Mardoqueo kao Ester

KUILA kataʼya jméni xi koan tongini jngo jao nó nga kjesa fijin ya Jerusalén je Esdras. Je chjota israelita xi ngisasa ngʼa tsakatio jñani tsakatéxoma reyle Persia je Mardoqueo kao Ester. Ester reina koan kʼoa je Mardoqueo xi primole koanni koanjaonile je rey. Kataʼyala jókoannile jebi.

Je xijchále Ester kʼia kʼien nga sʼa ʼndí kji, kuinga Mardoqueo kisijchásíni. Je Asuero, reyle Persia, jngo ndʼia kisʼejnale ya Susa, kʼoa jngo xi choʼndale koanni je Mardoqueo. Ñandia kʼianga je Vasti, je chjoónle rey, likui kisitjosonle, je rey kjaʼai chjoón kiskoejin xi reina koan kʼoa chjoónle koanni. A ʼyaní ʼyani xi kiskoejin. Jaon, je Ester, jngo chjoón xi naskánakisʼe.

A tiʼyaní je chjota ngʼakon xosíkji tjíomjéjenle jko̱ chjota. Je Hamán, jngo chjota xi xángʼa kisʼele ya Persia. Kui xi mele kʼianga je Mardoqueo, je xi yásí tíjnane nga kʼoati katamjéjenle jko̱. Tonga je Mardoqueo likui kʼoakisʼin. Likui kisasenle nga jngo chjota xi nʼio tsʼen kʼaonjenle jko̱. Koanjtile Hamán. Kʼoa a ʼyaní jmeni xi kisʼin.

Je Hamán énndiso kichokaole je rey xi tʼatsʼe chjota israelita, kitsole: “Nʼio tsʼen chjota israelita kʼoa likui sítjoson kjoatéxomali. Tjínnele sikʼien”. Je Asuero likui be tsa chjoón israelitani xi tíjnakao. Kisitjosonle Hamán, kʼoa jngo kjoatéxoma tsakʼasje jñani kʼoatso jme nichxinni sikʼien ngatsʼi chjota israelita.

Kʼianga kisʼejinle Mardoqueo xi tʼatsʼe kjoatéxoma jebi, nʼio koankjaojinle. Kisikasén énle Ester, kitsole: “Tinókjoakoai je rey, kʼoa kʼoatʼinlai nga katabʼasjentjainá”. Likui kitsjoaʼnde je kjoatéxomale Persia nga jngo chjota kuichonrʼoe je rey tsa tsín xá kanokjoanile. Tonga ki Ester ninga tsín xá kinokjoanile. Je rey tsakjénle Ester je yánise taonsiné xi yʼa, xi tsoyanile nga tsín katanikʼien. Je Ester kʼoakitsole je rey nga katafikjenkao kʼoa nga kʼoati katafi Hamán. Kʼoa je rey ya kʼoakitsole Ester jméni xi mele. Je Ester kʼoakitso nga kʼia kʼoeyanajmíle tsa koaikjenkao ijngokʼangáni kao Hamán nga koa̱nnyaonni.

Kʼianga tjíokjen, je Ester kitsole je rey: “Sikʼien je chjota naxinandána kʼoa kao an”. Je rey koanjtile kʼoa kitso: “ʼYáni xosʼin”.

Kitso Ester: “¡Je chjota xi jtikenajin, je Hamán je chjota tsʼen xokji!”

Kʼoa kʼia nga ñaki koanjtile je rey. Kʼoasʼin tsakʼéne nga katanikʼien je Hamán. Xijekoan, je rey koanjao kisikʼéjna Mardoqueo ya jña tíbatéxoma. Mardoqueo tsakʼéne nga ijngo kjoatéxoma chjotse katasʼenda nga koa̱n sitoanntjai yaole je chjota israelita nichxin nga sikʼien ngatsʼi tsakai. Nga jngo xángʼa kisʼele Mardoqueo, nʼio nkjín chjota tsakinyakao je chjota israelita, kʼoa kitjontjaile yaole xi tʼatsʼe chjota kontrale.