Xi sakʼoa chjonangiaa

◼ Jójekji tse tjínnele fi kjoajtín jngo xíngiaa kʼoa jójekji tse nga tsoyason kʼianga koa̱n koaisʼenngindá

Nkjín koya jmeni xi chjoéjiaan, tonga je xi ngisa chjíle kuinga mangínsʼenngindá. Tongini nga kʼoakuitso je xi chjotajchínga sʼin tjío nga jekoa̱n koaisʼenngindá jngo chjota, je xi mele koaisʼenngindá tjínnele jemachoyale jmeni xi mele Niná nga sʼin kʼoa nga jekʼoasʼin tífikao yaole jotso kjoatéxomale Niná.

Je xi mele koaisʼenngindá tjínnele nga jefintsjai kjoajtínná, nga̱ je Énle Niná kʼoatso nga koa̱nñaa ngantsjai (Heb. 10:24, 25). Kʼoati machjén nga jetsjoá énle nga satío je kjoajtín. Kʼoati nda tsa jefaʼa ya Skuela xi síchjine choʼndale Niná, ninga tsínkjoan kui jebi xi nʼio machjén nga koa̱n koaisʼenngindá.

Je xi mele koaisʼenngindá kʼoati tjínnele jekjitʼa tsoyason, nga̱ je xi chjotale Cristo ma kʼoasʼin sʼenele nga kuitsoyason kʼoa nga chjotale Cristo sikao je chjota (Mat. 24:14; 28:19, 20). Jójetjín sá nga jetsoyason jngo xíngiaa kʼianga jekoa̱n koaisʼenngindá. Kʼianga jchale nga ñaki mele kʼoasʼinntsjai je xále Niná, tjínnele nga tokʼoa jekjoatse títsoyason (Sal. 78:37). Tonga ali tsakuijin xi tsonile nga nʼio tse kjoaʼato nga jekoa̱n koaisʼenngindá, koaan ninga totjíchoa̱ sá. Kʼoa jótjín ora tjínnele sikʼasʼen nga xki̱ sá. Lijña tjítʼa jokjoantjín ora tjínnele kuitsoyason. Je xi chjotajchínga sʼin tjío kuenta sʼin kʼoa skósonnile jókji tje̱n kʼoamale nga jngó jngó xíngiaa (Luc. 21:1-4).

Kʼianga kjaonajmí je xi chjotajchínga sʼin tjío kao je xi jemele koaisʼenngindá, tjínnele kuenta sʼin nga kjaʼaí kjaʼaí sʼín nga jngó jngó chjota, kʼoa tjínnele nda skósonnile kʼiatsa jekoa̱n koaisʼenngindá. (Kʼoati tjínnele sʼin je xi siervo ministerial sʼin tjío ya jtín jñani tochoa mani je xi chjotajchínga sʼin tjío.) Je xi mele koaisʼenngindá tjínnele jetíbakó nga ñaki mele nga testigole Jeobá koa̱n, nga nʼio bechjí je kjoanda xi tjínle nga tsoyason kʼoa kao nga fi kjoajtín. Je xi chjotajchínga sʼin tjío kʼoati be nga kje kʼoatisʼin majinjinle énle Niná kʼoa nga kje kʼoatisʼin tsoyasonjin xíngiaa jebi joni tsa jngo xi jekjoatse títsoyason. Tonga tsa bele kon nga kje koa̱n koaisʼenngindájin jngo chjota, ngasin nganda kuitsoyale kao Biblia nga kʼoakuitsole jmesani xi chale kʼoa skósonnile josʼin kuinyakao.