí kjoaixi nga ndi̱to̱n matsjoachao (Juan 13:34, 35). Kʼoakjoán tikoa̱nno kʼianga kʼoéxkiao je Anuario xi tsʼe nó 2012, jñani bʼéyanajmí josʼin tjíobakó kjoamakjainle je ndsʼee kao tichjaa xi tʼaxin naxinandá tjío kʼoa josʼin kixi tjíofitʼale Niná.
Tísʼejinnajin nga nʼio nkjín maño xi kʼoasʼin tinitjoson nga tsen tíjna jngono nichxin nga tichotʼayajtíon énle Niná ya niʼyano. Je xi xijchá ma tjíobásjaile josʼin tjíobakóyale je xtiʼndíle nga tsín katamasile kʼianga kotʼaya (Efe. 6:4). Kʼoa je xi jechixan ngisa nda tjíobatiokao xínkjín nga kʼoasʼin ñatje̱n kotʼaya Biblia (Efe. 5:28-33). Kʼoa nga kʼoasʼin tichʼasjeʼaa nichxin nga nda tichotʼayá je Énle Niná kao yaniʼyaná kʼoa ninga toñá chotʼayá nʼio nda tíbinyakaoná ngatsʼiaa (Jos. 1:8, 9).
Kʼoati aon manajin jme xi kjimatʼain xíngiaa nga kʼoasʼin kjoaxkón tísʼe nichxin xi tínroa. Kʼoa bʼailaijin kjoanda je ndsʼee kao tichjaa xi kʼoasʼin ndi̱to̱n kitsjoánganʼio ya jñani kjoaxkón kisʼe (Hech. 11:28-30; Gál. 6:9, 10). Xi ijngosani, kʼoati tjío xíngiaa xi kʼoatjíosʼín jokisʼin Dorcas, xi “kjaínga nda tjín xále”. Xíngiaa jebi kotsen jme xi machjénle xi ngikʼa ya jinjtín kʼoa tjotʼaa tsojmile nga binyakao (Hech. 9:36). Je Jeobá tíbe jmeni xi tjíosʼín kʼoa jé sichikontʼain (Mat. 6:3, 4).
Tjínkʼa naxinandáyʼai jñani nga tsín nda tjíosíchjén kjoatéxoma je chjota kʼoa tjíobʼetʼale je xá xi tinʼia, kʼoa nkjín maño xi totaon tjíobeno (Sal. 94:20-22). Tonga tjíokano kʼoa jé Jeobá tininʼiotʼao yaono nga̱ jeʼyao nga tongini kʼoakitso Jesús nga totaon skoe̱ná chjota (Juan 15:19, 20). Ntsjaintsjai bʼetsʼoantjailaijin kʼoa nijéntjailaijin nga “tiyondao ngantsjai, nga koa̱n kuixónyalao nga jngójngó xi skónangiyano xi tʼatsʼe kjoa xi tichoyalao” (1 Ped. 3:13-15).
Kʼoati matsjoanajin nga nikʼaxki̱jin je ndsʼee kao tichjaa xi tsje tjíofikao yaole jokji tífi nichxin ninga likui jyó bʼejna je Na̱i nga tíkaníbason je kjoachajngi. Kʼoa ninga kʼoasikji chʼao tjíomasʼín ndʼaibi je chjota, jon tosi tonda “[tí]sʼeno nganʼio nga tiyokao Nainá kao ngayije nganʼio xi [...] tjínle” (Efe. 6:10). “Joni tsa sondado [tiningajonñó] yaono ngayije ki̱cha̱ xi tsʼe Niná” kʼoa taja tibiyolao “kjoamañale je na̱i” (Efe. 6:11, 12). Ali nichajinjion nga kui tísíchjén Jeobá jmeni xi tinʼiao nga tíbʼéchjoaʼa je Na̱i nga kʼoasʼin tíbesin (Pro. 27:11).
Xi ijngosani, nʼio tsjoa manajin nga kʼoaʼmilaijin nga 19,374,737 chjota ki nga jaʼaitsjenya kjoabiyale Cristo. Kʼoa kuinga kʼoasikji nkjín chjota koanñani nga kʼoasʼin tsakʼenelao yaono nga precursor auxiliar koaon sá abril. Kʼoa nga kui sá 2,657,377 koan xi precursor auxiliar kisixá, kʼoa xi tsín precursor auxiliar koan kʼoati nʼio tsakʼénele yaole nga nda kisixále Jeobá. Kʼianga kʼoasikji nda kinixálao Jeobá sá jebi miyón mani chjota xi tsabe jngo tjíjtsa Sonʼnde (Rom. 10:18). Nʼio tsjoa manajin nga kʼoasʼin tiyondao nga nixáo kʼoa nga ñaki kao kjoatsjoa kʼoanʼiaño (Sal. 110:3; Col. 3:23).
Kʼoa bʼailee kjoanda je Jeobá nga je nó xi jaʼato 263,131 koan xi kisʼenngindá. Kʼoa bʼailaijin kjoanda nga tsakʼainganʼionáijin nga tsʼabíson je én xi faʼaitʼa ya Apocalipsis 22:17, jñani tso: “Je Espíritu Santo kʼoa je chjoónle Barré tso: Nroai. Kʼoa je xi nrʼoé, katatso: Nroai. Kʼoa je xi fatile, katanroa. Kʼoa je xi mele, kataʼbi nandá xi tsjoá kjoabijnachon, xi tokjoatjao”. Kʼoa mani nga jenda kichotʼayá tʼatsʼe Kjoatéxomale Niná ya kjoajtíntse xi kisationá nó 2011, ngisa tinʼio kʼoabixónngáñá: “Katjinroa kjoatéxomali”. Kʼoa tojo kitso je pastro Juan kʼianga kʼoakitsole Cristo nga kjoaʼaí ndi̱to̱n, kʼoati i̱ bixoán tsanda ñá: “Kʼoa katama [...]. Nroai, Señor Jesús” (Apo. 22:20).
ʼNdíndsʼe kao ʼndítichja, tosi tonda tje̱nyatokon tiyo kʼoa ali nichajinjion nga nʼio tsjoachalaijin nga jngó jngó, nga̱ tibakoño nga ñaki tsjoachao Jeobá (1 Juan 3:18).
Xi síkasénno xo̱n jebi jéní,
Cuerpo Gobernante xi tsʼe Testigole Jeobá