Jótso chjota tʼatsʼe nga bʼetsʼoaa
“Nga bʼetsʼoa kʼoasʼe tokoan joni tsa i̱ tíjnakaona Niná, nga tsoa ndsa̱ kʼoa nga tsjoána kjoafaʼaitsjen kʼianga tsín ʼbe jmeni xi sʼian” (MARÍA).
“Jekʼien je chjoónna kʼoa 13 nó kichokjoale nga cáncer kisʼele. Nyaon nyaon tsakʼetsʼoale je Niná, tseen koanna nga kinrʼoéna nga̱ nda kisʼe tokoan” (RAÚL).
“Nga ma bʼetsʼoaa jngoo kjoatjao xi tʼatsʼe Niná nroani” (ARNE).
Nʼio chjí be nga bʼétsʼoa je María, Raúl, Arne kao xi kjaʼaísa chjota. Kʼianga bʼétsʼoa kʼoasʼin fákaonajmíni je Niná, tsjoále kjoanda kʼoa síjéle nganʼio. Kʼoatisʼin síkjaʼaitsjen jotso Biblia tʼatsʼe kʼianga bʼetsʼoalee Niná, nga i̱ tso: “Kʼoasʼin nʼiotʼatakoán ndʼai ngixko̱n nga je. Tsa nijé tojmeni kjoa josʼin mele nga je, je nrʼoéná” (1 Juan 5:14).
Tonga kʼoati nʼio nkjín chjota xi tsín makjainle jotso je Biblia tʼatsʼe nga bʼetsʼoaa. Je Steve itso: “Kʼianga 17 nóna, jan miyona kʼien, jngo xi carro kitíkájenkao kʼoa jao xi ya kʼien jinndáchikon”. Je Steve itsosa: “Tsakʼetsʼoale Niná kʼoa kʼoakixinle ánni nga kʼoakoanni, tonga likui kinrʼoéna. Kʼoasʼin kisikjaʼaitsjen nga toxitsjoani nga bʼetsʼoaa”. Nʼio nkjín xi kʼoati satío kon joni Steve, kʼoa kʼoatisʼin síkjaʼaitsjen nga toxitsjoani nga bʼetsʼoaa.
Nkjínsa koya anni nga kʼoasʼin síkjaʼaitsjenni je chjota nga toxitsjoani nga bʼetsʼoaa. Tjínkʼa xi kʼoatso nga je Niná be ngayeje, kʼoa be je kjoa xi bitjatojiaan kʼoa jmeni xi machjénná. Kuinga kʼoasʼin síkjaʼaitsjenni nga tsín timachjénni nga kʼoakʼuínlee Niná jotjín tokoán.
Tjínkʼa xi kʼoasʼin síkjaʼaitsjen nga tsín nrʼoé je Niná kʼianga bʼetsʼoalee xi totʼatsʼe je jée xi tsakijnyaa ngasʼa. Je Jenny itso: “Kʼoaasʼin sikjaʼaitsjen nga tsín jme chjína. Tsín bakinna nga kjuinrʼoéna je Niná, nga̱ tsín ndatjín jmeni xi kisʼian ngasʼa”.
A sakʼoaa kʼoatisʼin nikjaʼaitsjain tsanda ji. Tsa kʼoalani, ndajin sʼe̱ tokuin nga jchai jmeni xi tso Biblia tʼatsʼe nga bʼetsʼoalee Niná. Koaan koa̱nkjainli jmeni xi tso Biblia tʼatsʼe nga bʼetsʼoaa.a Koasenkaoli nga jchai xi tʼatsʼe jebi:
A nrʼoé kjoaixiná Niná kʼianga bʼetsʼoalee
Ánni nga tsín nrʼoé kʼanile chjota kʼianga bʼétsʼoale
Jósʼin kʼoétsʼoalee kʼianga kjuinrʼoéná
Jósʼin koasenkaoná kʼianga kʼoétsʼoalee Niná
a Faʼaitʼa ya Biblia josʼin tsakʼétsʼoa je choʼndale Niná. Kʼoati faʼaitʼa josʼin tsakʼétsʼoa je Jesús. Xi toya Escrituras Hebreas, xi kʼoati Antiguo Testamento ʼmile, tsʼato 150 kʼa faʼaitʼa josʼin tsakʼétsʼoa je choʼndale Niná.