A ʼyaní

Jñá tsakʼéjten naʼmi je njínle cho̱ xi kitsjoatʼa ya yo̱ngo̱ xi kisʼejna Jerusalén

YA NAXINANDÁ Israel nkjín cho̱ kisikʼien je naʼmi nga xki̱ nó xi ya kitsjoatʼa ya yo̱ngo̱ xi kisʼejna Jerusalén. Je chjota judío xi Josefo tsakʼin xi tsakʼejna nga siglo 1 kʼoakitso nga tsʼato 250,000 cho̱ kinikʼien kʼianga kisʼejna je sʼuí Paxko (Lev. 1:​10, 11; Núm. 28:​16, 19). Nga kʼoasikji cho̱ kinikʼien, jñáni kisʼejten je njínle.

Je chjota xi kui básjaiya tsakaʼngindai jña kisʼejna je yo̱ngo̱ xi tsakʼénda Herodes xi kʼia kinikixoya nga nó 70, kʼoa kui koansjai nga tixʼa̱ngi jñani jaʼa nandá. Nga kʼoakisichon je chjota judío yajin kixijtenya je njínle cho̱ xi kinikʼien kʼoa yajin jaʼangi ndánjín ya ndai jña kisʼejna je yo̱ngo̱.

Jaola koya kataʼyaa josʼin koankuinda je sonxta nga tsje koanchon.

• Tixʼa̱ngi jñani kisʼejna je sonxta. Je xo̱njchá xi misná ʼmi xi kʼia kichji nga siglo 3, kʼoatso nga jao kʼa tixʼa̱ngi jngongoa xi̱ngi̱le jña kisʼejna je sonxta. Je njín xi kixijten kʼianga kinikʼien je cho̱ yajin kikao je nandá nga kisanejon je sonxta kʼoa ndánjín jebi yaa kichokajin je xo̱ngá xi Cedron tsakʼin.

  Nga kʼoatso je xo̱njchá xi Misná ʼmi nga tixʼa̱ngi ya jngongoa xi̱ngi̱le jñani kisʼejna je sonxta mangóson kao jmeni xi kjimasjaile je chjota xi kui básjaiya ndʼaibi. Jngo xo̱n xi tʼatsʼe chjota judío nchja̱ni kʼoatso nga je chjota xi kui básjaiya ndʼaibi, kjimasjaile nga tixʼa̱ngi jñani jaʼa nandá ya chrian jña kisʼejna yo̱ngo̱. Yajin kiya je njínle cho̱ xi kinikʼien kao nandá xi koanchjén ya yo̱ngo̱.

• Kisʼe nandá. Je naʼmi nʼio tse nandá kisichjén nga tsakanéjon je sonxta kʼoa xi tsakʼéjtenya jñani kiya ndájndí. Je nandá xi kisichjén yaa kiskoéni ya naxinandá Jerusalén nga̱ kisʼee na̱ndá kʼoa kisʼeyo xjáonandá. Je chjota judío tsakándiaale josʼin jaʼa nandá kuinga kisʼeni nandá ya yo̱ngo̱. Je chjota xi Joseph Patrich ʼmi kʼoatso nga toya yo̱ngo̱ xi kisʼejna Jerusalén jñani kisʼe nandá kʼoa kisʼe josʼin kiya ndájndí, tsín kʼoakoanchon jña xinsa yo̱ngo̱.