Chjénngilee je profetale Niná: Nahúm
1. Jméni xi tsoyaná je libro xi kiski Nahúm.
1 Nga toxkoa̱lesa tjío ndʼaibi je naxinandá xi Nínive tsakʼin, kui xi bakó nga je Jeobá tsjoále kjoañʼai je chjota kontrale tojo kitso je Nahúm. Ninga je xi ngisasa nʼio tsʼen, likui chókjoale xi kao je (Nah. 1:2, 6). Kʼianga chotʼayajiaan jmeni xi tongini kiski je Nahúm, tsoyaná jokoa̱n sʼiaan nga kʼuínyasoán Énle Niná.
2. Jmé én xi nda tso mangínkaolee je chjota.
2 Si̱nʼioá kon kʼoa kʼoailee kjoachoya chjota. Kʼianga bʼexkiaa libro xi tsʼe Nahúm, tsakui nichxin kʼoakuixoán nga tokui tínchja̱ni je kjoañʼai xi kichone Nínive. Naxinandá jebi nʼio ngʼakon koan, kʼoa yaa tjen tsakʼejnani je xi tsakatéxoma naxinandá Asiria (Nah. 1:1; 3:7). Tonga xi kao naxinandále Niná, nʼio kitsjoanganʼiole je én jebi. Je jaʼaínle Nahúm isʼin tsoyanile: “Xi sínʼio tokoán”. Je Nahúm kʼoakitsole je chjota judío nga jeme kjoeson naxinandá kontrale. Xi ijngosani, kʼoakitsole nga jé Jeobá xi “xjáo taja sʼin tíjna nichxin nga tjín kjoañʼai” (Nah. 1:7). Kʼoa ñá, kʼianga ʼmiyasoán kʼoati kui én xi nda tso mangínkaolee je chjota kʼoa kʼoaʼmilee nga je Jeobá katasínʼiotʼa (Nah. 1:15).
3. Joni tsa Nahúm, jósʼin koa̱n si̱chjén je choa̱ kʼianga ʼmiyasoán je Énle Niná.
3 Si̱chjén choa̱ nga koakoyaa. Je Jeobá kisiʼisenjin je kjoafaʼaitsjenle Nahúm nga kʼoakitso nga kʼoasʼin ni̱kjeson naxinandá Nínive josʼin kisikjeson chjota asirio je naxinandá Tebas (No-amón) xi nchja̱ni Egipto (Nah. 3:8-10). Kʼianga kui chja̱kaonajmíñá je chjota tʼatsʼe nga kjoetʼa jmeni xi chon sonʼnde, kʼoati kʼuínyalee je én xi tongini kinokjoa nga je Jeobá ñaki sítjoson ngayeje jmeni xi tso. Tobʼelañá, je chjota kjoajchán babilonio kao chjota medo ñatje̱n kichosíkje naxinandá Nínive nga nó 632 nga kjesa chʼajin nó 1. Kʼoa nga toxkia nʼio tsakʼa jtsí kui xokisikao nga koanje je xo̱ngá Tigris kʼoa nga kixojen choa je xjáo xi kjindai Nínive. Kʼoasʼin kinikjeson je Nínive jokjoan kitso Jeobá (Nah. 1:8; 2:6).
4. Jósʼiaan nga ñaki nda katamajinle je chjota Énle Niná.
4 Kui ni̱chjén én xi koa̱njinle chjota kʼoa xi choa ñʼai. Jmeni xi kiski Nahúm ñaki nda bʼéyanajmí, nda majinná nga bʼexkiaa kʼoa ñaki tokʼoamaná jmeni xi tso (Nah. 1:14; 3:1). Tikʼoasʼinni, kʼianga kʼuínyalee je chjota kui én ni̱chjén xi ndi̱to̱n koa̱njinle (1 Cor. 14:9). Kʼianga tosʼa chja̱kaonajmí títjoán je chjota, kʼuínyalee jmé xá kabichochonnilee. Kʼoati kuisenkoaa je xi tiʼmiyalee Biblia nga katasʼele kjoamakjain xi kao Jeobá kao je Énle kʼoa nga katamajinle josʼin basenkao jmeni xi tíkotʼaya (Rom. 10:14).
5. Jméni xi ñaki bʼéjngo tokoán jokitso je Nahúm.
5 Jmeni xi tso je libro xi kiski Nahúm kui bakóná nga kʼoatsakʼé kon nga ñaki bitjoson jmeni xi tso je Jeobá. Kʼoa nga toje tífetʼa jmeni xi chonle i̱ Sonʼnde je Na̱i, nʼio tsjoánganʼioná nga tongini i̱ kitso je Jeobá: “Alikui tisʼe̱ni je kjoañʼai” (Nah. 1:9).