Isʼin faʼaitʼa

A jetsakʼailee énná je Jeobá. A tinitjosonñá je énná. Nga tsakʼaitʼalee yaoná je Jeobá kʼoa tsakuije̱ nga chixán, a tinitjosonñá jméni xi tsakixoán. I̱ kjoaʼmiya jebi kui jchaa je choa̱le Jefté kao Ana, nga kisitjoson jmeni xi kitso. Koasenkaoná nga kʼoati si̱tjosoán tsanda ñá je énná.

Kjitʼaa nga kui nikjaʼaitsjeen jmeni xi tsjoáná je Jeobá ya ʼNdenaxó. Tonga i̱ kjoaʼmiya jebi kui jchaa jméni xi títjonkjoanla kjoaʼaxin Niná nga kjesa ʼndenaxó majin i̱ Sonʼnde. Nga kui chótʼayajiaan sitaja je kjoamakjainná kʼoa koasenkaoná nga ska̱ná je kjoa xi kuitjátojiaan.

Tsa kʼoasʼin nikjaʼaitsjeen nga tsín kixi tíjna jmeni xi kjimatʼeen, kui chotʼayakao je kjoamakjainná, tsa nangitokon maa kʼoa tsa kixi maa. Nga jao kjoaʼmiya jebi jan choa̱ xi ya Biblia faʼaitʼa kuitsoyaná xi koasenkaoná nga kʼoatisʼin jchaa je kjoatéxomakixi josʼin be je Jeobá.

Ninga tsín jme xi machjénle Jeobá xi tʼatsaan, tsjoa sʼe kon kʼianga bʼainganʼiolee. Ya kapítulo 4 kao 5 xi tsʼe Jueces kui bakóyaná nga nʼio chjí be je Jeobá nga nixálee kʼoa nga nitjosoán josʼin bándiaaná.