Niná tsakasenkao je Ezequías

AʼYANÍ ánni nga Jeobá tíbʼétsʼoasínile chjota xokji. Ánni nga ya tjíotsʼotjensínile je xo̱n xokjoan ya jña sakásonle cho̱ Jeobá. Je chjota xokji jéní Ezequías. Je xi rey tsakʼejnale nga jao ntje̱le Israel. Kʼoa tse kjoa tíjnajin. Ánni.

Kuinga je chjota kjoajchán Asiria je kisikjeson xi te ntje̱le Israel. Je Jeobá kitsjoaʼnde kʼianga kʼoakoan nga tsʼen koan chjota xokjoan. Kʼoa xijekoan, je chjota kjoajchán Asiria sa je kinrʼoengá xi ngijao ntje̱le Israel.

Je reyle Asiria xo̱n kisikasénle Ezequías. Kʼoa kui xo̱n xosíkjoan tjíobasenle i̱ ngixko̱n Niná je rey Ezequías. Je én xi tjítʼa xo̱n xokjoan jé Jeobá besin, kʼoati tsole Ezequías nga likui jokatasʼín. Kuinga tsakʼétsʼoasíni Ezequías, kitso: “Jeobá, chʼasjentjainaijin xi tʼatsʼe reyle Asiria. Kʼoa skoe ngatsʼi naxinandá nga toji xi Niná tijnai”. A kinrʼoéle Jeobá.

Je rey Ezequías nda tsakatéxoma. A litsa kʼoajin koankjoan jokoankjoan rey xi tsakatéxomale xi te ntje̱le Israel, nikʼoajinla kisʼin jochʼao kisʼin rey Acaz je nʼaile. Nda kisitjoson ngayeje kjoatéxomale Jeobá. Kʼianga je jetʼale kjoabʼetsʼoale, je Isaías xi kinchjaya tʼatsʼe Niná jngo énle Jeobá kisikasénle, kitsole: “Je reyle Asiria likui kjoaʼasʼen i̱ Jerusalén. Nijngojinla chjota kjoajchánle sichrian. Nijngojinla flecha koasen i̱ naxinandá”.

Chótsenlalai sén xi faʼaitʼa ibi. A ʼyaní ʼyáni chjota kjoajchán xosíchon kjiokʼien. Jé chjota kjoajchán Asiria. Je Jeobá jngo ánkjele kisikasén, kʼoa jngo siento kao ñokan kaoni aon jmi chjota kjoajchán Asiria kisikʼien nga tojngo nitjen. Kuinga kitokasíni reyle Asiria.

Je xi jao ntje̱le Israel kitjontjai, kʼoa nyʼán tsakatio choatse. Tonga kʼianga je kʼien Ezequías, xi rey koan je Manasés, tile. Je Manasés kʼoa kao tile xi Amón tsakʼin tsʼen koan kʼoa likui nda tsakatéxoma. Kuinga chʼao koanchonsíni ya naxinandá kʼoa kjoatsʼen kisʼesíni. Kʼianga je kinikʼien rey Amón nga tije choʼndale kisikʼienni, jé tile xi Josías tsakʼin xi rey tsakʼejnale nga jao ntje̱le Israel.