A tiyondañá nga si̱kʼantjaiyajiaan josʼin ʼmiyasoán

1. Jméni xi machjén nga sʼiaan nga kʼoasʼin tíbʼantjaiya jmeni xi chon sonʼnde.

¹ Tojo tso ya 1 Corintios 7:31 jmeni xi chon sonʼnde tofaʼatoní, xi tsonile, ngotjo ngosa tíbʼantjaiyani. Kuinga machjénsíni nga sakʼoa si̱kʼantjaiyajiaan josʼin ʼmiyasoán, jme ora bakoyasoán kʼoa josʼin chjakoaa je chjota. A tiyondañá nga kʼoasʼiaan.

2. Jméni xi tjínnená sʼiaan nga kjuintjenngiaa josʼin tísíxá je jtínle Jeobá.

² Josʼin ʼmiyasoán. Je naxinandále Niná toxá sakʼoa síkʼantjaiyajinni josʼin bakóyason. Kʼianga kisikaséntítjon Jesús je chjotale nga kitsoyason kʼoakitsole nga tsín jme xijtsa kʼoa nga tsín jme tao̱n katabʼa (Mat. 10:9, 10). Mani nga be nga koa̱njticha chjotale kʼoa nga nkjínsa ʼnde koaikakóyason skan kisikʼantjaiyajin jmeni xi kitso nga títjon (Luc. 22:36). Kʼoa je naxinandále Jeobá kʼoati nkjín koya jmeni xi tísíchjén nga títsoyason jokji nga tífaʼato nichxin. Tobʼelañá, kinchja̱ya ya radio, kisichjén karro xi bocina tsatíotʼale nga kisikjinrʼoé chjota, kʼoa nkjínsa koya xi kisichjén nga kitsoyason. Nichxin xi tiyoaa ndʼaibi, nkjín ʼnde jñani tsín tsaojiaan chjota ya niʼyale. Kuinga kʼoasʼin ʼmiyasínilee chjota tojñani nga bitsomaa kʼoa tojñani nga tjín chjota. Kʼoa kʼianga jtsaojiaan chjota xi bʼajnda nichxin síxá, kʼoaʼminá nga koa̱n nga koa̱nxon kʼuínyasoán. Alikui jao tjínná nga je jtínle Jeobá kjitʼa tísíkʼantjaiya josʼin tísíxá. A kʼoasʼin timangíntjenngilee josʼin tísíxá (Ezeq. 1:20, 21).

3. Jméni xi sʼiaan nga ngisa nda kʼuínyasoán.

³ Josʼin chjakoaa je chjota. Jméni xi makjaojinle je chjota jñani bakoyasoán, a kui tʼatsʼe tao̱n, a kui tʼatsʼe yaniʼya axo kui tʼatsʼe je kjoatsʼen. Je xi koasenkaoná nga ngisa nda kuiyondaa josʼin chja̱koaa je chjota kuinga kuenta sʼiaan jmeni xi kjima ndʼaibi kʼoa jmeni xi ngisa makjaojinle (1 Cor. 9:20-23). Kʼianga jekuinchja̱ chjota, tongisa nda nga kui kʼuínyalee jmeni xi makjaojinle ʼndele nga tokʼoéjngoʼá kʼoa nga tokui chja̱kaoñá jme xi jetjínndajinná nga kʼuínyalee.

4. Ánni nga nʼio maxátíyasínile nga kjitʼa si̱kʼantjaiyajiaan josʼin ʼmiyasoán.

⁴ Jemachrianle nga kjoetʼa jmeni xi chon sonʼnde kʼoa nga kjoaʼaí je kjoañʼai xi nʼio tse. “Je nichxin [xi tíjnasa] choaní.” (1 Cor. 7:29.) Kuinga nʼio maxátíyasínile nga kjitʼa si̱kʼantjaiyajiaan josʼin ʼmiyasoán. Tokʼoasʼin nga ngisasa nkjín chjota kʼuínyalee je nichxin xi tíjnasa.