Si̱ngalee yaoná nga xátí kuichoaa
1. Jmé choa̱ xi bʼéjnaná je Jeobá nga tsín síkʼachxin.
1 Je Jeobá likui síkʼachxin. Tobʼelañá, kʼiakjoán tsjoále nganʼio je choʼndale kʼianga machjénle (Heb. 4:16). Kʼoati kʼiakjoan tsjoáná je Énle “nga fichó choa̱le” (Mat. 24:45). Kʼoati tjínjngo tokoán kʼianga tsín sikʼachxin je Jeobá kʼianga kjoaʼaíkao je kjoaxkónle (Hab. 2:3). Tse kjoanda tje̱nkao nga tsín síkʼachxin je Jeobá (Sal. 70:5). Tonga sakʼoaa ñʼai maná nga xátí bichoaa jñani mangián kʼoa kui kʼoamani nga nʼio tse xá tjínná kʼoa nga chjotajée ma. Ánni nga machjénsíni nga si̱ngalee yaoná nga xátí kuichoaa.
2. Ánni nga je Jeobá bitjongʼasíni kʼianga xátí bichoaa jñani mangián.
2 Nichxin fetʼa xi tiyoaa ndʼaibi, nga kʼoasʼin to yaole fini je chjota kʼoa nga tokjaʼaíngá sʼín, aliʼya xi tixátí bichóni jñani fi (2 Tim. 3:1-3). Kʼianga xátí bichoaa jñani nixá, ya kjoajtínná kʼoa tsa jñani nga koanngián, bení je chjota kʼoa jé Jeobá bitjongʼa (1 Ped. 2:12). A tsí kjoaixi nga bʼenelee yaoná nga xátí bichoaa ya tʼaxáná, tonga sakʼoaa likui xátí bichoaa nga kui kʼoanʼia xá xi tsʼe Niná. Kʼiatsa xátí bichoaa kjoajtínná, nga kjesa sʼejnajin je kjoajnda kao kjoabʼetsʼoa, bakoñá nga je tichjenngilee je Jeobá je Nʼainá xi tíjna ngʼajmi, nga̱ je ndiaandiaa kʼoasʼín ngayeje (1 Cor. 14:33, 40).
3. Ánni nga kʼoati kuenta tinʼiasíñá je xi ngikʼa kʼianga xátí bichoaa jñani mangián.
3 Kʼianga xátí bichoaa kʼoati kuenta tinʼia je xi ngikʼa (Filip. 2:3, 4). Kʼianga xátí bichoaa ya kjoajtínná, jolani kʼianga mangínkʼinyasoán, alikui je xi ngikʼa nisilee. Xi ijngosani, kʼiatsa jetojochon kuichoaa kʼoajinsʼin koa̱ntsen nga ngisa chjí ʼyaa je nichxinná tikʼoajinni tsʼe xíngiaa. Kʼianga nixátíyaa jñani mangián yaa bakoñá nga nda nitjosoán je xá xi sʼenená, kʼoa bechjí je xíngiaa nga kʼoanʼia.
4. Kʼiatsa ñʼai maná nga xátí bichoaa jñani mangián, jókoa̱n sʼiaan.
4 Kʼiatsa tojochon bichoaa jñani mangián koaan si̱kjaʼaitsjenjiaan ánni nga tojochon bichosíñá. Nda kʼoéndajiaan jmeni xi sʼiaan ánni nga ngisa nda kuitjosonsíniná jme xi kjinená (Ecl. 3:1; Filip. 1:10). Koaan si̱jélee nganʼio je Jeobá (1 Juan 5:14). Kʼianga xátí bichoaa, bakoñá nga timangíntjenngiaa nga jao kjoatéxoma xi ngisa títjon tjío, xi kʼoatso nga tsjoachaa koaan je Jeobá kʼoa kao xíngiaa (Mat. 22:37-39).