A faʼaitsjenli
A koaanli kʼoasí jme xi kjonangi i̱bi xi ya yʼangini je Xo̱n xi Bájinkonná xi tsʼe nó 2025.
Ánni nga chʼasjengʼañá Jeobá.
Chʼasjengʼañá je Jeobá nga̱ ʼyaxkónñá kʼoa tsjoachañá. Kʼoati kuinga chʼasjengʼañá nga̱ kui xi mená nga katabe chjota xi tʼatsʼe (w25.01, página 3).
Jmé xi koasenkaoná nga si̱chatʼalee kʼianga ʼya xi jotsoná kʼoa tsa josíkaoná.
Kuenta sʼiaan josʼe tokoán. Kʼianga nichatʼalee xíngiaa alikui tibʼengijtiñá tokoán kʼoa tsínti kui bʼejinkonñá jmeni xi matʼeen (w25.02, página 15, 16).
Jósʼin kuinyakao je ndsʼee xi sʼa xti je choa̱le Marcos.
Je Marcos tosi tonda tsakasenkao xi kjaʼaí ninga sakʼoa tsín nda kisʼe kon jmeni xi koantʼain. Xi tsakasenkao Marcos nga nda kisixále Niná kuinga je kisimiyo Pablo kao chjotale Cristo xi nda tjíosíxále Niná (w25.04, página 27).
Jmé xi kinchja̱ni Jesús nga i̱ kitsole Jeobá kʼianga tsakʼétsʼoale: “Tsakakosontsenle jo kjoain nga ji” (Juan 17:26).
Je chjotatjenngile Jesús jebe joʼmi je Niná. Nga kʼoakitso Jesús kui kinchja̱ni jokjoan je Jeobá, tʼatsʼe jme xi tjínndajinle kʼoa jmeni xi sʼín (w25.05, página 20, 21).
Kuenta sʼiaan nga tsín toñá ʼyayejee.
Kʼiatsa nangitokon maa kuenta sʼiaan nga tsín toñá ʼyayejee. Tobʼelañá, alikui ʼyaa kʼiáni kjoetʼa jme xi chon sonʼnde kʼoa jósʼin koasenkaoná Jeobá. Kʼoati tsín ʼyaa jmeni xi koa̱n nyaonli jngili. Kʼoa kʼoati tsín majinná jokji nda bexkonná je Jeobá nga jngó jngoá (w25.06, página 15-18).
Jméni xi sʼiaan nga koasenkaoná je kjoanokjoaya xi faʼa nga tífe xomana.
Koaan tikjaʼaitsjenjin jebi: “Jósʼin kuinyakao chjota jmeni xi tso nga koa̱nkjainle Énle Niná”. “A tsoya jngo choa̱ xi koa̱n sichjén nga xínyale xi kjaʼaí jotso Biblia”. “ʼYáni xi ngisa koa̱nndosinle jmeni xi tso” (w25.07, página 19).
Jméni xi bakóyaná josʼin síchatʼa Jeobá tojo kisikao David.
Nga kʼoakoannile jéele David kisichatʼale Jeobá (1 Rey. 9:4, 5). Kʼianga síchatʼaná je Jeobá alikui tikui síkjaʼaitsjenni kʼoa alikui tikʼoatso ngindianiná jmeni xi kinʼia (w25.08, página 17).
Jósʼiaan kʼiatsa tsín ndi̱to̱n majinle xi tiʼmiyalee Biblia kʼoa tsa ñʼai male síkatío jmeni xi sʼín.
Kʼiatsa ya Biblia chʼangiñá jmeni xi ʼmiyalee kʼoa tsa tsín ndi̱to̱n majinle jmeni xi tichotʼayá, tosala tochótʼayasaa kʼoa skan kʼuínyandalee. Kʼoasʼin kʼoéndajiaan nga skan chótʼayajiaan jmeni xi ñʼai kjimale (w25.09, página 24).
Jmé xi tínchja̱ni je Biblia nga kʼoatso nga bʼanachaná je jée xi kichʼá (Heb. 3:13).
Kʼiaa bʼanachaná je jée xi kichʼá nga kui kʼoanʼia xi chʼaotjín kʼoa nga to jao sʼe ʼndeʼnde tokoán tsa tsjoake kjoaixiná je Jeobá (w25.10, página 16).
Jósʼiaan nga ñaki ni̱ma̱ná katanroajinni nga kʼoétsʼoaa.
Xi títjon, si̱kjaʼaitsjenjiaan jokjoan je Jeobá. Xi majaoni, tongini si̱kjaʼaitsjenjiaan jmé kjoa xi tibitjatojiaan kʼoa kʼoéyanajmílee je Jeobá, tobʼelañá tsa kje nichatʼajinlee tsa ʼyani. Kʼoa xi majanni, koaan kʼoétsʼoaa tojo kji tse mená, tsa kʼoasʼiaan ngisajin nkjín koya jmeni xi koa̱n kʼuínlee Jeobá (w25.10, página 19, 20).
Jósʼin kuinyakoaa xi jekoanjchínga.
Kjuinnixatʼaa kʼoa kjitʼa kuinókjoalee teléfono. Kjuinkoaa nga fi tsʼe chjinexki kʼoa koaan ñatjen kʼuínyasoán (w25.11, página 6, 7).
Jméni xi sʼin xi kuixan nga je Jeobá skoe̱xkón.
Tjínnele sitjoson jotso kjoatéxoma, nga kui kʼoasʼin jmeni xi sasénle Niná, nga tsín síxkón kjoan najño xi kʼoakjá kʼoa nga skósonnile jokjoáyo. Tsín koa̱n kui kʼoasʼin jmeni xi tsín ya Biblia faʼaitʼa kʼoa nga ngasin nganda kjaoyani josʼin kʼoendajin jmeni xi sʼin nga kuixan (w25.12, página 21-24).