Xi nʼio koanmele tsakatse je Hulda

TSA yalani kʼin nichxin kjoan nkjín nóján ya ʼnde xi tíjnajin ndáchikon jña Sangir Besar ʼmi ya Indonesia, tsaʼyaxkonjin je tichjaa xi ya ndaindáchikon bichó. Nga jan tichjaa jebi kʼoasʼin ʼyale nga Énle Niná tsoyason, tonga nga fi ya ndaindáchikon alikui kui xá fini.

Kui xá bichóni ya ndaindáchikon nga la̱jao̱ bʼasjengindá. La̱jao̱ jebi jo pelota kjoan yʼai kʼoa yaa fisíkatío jñani jekixí chon. Xijema, yáxile batione nga bakján la̱jao̱ saʼnda nga ngisa xkoa̱ makjoan tikʼoajinni jngo chjao. Je la̱jao̱ xi bakján cubeta binyá kʼoa escalón fimiya nga fikao ndʼiale. Kʼoa xijema, naxá binyá. Nga jemankjín grabale, kʼiaa bichókʼá camión kʼoa yaa fikao jñani carretera sʼenda.

Je tichjaa xi Hulda ʼmi ngisaa tse síxá ya ndainandá nga la̱jao̱ bakján, kʼoa je tao̱n xi njele kui batseni je tsojmi xi machjénle ngatsʼi ya yaniʼya. Tonga kʼoati kui xi koanmele nga jngo tableta koatse ánni nga koa̱n sichjénni JW Library^®. Je tichjaa Hulda koanjinle nga ngisa nda kuitsoyason tsakui aplicación jebi sichjén kʼoa nga ngisa nda skótʼaya.

Jngo sá basen nga jao jao hora tsakakján graba tichjaa Hulda kʼianga tanjio. Jngo camioneta koanni je la̱jao̱ xi tsakakján, kʼoa kui tsakatseni tableta je tao̱n xi kinjele.

Je Hulda itso: “Ningalani nʼio kijtana kʼoa aonya koanna nga la̱jao̱ tsakakjan, tonga kʼianga jekinjena tableta, ñaki kichajinna ninga kʼoasikji tse kjoama̱ kisʼengina nga̱ kui xi koasenkaona nga ngisa nda xínyasoan kʼoa nga ngisa nda koatejnandale je kjoajtín xi satíoná”. Kʼoati tso tichjaa nga kui tabletale kisichjén nga kitsoyason kʼoa nga tsakʼejna kjoajtín kʼianga koan chʼin COVID. Tsjoa sʼe tokoán nga kinjele tichjaa je tabletale.