Jméni xosíkaoná nga ʼmiyasonsíñá
1. Jósʼin basenkaoná je kjoatsjoacha kʼianga ʼmiyasoán.
1 Je xá xi ngisasa nʼio chjíle xi tjínná ndʼaibi kuinga ʼmiyasoán je énnda chjotse xi tʼatsʼe Chjotaxále Niná. Kʼianga kʼoanʼia xá jebi kʼoasʼin nitjosoán nga jao kjoatéxoma xi ngisasa nʼio chjíle, nga tsjoachaa koaan je Jeobá kʼoa nga tsjoachaa koaan je xíngiaa (Mar. 12:29-31). Kʼianga tjínná kjoatsjoacha kui xosíkaoná nga bʼenelee yaoná nga ʼmiyasoán (1 Juan 5:3).
2. Ánni nga kʼoati kʼia bakosíñá nga tsjoachaa je Jeobá nga ʼmiyasoán.
2 Nga tsjoachaa je Jeobá. Nʼio tsjoachaa je Jeobá kʼoa kui xosíkaoná nga nokjoantjéñá. Jela jaon jmi nó tjínle nga kʼoasʼin chʼaosʼin tísíkʼaxki̱ Niná je Na̱i (2 Cor. 4:3, 4). Kʼoa kuinga kʼoasʼin makjainsínile je chjota nga Trinidad je Niná kʼoa nga tsín mandosinle xi tʼatsaan kʼoa nga kjoañʼai síkjaʼá je chjota ya jña lʼí títi. Saʼnda tjíokʼa xi kʼoatso nga tsín Niná. Tonga ñá ñaki ndʼai mená nga katabe chjota jokjoantjínni xi tʼatsʼe Nʼainá xi tíjna ngʼajmi. Kʼianga nʼio bʼenelee yaoná nga ʼmiyasoán nʼio sasénle je Niná kʼoa chʼaosʼin nikʼéjnaa je Na̱i (Prov. 27:11; Heb. 13:15, 16).
3. Ánni nga kʼoati kʼia bakosíñá nga tsjoachaa je xíngiaa nga ʼmiyasoán.
3 Nga tsjoachaa je xíngiaa. Kʼoati bakoá nga tsjoachaa je xíngiaa kʼianga ʼmiyalee xi tʼatsʼe Niná. Je chjota nʼio machjénle nga kjuinrʼoé je énnda chjotse nichxin xi tiyoaa ndʼaibi nga̱ nʼio ñʼai kjimachon. Nʼio nkjín chjota tjín ndʼaibi “xi saʼnda tsín be jñanile je ntsja ngakixi kʼoa jñanile ntsja ngʼaskón” kʼoa yaa mangóson je chjota xi tsakatio ya Nínive nichxinle Jonás (Jon. 4:11). Kʼianga ʼmiyasoán kui ʼmiyalee chjota jósʼin nga ñaki nda koatio (Is. 48:17-19). Kʼoati jngo kjoachoya bʼejnabasenlee (Rom. 15:4). Kʼiatsa kjuinrʼoé kʼoa sitjoson jmeni xi ʼmiyalee, kuitjontjaile yaole (Rom. 10:13, 14).
4. Jméni xi tsínkʼia sichajin je Jeobá.
4 Je xti xi ndʼé ali tsa tosakʼoajin nga tsjoake xijchále, tsjoakení ngantsjai. Tikʼoasʼinni tsanda ñá, ali tsa tokʼiajin nokjoañá xi tʼatsʼe Niná je nichxin nga tjínndajinná nga mangínkʼinyasoán. Tongantsjainí nga kʼoanʼia, nga̱ nʼio tsjoachaa je Niná kʼoa kao xíngiaa. Kʼoa kuinga tsín kjoájñásínilee nga kuinókjoañá xi tʼatsʼe Niná (Hech. 5:42). Kʼiatsa kʼoasʼiaan, je Jeobá nikʼiajinla sichajin (Heb. 6:10).