Chjónangiaa tsa ʼyasa xi mele skótʼaya Biblia

Je Mary kao Johna yaa tjío ʼnde jñani nkjín chjota xi Filipinas tsʼe bichósíxá. Kʼianga koan chʼin COVID-19 nkjín chjota kitsoyale Énle Niná je Mary. Kataʼyala jókoanni nga kitsaojin chjota jebi.

Je Mary i kitsole je chjota xi kitsjoale estudio: “A tsí ʼyaxkon kʼai xi mele skótʼaya Biblia”. Kʼianga kʼoakitso je chjota nga bexkon kʼa, je tichjaa kʼoakitso nga katabakóle jñáni tjío je chjota xi mele skótʼaya. Nga kʼoasʼin básjai chjota je tichjaa nda bichómani. Je chjota xi sasénle Énle Niná kʼoati kui xi mele nga katabe je xínkjín kao miyole xi tʼatsʼe Niná. Kataʼyala josʼin kichomani nga tsakásjai Mary je chjota xi mele skótʼaya Biblia.

Je chjoón xi tíbakóyale Mary xi Jasmin ʼmi kʼoakitso nga ño mani chjota xi bexkon xi mele skótʼaya Biblia. Je xi Kristine ʼmi nʼio kisasenle jmeni xi tsakʼinyale kʼoa jao kʼa kiskotʼaya nga jngo xomana. Kʼianga kʼoakitsole Mary tsa ʼyasa xi bexkon xi mele skótʼaya Énle Niná, je Kristine i kitso: “Kʼiala kʼoaxínle je yánchjín miyona”. Tochoatse jaʼato kʼoa ño yánchjín miyole Kristine xi kʼoati kiskotʼaya. Kʼoa nga koanskanni nkjínsa chjota xi kʼoakitsole Kristine tsa mele skótʼaya Biblia, kʼoa chjota jebi kʼoati koanmele nga kataʼmiyale je xínkjín kao miyole.

Xijekoan, je Kristine kʼoati koanmele nga kataʼmiyale Biblia xínkjín xi ya Filipinas tjío. Kʼiaa kinchja̱le je tsotile xi Andrea ʼmi tonga je tsotile i kitso: “Tokjaʼaíná sʼín je testigole Jeobá, alikui makjainle tʼatsʼe Jesús kʼoa to Antiguo Testamento síchjén”. Tonga kʼianga tsakʼinyale Énle Niná Andrea kʼiaani tsabe nga tsín kʼoatjín josʼin síkjaʼaitsjen tsakai, i kitso: “Ñaki kʼoajintjín xi tiʼmiyanáo nga̱ yaa Biblia nroatʼa”.

Nga koanskanni, jao yánchjín miyole Andrea kʼoa jngo xi ñatjen síxá kiskotʼaya Biblia kʼoa kʼoati je Mary kitsoyale. Kʼoa je nyokjoanle Andrea xi tsín matsenle xi Angela ʼmi ntsjaintsjai nga tokjin kinrʼoéni kʼianga tsakʼaile estudio je Andrea. Nga koanskanni, je Angela kʼoakitsole Andrea tsa koa̱n kʼoati kʼuínyale Énle Niná tsanda je. Nʼio kisasenle Angela jme xi tsakʼinyale kʼoa kʼoakitso tsa koa̱n nga ño kʼa kʼuínyale nga jngo xomana. Tikje jngosájinni nga tíbʼaile estudio kʼoa jenkjín textole Biblia tsakʼéjinkon. Kʼoa jé Andrea tsakasenkao nga videoconferencia kisichjén nga kinrʼoéle je kjoajtín xi satíoná.

Kʼianga kotʼaya je Kristine tokjin nrʼoéni je xʼinle. Kʼoa je Mary chan kʼoakitsole tsa mele skótʼaya Biblia. Je Joshua i kitso: “Ndala tsa tokjuinrʼoelano, tonga tsa jme xi chjónangináo tosala tsínti koasenñonino”. Tikje aon minuto faʼatojinni nga tínrʼoé Joshua nga nkjín koya tjínni xi kiskonangi, ngisaa nkjín koya jme xi kiskonangi tikʼoajinni je chjoónle. Kʼoakitso nga mele skótʼaya Biblia.

Ndasʼin kichomani kʼianga kʼoasʼin kiskonangile Mary je xi bakóyale Biblia tsa ʼyasani xi bexkon xi mele skótʼaya. Nkjín chjota kiskotʼaya. Je Mary nkjín ndsʼee kʼoakitsole nga katatsjoále estudio je chjota xi tjíokotʼaya. Kanjin koanni chjota xi kitsoyale Biblia je Mary xi ño naxinandá tjínni.

Je Jasmin, xi títjon tsakʼinyale Biblia kʼiaa kisʼenngindá nga sá abril nó 2021. Kʼoa je Kristine kʼiaa kisʼenngindá nga sá mayo nó 2022, kʼoa ndʼaibi yaa tjío ijngokʼa ya Filipinas. Je xʼinle Kristine kao tsotile tojo tjíokotʼaya Biblia kʼoa jao miyole Kristine xi kʼoati kisʼenngindá. Nga koanskanni kʼoati kisʼenngindá je Angela kʼoa precursora regular sʼin tísíxá ndʼaibi.

Kʼianga siglo 1 kʼoati koan, nkjín mani xi tijeni miyole kao xínkjín kitsoyale Énle Niná (Juan 1:​41, 42a; Hechos 10:​24, 27, 48; 16:​25-33). Chjónangilee je xi tiʼmiyalee Biblia kʼoa tsa jeje̱ chjota xi mandosinle Énle Niná tsa bexkon kʼa xi mele skótʼaya je Biblia. Tsa kʼoasʼiaan nkjín chjota kʼuínyalee Énle Niná.