Xo̱n xi síkasénná Cuerpo Gobernante

ʼNdíndsʼe kao ʼndítichja xi tojngo tinixálee Niná:

Nʼio tsjoa manajin nga chjilaijin nga sʼa tífitsʼia nó jebi. Nó jebi nʼio tse kjoandosin tjínle. Nga kjesa fetʼajin nó 2014 jejngo siento nó kuichomani nga tsakʼétsʼiakao je Rey Jesucristo nga tíbatéxomajinle chjota kontrale (Sal. 110:1, 2).

Kʼoa kʼianga kisʼejna sá octubre nó 2013 je Kjoajtín xi xki̱ nó sʼejna xi tsʼe Watch Tower Bible and Tract Society of Pennsylvania, je Comité xi tsʼe Traducción del Nuevo Mundo kʼiaa tsakakó je Traducción del Nuevo Mundo xi sʼa kisʼendaya ijngokʼa nga én inglés, kʼoa je Biblia jebi kui xi ngisasa nʼio ndasʼin jaʼatoya xi koa̱n kʼoexkia je chjota. Jetsʼato jankan nó tjínle nga kisichjén Jeobá je choʼndale xi kao nganʼiotsjele kiskoejinni nga tsakájnaná je Biblia jebi xi títjon kitjo (Rom. 8:15, 16). Jebi kui xi bakóná nga nʼio chjíle Biblia jebi, a tsí jaon.

Jekjoan nkjín nó nga nʼio títsjoále kjoandosin je Comité de Redacción xi tsʼe Cuerpo Gobernante nga tífaʼatoya xi kjaʼaí én je Biblia. Nichxin xi tiyoaa ndʼaibi, 121 én jetíbitjo je Traducción del Nuevo Mundo, tjín én jña jejaʼatoya ngakjijngo kʼoa tjín én jñani tosʼa choa jaʼatoya. Takolao Jeobá nga nʼio chjí ʼyatokon Biblia jebi. Nyaon nyaon tʼexkiao kʼoa tikjaʼaitsjenjion jme xi tínchja̱ni, kʼoa kʼoasʼin ngisa koa̱nchriantʼasalao je Jeobá, nga̱ tsʼení je Biblia (Sant. 4:8).

Ba manajin nga sʼejinnajin nga kjoañʼai faʼatojin je ndsʼee kʼoa ʼyaníjin nga sakʼoa ñʼai male nga tsjoa satío kon tsanda je joni tsa xi ngikʼa. Tobʼelañá, jngo ndsʼee xi ya Asia tsʼe nʼio tse kjoa jaʼatojin kao familiale. Toʼikoan kitjochʼinle je chjoónle, alikui tikoan kisikjanni. Je chjinexki likui tijme xi koan kisʼinni. Nʼio ba maná xi tʼatsʼe xíngiaa jebi. Kʼoa je ndsʼee nichxin kao nga nitje̱n síkuinda. Kʼoa je tile kao nga jao xtiyánchjínle nʼio nda choa tjíobatío nga tjíotsjoánganʼiole xijchále. Joni tsa familia jebi, jon kʼoati tíkano tojme kjoañʼai xi tibitjatojion xi tíchotʼayakaoni kjoamakjainno kʼoa koaan tsjoa kʼoao tokon (Sant. 1:2-4). Ninga ya tjínná kjoachoya ya ngʼajmi kʼoa ninga i̱ tʼanangi, je Jeobá tongini kʼoatsoná nga nichxin xi nroaján nʼio tsjoa sʼe̱ya tokoán nga kʼoasʼin tíkaná jmeni xi tibitjatojiaan ndʼaibi, nga̱ kui tsjoáná je kjoabijnachon xi tsínkʼia fetʼa (Sant. 1:12).

Je nó xi jaʼato 19,241,252 koanni je chjota xi koanña nga jaʼaitsjenya kjoabiyale Jesús. Nʼio tsjoánganʼioná nga kʼoasikji nkjín chjota ki nga kisʼejna kjoajtín jebi xi ngisasa tse kjoandosin bʼailee xi naxinandále Niná maa, nga̱ je Jeobá kao Jesucristo kitjongʼa. Kʼoati nʼio tsjoa maná kʼianga sá marzo kao abril nga nʼio kitjongʼa je Jeobá nga tsʼato jao miyón xíngiaa xi precursor auxiliar sʼin kisixá. Kʼoati tsjoa maná nga ngatsʼi xi precursor auxiliar sʼin tjíosíxá kʼianga kuichosíxatʼa je jtín je superintendente xi tsʼe circuito, koaan koai ngakjijngo kjoanokjoaya xi bʼaile je xi precursor regular sʼin tjíosíxá, tsanda likuikjoan kʼia nga sá marzo kao abril kuichosíxatʼa je jtín je superintendente. Je xi tjínle kjoachjinele Niná machoyale jokji chjíle nga ya nʼio si̱kʼayalee nichxinná nga kʼuínyasoán kʼoa kao xá xi tjínsaná xi tsʼe Niná. Kui xi koasenkaoná nga tosi tonda kʼoasʼiaan xále Niná, kʼoa likui kʼoakoa̱nle je Na̱i nga sikinroajen kjoamakjainná kʼoa nga xin ndiaa koaikaoná (1 Cor. 15:58).

Kʼoati nʼio tsjoánganʼioná nga sʼejinná kʼianga je nó xi jaʼato 277,344 chjota xi kitsjoatʼale yaole Jeobá nga kisʼenngindá, kʼoa ndʼaibi jekʼoasʼin ya tjíofiya je ndiaa xi tsʼe kjoabijnachon jotinʼia ngatsʼiaa xi choʼndale Niná maa jngo tjíjtsa Sonʼnde (Mat. 7:13, 14). Je xíngiaa jebi machjénle nganʼioná kʼianga kʼoati katamatajasa kjoamakjainle (Col. 2:7). Tosi tonda kʼoainganʼiongañálee xíngiaa nga katakaná saʼnda nga kjoetʼa jmeni xi chon sonʼnde (Mat. 24:13). Je Biblia itsoná: “Tinʼiokon xi choa tjíokon, tinyakao xi tsínle nganʼiojin, tikjaínlao ngatsʼi” (1 Tes. 5:14). Kʼoa xi ijngosani, tosi tonda kʼoétsʼoalee Niná nga kuixoán: “Katjinroa kjoatéxomali” (1 Tes. 5:17; Mat. 6:10).

Choyaníjin nga nʼio tsjoa sa̱tío tokon nga kʼoéxkiao je Anuario 2014, kʼoa ijngokʼa kʼoaʼmilaijin nga nʼio tsjoachalaijin nga jngó jngó xi kʼoasʼin tsjoachao je Jeobá.

Xi síkasénno xo̱n jebi jéní,

Cuerpo Gobernante xi tsʼe Testigole Jeobá