A nda tinichjain je folleto Nyaon nyaon chótʼayajiaan je Biblia

A nyaon nyaon bʼexkiai je folleto Nyaon nyaon chótʼayajiaan je Biblia. Koaan kʼoasʼiain tsa tsín kʼoatinʼiai. Nkjín mani je ndsʼee xi kʼia bʼéxkia kʼianga tanjio kʼoa kui síkjaʼaitsjenjin bʼajnda nichxin (Jos 1:8; Sl 119:97). Jósʼiaan nga ngisa nda si̱chjén. Kʼoéxkiaa jmeni xi tso nga tonginile je versículo xi maxkia kʼoa jmeni xi tso nga maskanni, ánni nga ngisa nda koa̱njinniná jmeni xi tínchja̱ni. Jngo choa̱ si̱kjaʼaitsjenjiaan xi ya Biblia faʼaitʼa xi kui tínchja̱ni jotso je texto xi kamaxkia. Xijekoa̱n, tichjain je kjoafaʼaitsjen xi tsjoá je texto. Kʼianga kʼoasʼin mangínkoaa yaoná jotso je Biblia, basenkaoná kʼoa bʼaiʼndeñá nga je Énle Niná bándiaaná (Sl 119:105).

Jotjín Betel tjío jngo tjíjtsa sonʼnde kʼiaa kotʼayajin je folleto Nyaon nyaon chótʼayajiaan je Biblia nga tanjio. Josʼin kotʼayajin sakʼoaa ya satíotʼa ya jñani KJOAJTÍN XI KJAʼAÍNILE tso ya JW Broadcasting^®. A jekjoatse nga saje kichotsenlai. Basenkaoná jmeni tso. Tobʼelañá, jméni xi bakóyaná jme xi koanle je Lot.

KʼIANGA JECHÓTSENLAI JE VIDEO TSÍNKUI KATAMATSJOACHAA JMENI XI TJÍN I̱ SONʼNDE (1JN 2:15), CHÓTʼAYAJIN KJOACHJONANGI JEBI:

• Jmé kjoafaʼaitsjen xi tsjoá je Biblia yʼangini je texto xi koanxkia kʼianga tanjio.

• Jósʼin bakóyaná je choa̱le Lot nga xkón tíjna tsakui koa̱ntsjoachaa je sonʼnde kʼoa tsakuije̱ jmeni xi tjín sonʼnde (Gé 13:12; 14:12; 19:3, 12, 13, 24-26).

• Jósʼin bakoá nga tsínkui tsjoachaa jmeni xi tjín sonʼnde kʼoa nga tosa je Jeobá tsjoachaa.