Chjénngilee je profetale Niná: Habacuc
1. Ánni nga majinniná jokisʼe kon je Habacuc.
1 Kʼianga sa kjimankjín sa kjimankjín je chjotatsʼen i̱ Sonʼnde tsakui nichxin kʼoati sʼe tokoán jokisʼe kon je Habacuc, xi i̱ kitsole Jeobá: “Ánni nga bʼaiʼndesíni nga kui tiʼbe je xi chʼaotjín. Ánni nga totichotsensíni nga totaon tíʼya chjota” (Hab. 1:3; 2 Tim. 3:1, 13). Kʼiatsa si̱kjaʼaitsjenjiaan én xi kiski Habacuc kao choa̱ xi tsakʼéjna nga kixi kitʼale Niná, koasenkaoná nga ska̱ná saʼnda nga kjoaʼaí je nichxin nga sijé kuenta Jeobá (2 Ped. 3:7).
2. Jósʼin chjénngilee je Habacuc nga kixi koan.
2 Kixi kjuintʼalee Niná. Je Habacuc, ʼndele nga sikinroajen kon, tosa tjenyatokon tsakʼejna kʼoa tosi tonda kisixále Niná (Hab. 2:1). Je Jeobá kʼoakitsole nga kjoanʼio kuitjoson je énle kʼianga kuicho choa̱le kʼoa nga je xi kixi koa̱n sʼeele kjoabijnachon (Hab. 2:2-4). Jmé xi bakóyaná jebi xi chjotale Cristo maa, xi jenichxin fikjetʼa tiyoaa. Nga kui xi ngisa chjíle nga kʼoakʼoé tokoán nga kjoaʼaí je kjoafetʼa, ʼndele nga kui jchaa kʼiáni kjoaʼaí. Kui kjoamakjainná xi koasenkaoná nga tjenyatokon kuiyoaa kʼoa nga kui títjon si̱kʼéjnaa xále Niná (Heb. 10:38, 39).
3. Ánni nga tosi tonda kao kjoatsjoa si̱xásínilee Jeobá.
3 Tsjoa kʼoé tokoán nga tinixálee Jeobá. Je kjoamakjainná kʼiaa chótʼayakao kʼianga je Gog xi tsʼe Magog kʼoetʼale je naxinandále Jeobá (Ezeq. 38:2, 10-12). Si̱kjaʼaitsjenla joma kʼianga kjoajchán sʼejna, kʼoati kjoañʼai faʼatojin ninga je xi síkinje. Je chjota síchaa tsojmi xi tjínle, alikui tikʼoasʼin bationi kʼoa choa tsojmi xi ma chine sʼe. Jósʼiaan kʼiatsa kʼoakoa̱n nichxin xi nroaján. Je Habacuc tosa kiskoyale nga kjoañʼai kjoaʼatojin, kʼoa kʼoatsakʼé kon nga ñaki kao kjoatsjoa sixále Jeobá (Hab. 3:16-19). Je xi koasenkaoná tsanda ñá nga ska̱ná je kjoañʼai xi kuitjátojiaan nichxin xi nroaján kuiní “kjoatsjoale Jeobá” (Neh. 8:10; Heb. 12:2).
4. Jmé kjoanda xi tjínná ndʼaibi kʼoa kao nichxin xi nroaján.
4 Je Jeobá tosi tonda koakoyale je chjota xi sikatíokon je nichxin nga sijé kuenta (Hab. 2:14). Kʼoa je xi kjoaʼáyanile kʼoati sa̱kóyale xi tʼatsʼe Jeobá. Kʼoénelee yaoná nga kuinókjoañá xi tʼatsʼe Jeobá kao tʼatsʼe xále tojñani nga tiyoaa kʼoa tokʼiani (Sal. 34:1; 71:17).