Tejaola koya kataʼyaa anni nga ʼmiyasonsíñá
Ánni nga ʼmiyasonsínilee chjota kʼoa nga estudio bʼaisínilee. A tokui nga kuinyakoaa chjota xi ndʼé tjío ni̱ma̱le nga katabe je ndiaa xi kjoabijnachon kuichokao (Mat. 7:14). Ninga kui jebi fitsʼiani xi tejao koya faʼaitʼa ibi ali tsakuijin xi ngisa títjon tíjna. Jñánile tsokʼoa.
1. Kuinga katabitjontjai chjota (Juan 17:3).
2. Kuinga fajinkoaan chjotatsʼen (Eze. 3:18, 19).
3. Kui tinitjosoán je én xi tongini kinokjoa (Mat. 24:14).
4. Bakoñá nga ñaki kixi jme xi sʼín Niná. Kʼianga ni̱kjeson je chjotatsʼen aliʼya xi kʼoakuitso tsa tsín kisʼejinkon kʼoa kuinga tsín kisikʼantjaiyani yaole (Hech. 17:30, 31; 1 Tim. 2:3, 4).
5. Tinitjosonñá je xá xi kjinená kʼianga kuinyakoaa chjota nga nda katabatio ngixko̱n Jeobá, nga̱ kao njínle Cristo koanchjíntjaini ngatsʼi (Rom. 1:14, 15).
6. Alikui ñá ni̱jéná kuenta kʼianga ni̱kjeson chjotatsʼen (Hech. 20:26, 27).
7. Kʼoati kui xi koasenkaoná nga kuitjo̱ntjailee yaoná (Eze. 3:19; Rom. 10:9, 10).
8. Bakoñá nga tsjoachaa chjota (Mat. 22:39).
9. Bakoñá nga nitjosonlee Jeobá kao Jesús (Mat. 28:19, 20).
10. Jé Niná ʼyaxkoán kʼianga ʼmiyasoán (Heb. 13:15).
11. Bakolee je Jeobá nga tsjoachaa (1 Juan 5:3).
12. Bʼainganʼioñá nga katabitjotsje jaʼaínle Jeobá (Isa. 43:10-12; Mat. 6:9, NM).
Ali tsa tokuijin xi tejao koya kaʼyaa ibi xosíkaoná nga kʼoasʼin ʼmiyasonñá. Tobʼelañá, kʼianga ʼmiyasoán ngisa matajasa kjoamakjainná kʼoa yaa tojngo nixákoaa Niná (1 Cor. 3:9). Tonga xi ngisa títjon tíjna kuiní xi mani tejao koya. Ni kjuinrʼoé kʼoa ni tsín kjuinrʼoéná chjota kʼianga ʼmiyasonlee jetibʼainganʼiolee Niná nga katabitjotsje jaʼaínle. Kʼoa je Jeobá kao kui bʼéchjoaʼani je Na̱i nga kʼoasʼin tíbesin (Pro. 27:11). Tojosísʼin tiʼyaa, nʼio nkjín koya tjínni anni nga tosi tonda kʼuínyasínilee chjota je énnda chjotse (Hech. 5:42).