Ali jkonjin nga kjoetʼa jme xi chon sonʼnde

Tojeme kjoetʼa jme xi chon sonʼnde nga̱ tsín tongantsjai nga tsejta koa̱n Jeobá. Kʼianga kʼoakoa̱n, kjoeson je religión ndiso, jngojtín naxinandá kʼoetʼale je naxinandále Niná kʼoa je Jeobá sikjeson ngatsʼi chjotatsʼen nga kjoaʼaí Armagedón. Ngatsʼiaa choyalee nga kuicho nichxin nga kʼoakoa̱n.

Tonga tjín jmeni xi tsín ʼyaa jokoa̱n nga koaitsʼia je kjoañʼai xi nʼio tse. Tobʼelañá, alikui ʼyaa kʼiakjoanni koaitsʼia. Kʼoati tsín ʼyaa jméni xosikao je chjotaxá nga kʼoetʼanile je religión. Jósʼin je xi jngojtín naxinandá nga kʼoetʼale naxinandále Niná kʼoa jókji tse kʼoakoa̱n. Kʼoa jósʼin sikjeson Jeobá je chjotatsʼen nga kjoaʼaí Armagedón.

Tsín koa̱n nga kui kuijkónlee jmeni xi koa̱n nichxin xi sʼa nroa, nga̱ je Biblia kʼoatso jmeni xi sʼiaan nga tsín kuinókjoaan. Tobʼelañá, ʼyañá nga nichxin fetʼa tiyoaa (2Ti 3:1). Kʼoati ʼyaa nga koa̱nchoaya nichxin kʼianga ni̱kjeson je religión ndiso ánni nga tsín cha̱ngini je religión xi kixi (Mt 24:22). Kʼoa tsín jao tjín tokoán nga kʼoasjentjai Jeobá je naxinandále (2Pe 2:9). Kʼoati ʼyaa nga je tsakasénnda Jeobá jngo xi kixi kʼoa xi tjínle nganʼio nga sikjeson je chjotatsʼen kʼoa nga kʼoasjentjai je chjotankjín nga kjoaʼaí Armagedón (Ap 19:11, 15, 16).

Kʼianga kʼoakoa̱n, je chjota koa̱nʼindaa nga nʼio tso̱kjon (Lu 21:26). Tonga ñá alikui kʼoakoaan. Tsa kʼoéxkiaa kʼoa si̱kjaʼaitsjenjiaan josʼin tsakʼasjentjai Jeobá naxinandále nichxin kjoatse kʼoa nga kʼoatsoná jmeni xi koa̱n nichxin xi sʼa nroa, kʼoasʼiaan jmeni xi tso Lucas 21:28, nga i̱ tso: “Chótsenngʼao, kʼoa chjómitjaon jko, nga̱ je kjoabitjontjaino nroachrian”.