Nda chótʼayá nga toñá

ÁNNI NGA NʼIO CHJÍSÍNILE: Nga toñá chotʼayá je Énle Niná basenkaoná nga yaa “jo kji teya, jo kji ndo, jo kji na̱nga̱, jo kji ngʼa” je xi kixi tjín (Ef 3:18). Kʼoati basenkaoná nga tsje mangínkoaa yaoná, nga tsínkui kʼoanʼia jmeni xi chʼaotjín kʼoa nga tsín jao satío tokoán tʼatsʼe je kjoabijnachon xi sʼa nroa (Flp 2:15, 16). Kʼianga chotʼayá je Énle Niná nga toñá, koaan kui chjoéjiaan jmeni xi koasenkaoná. Jósʼiaan nga ngisa nda si̱chjén je nichxinná nga kʼoéxkiaa kʼoa nga chótʼayá je Biblia.

JÓKOA̱N SʼIAAN:

• Kʼoéchoaa je Biblia xi nichjén kʼianga chotʼayá kʼoa kʼoétʼaa jmeni xi koa̱njinná. Kʼoati koa̱n kʼoasʼiaan tsa celular kʼoa tsa tableta nichjén nga chotʼayá.

• Chjónangilee yaoná jebi kʼianga tibʼexkiaa: “ʼYáni”, “jméni”, “jñáni”, “kʼiáni”, “jósʼin” kʼoa “ánni”.

• Kjoásjaiyaa ngayeje. Koaan tsa xki̱ tema kʼoa tsa xki̱ versículo chótʼayajiaan kʼoa si̱chjén ngayeje xi tsjoáná naxinandále Niná nga kjoásjaiyaa.

• Si̱kjaʼaitsjenjiaan jósʼin basenkaoná jmeni xi tibʼexkiaa.

• Si̱chjén jmeni xi majinná kʼianga chotʼayá (Lu 6:47, 48).

KʼIANGA JECHÓTSENLAI JE VIDEO KʼIANGA TOÑÁ CHOTʼAYÁ BASENKAONÁ NGA NGISA TSJOACHA MAA JE ÉNLE NINÁ, CHÓTʼAYAJIN KJOACHJONANGI JEBI:

• Jósʼin síkjaʼaitsjen kʼa ndsʼee tʼatsʼe nga toñá chotʼayá.

• Ánni ndatjínni nga títjon kʼoétsʼoaa kʼianga kjesa chotʼayajián.

• Jméni xi koasenkaoná nga ngisa nda koa̱njinná jmeni xi tso je Biblia.

• Jósʼin koa̱n kʼoéchoaa je Biblia xi nichjén kʼianga chotʼayá.

• Ánni nga nʼio tjínnile kjoandosin nga si̱kjaʼaitsjenjinkaoñá kʼianga chotʼayá je Énle Niná.

• Jósʼin koa̱n si̱chjén jmeni xi majinná kʼianga chotʼayá.