A kʼoasʼin makjainle je testigole Jeobá nga to jaon nichxin xi kanño ora tjínle koanndani je Sonʼnde

Alikui kʼoasʼin makjainnajin. Ningalani jin xi testigole Jeobá maijin ñaki makjainnajin nga je Niná kisinda ngayeje tsojmi xi tjín, tonga alikui kʼoasʼin makjainnajin tsa to jaon nichxin koanndani je Sonʼnde. Ánni. Kuinga jmeni xi tso kʼa je chjota xi kʼoasʼin makjainle kjántʼa kao jmeni xi bakóya je Biblia. Kataʼyala kʼaa.

1. Jokji tse tínchja̱ni xi jaon nichxin. Tjínkʼa je chjota xi kʼoasʼin makjainle, kʼoatso nga kanño ora tínchja̱ni nga jngó jngó xi jaon nichxin. Tonga ya Biblia, je én xi nichxin tso, sakʼoaa nʼio tse tínchja̱ni (Génesis 2:4; Salmo 90:4).

2. Jokji tse jetíjna je Sonʼnde. Ijngosa koya josʼin makjain kʼale je chjota xi kʼoatso nga to jaon nichxin koanndani je Sonʼnde kuinga kʼoatso nga tosʼa jngo jao jmi nó tíjna Sonʼnde. Tonga, je Biblia kʼoatso kʼianga kjesa jme xi mandajin xi jaon nichxin tokʼoa jetíjna je Sonʼnde kao ngʼajmi (Génesis 1:1). Kʼoa kuinga jin xi testigole Jeobá maijin alikui chʼasjengijin nga kʼoatso je chjota científico nga je Sonʼnde jejmi miyón nó tíjna.

Alikui kontra tiyolaijin xi tʼatsʼe ciencia, ningalani kʼoasʼin makjainnajin nga koannda ngayeje xi tjín. Ñaki kʼoatjío tokuinjin nga je xi bakóya je Biblia mangósonkao josʼin tjíokotʼayason je chjota científico.