Kʼoainganʼio ngañálee xíngiaa nga kʼuínyaa ya jñani nkjín én nokjoa

Je chjota ngisa nda basénño kʼianga kui én xi male ʼmiyale tʼatsʼe Chjotaxále Niná. Tochajinle kui kʼoakisʼinni Jeobá nga tosa énle kataʼmiyale tʼatsʼe Chjotaxále Niná je chjota xi nkjín ʼnde jaʼaini xi ya tjío ya Jerusalén nga kisʼejna je sʼuí Pentecostés nga nó 33, ningalani chjota jebi kʼoati majinle je én hebreo kao griego (Hch 2:5, 8). Tjín jtín xi kjaʼaí kjaʼaí én tsoyason xi tikuini territorio. Jmé xi machjén nga sʼin je ndsʼee jebi nga tsín to nichxinle sicha kʼoa nga tsín sisile je chjota.

• 

  Josʼin sʼe̱ndajin (Pr 15:22): Je xi superintendente xi tsʼe servicio sʼin tjío tjínnele kʼoasʼin kʼoendajin josʼin nga ngisa nda sa̱kóyason kʼoa josʼin nga skénndiaale ngatsʼi. Je jtín xi kjaʼaí én tsoyason tochajinle kui xi mele nga tsín tiya kuitjáñá jñani tjío chjota xi kui én nchja̱. Tonga tsa nʼio tse mani je territorio, tochale kui xi koa̱nmele nga kʼuínyasoán ngakjijnda kʼoa nga kʼoakʼuínlee tsa so̱koná je chjota xi kui én nchja̱ xi nda koasenño (od-S p. 93 párr. 37). Kʼoa tsakui nichxin nganʼio sijéle je jtín jñani tiyoaa nga kjoájinkoaan tsa jngo chjota ska̱jiaan xi kui énle nchja̱, ánni nga kʼoetʼaxo̱nni kʼoa skoe̱ni jñani koa̱nsjaile (km 7/12 p. 5, recuadro). Nga jngo niʼya sakʼoaa nkjín én nokjoa. Kʼoa tsakui nichxin nganʼio sijéle ya jtín jñani tiyoaa kʼianga kʼoétʼaxoaan je chjota xi kui én nchja̱ ánni nga je koaikonnile nga koa̱nskanni.

• 

  Kʼoainganʼioá (Ef 4:16): Kʼoasʼiaan jokuitsoná je xi superintendente xi tsʼe servicio sʼin tíjna. Tsa je ʼmiyalee jngo chjota xi kjaʼaí én male ngisajin ngotjo koa̱ntajani kjoamakjainle tsa je kuitsoyale jngo publicador xi kui énle nchja̱.

• 

  Kuiyondaa (Pr 15:28; 16:1): Tsa jngo chjota ska̱jin xi kjaʼaí én nchja̱ ya jña ʼmiyasuin, takoyalai je Énle Niná. Tongini tikjaʼaitsjain jme én xi nokjoa ya jñani ʼmiyasuin, tʼiain descargar je Biblia kʼoa kao video xi kui én tjío. Kʼoati koa̱n si̱chjain je aplicación JW Language nga jchai josʼin si̱tiʼndai je chjota.