Ya Jerusalén kiskoya

CHJOTA tjenngile Jesús xosíkjoan. Kisitjosonle Jesús kʼoa ya Jerusalén tsakatio. Kʼoa nga tjíokoya ngatsʼi, janeya ngakjijngo ndʼia jña tjíoʼya. Joma tsa jngo ntjao̱nʼio xi sasa faʼani. Kʼoa xijekoan, jo nije̱nlʼí kjoan xi kisatioson jko̱ nga jngó jngó. A tiʼyaní je lʼí xi tjíosonsí jko̱ nga jngó jngó. Jmé xi tsoyanile jebi.

¡Jngo kjoaxkón xi Niná tsakʼéjna! Nga kui nichxin je Jesús je ya tíjnakao ijngokʼani Nʼaile ya ngʼajmi, kʼoa kui nganʼiotsjele Niná kitsjoale je chjota tjenngile. Kʼoa a ʼyaní jókisʼin nga je tsakʼaile je nganʼiotsje. Kjaʼai én kinchja ngatsʼi.

Kʼianga jo ntjao̱nʼio koan xi janeya, nʼio nkjín chjota Jerusalén kinrʼoéle, kʼoa kichokotsen jmeni xi kjima. Tjínkʼa chjota xi xín naxinandá kichoni nga tsakʼéjna sʼuí Pentecostés je chjota israelita. ¡To koanxkónle je chjota xokjoan! Nga je chjota tjenngile Jesús kui én xi male tsakjákaoni xi tʼatsʼe jmeni xi tísʼín Niná.

Je chjota xokjoan kitso: “Ngatsʼi chjota xokjoan Galilea tsʼe. Kʼoa jómani nga kui én tjíonchjasíni én xi nokjoa ya naxinandá jñani kinroañá”.

Pedro tsakasenndo nga tsakakóyale. Nʼio kinchja kʼoa tsakʼéyanajmíle jósʼin kinikʼien Jesús kʼoa nga Jeobá kisikjaʼáyanile, kitsole: “Kʼoa ndʼaibi je ya tíjna Jesús ntsja ngakixile Niná, kʼoa jé tísíkasén je nganʼiotsje xi kitso. Kʼoa kui nga kʼoakjimasíni kjoaxkón jebi”.

Kʼianga je kʼoakitso Pedro, nʼio nkjín chjota xi aon koannile jmeni xi koantʼain Jesús, kitso: “Jméni xi sʼiainjin”. Pedro kitsole: “Tikʼantjaiyao yaono kʼoa chanisʼenngindáo yaono”. Nga kui nichxin janla jmi koanni xi kiskanisʼenngindá yaole kʼoa chjota tjenngile Jesús koan.