Xi kuinyakao je yánchjín xi totaon ʼya

Kui én jebi faʼaitʼa ya jw.org ya jñani tso: “Nga totaon ʼya je xi yánchjín: Jótso je Biblia”. Kʼianga chótʼai página jebi ya tisennelai jñani “Chʼa̱sjai página jebi” tso, xijekoa̱n chʼa̱sjai kʼoa tjakjoai. Jngo tichjaa xi Estados Unidos tsʼe, xi Stacy ʼmi, itso: “Kichʼasje kʼaijin xo̱n jebi kʼoa yaa tsangínkoaijin kao tichjaa xi tjenkoa ya ʼnde jñani tjío je yánchjín xi totaon ʼya, xi tiyani jñani ʼmiyasuinjin”.

Je chjoón xi ya síxá ʼnde jebi nkjínsa xo̱n kisijénajin kʼoa kʼoakitsonajin nga je tsjoále je yánchjín xi ya tjío. Ñachan xo̱n tsakjayolaijin kʼoa 30 tarjeta de contacto xi tsʼe jw.org tsakʼailaijin. Kʼoa je chjoón xi kjinentsja ʼnde jebi kʼoakitsonajin nga mele skoe̱ je yánchjín xi ya tjío josʼin ʼmiyaa Biblia.

Jao tichjaa kikao je Stacy nga ki ijngo ʼnde jñani tjío je yánchjín xi totaon ʼya, kʼoati aon xo̱n tsakáyo kʼoa kinijésale. Je chjoón xi ya síxá i kitso: “Nʼiojin nda koa̱nchjénnajin xo̱n jebi, ndajin kuinyakao je yánchjín xi i̱ tjío”. Kʼianga tikichongáni je tichjaa, tjínkʼa yánchjín xi kʼoakitso nga mele skoe̱ jósʼin ʼmiyaa je Biblia kʼoa jao yánchjín jebi xi koanmele ki kjoajtín nga tífe xomana.

Je tichjaa Stacy itso: “Tokʼoakoannajin nga nkjín chjota tsakʼéxkia je xo̱n xi tsakjayolaijin xi faʼaitʼa ya página xi tíjnaná ya internet xi ʼmi: Nga totaon ʼya je xi yánchjín: Jótso je Biblia”. Kʼianga chʼasjee xo̱n jebi nʼio ndasʼin bichómani nga kui nichjén nga ʼmiyalee Énle Niná chjota. Tsjoa kisatio tokuinjin nga koanndosinle je yánchjín xi tsakʼailaijin xo̱n jebi kʼoa tsaʼyaníjin josʼin kisichikontʼainnajin Jeobá nga tsakasjailaijin josʼin tsakʼinyalaijin Énle Niná je yánchjín xi totaon ʼya.