Nga tjíofi ndia Damasco

AʼYANÍ ʼyáni xi yasí kijnatʼa nangi. Jé Saulo. Je xi kisikuindaná ñajñole chjota xi lajaoná kisikʼienni Esteban. ¡Chótsenlalai je lʼí xi kjimafatesí! Jméni xi kjima.

Kʼianga je kʼien Esteban, je Saulo kikásjai je chjota tjenngile Jesús nga sikjeson. Kisʼen ndʼiale, tsakʼaonsje kʼoa ndoyá kiskaní. Nʼio nkjín chjota tjenngile Jesús xi xín naxinandá tsakanga kʼoa ya tsakakóyason je «énnda chjotse». Tonga je Saulo kikásjai je chjota tjenngile Jesús ninga xín naxinandá. Ya ki Damasco. Tonga ya yandia, tokʼoamaná jmeni xi koan:

Toxijña, jngo lʼí xi ya kinroani ngʼajmi koanfatendaile je Saulo. Saulo kiskatʼa nangi, josísʼin matsen ibi. Jngo jta̱ xi kitsole: “¡Saulo, Saulo! Ánni nga totaon ʼyasíninai”. Je chjota xi ya tjíokao Saulo tsabe je lʼí kʼoa kinrʼoéle je jta̱ xi kinchja, tonga likui koanjinle jmeni xi kitso.

Kitso Saulo: “ʼYáni ji, ji Nai”.

Kitso xi kinchja: “Anña Jesús, je xi totaon tiʼyai”. Kui kʼoakitsoni Jesús kʼianga totaon tsabe Saulo je chjota tjenngile, joxi jé xokjimatʼain koanle.

Saulo kitso: “Jméni xi sʼian, ji Nai”.

Jesús kitsole: “Tisótjain kʼoa titjásʼain ya Damasco. Kʼoa ya kʼoakʼuinli jmeni xi sʼiain”. Kʼianga tsakasótjen je Saulo kʼoa kiskoʼaingi xko̱n, likui koantsenle. ¡Koanxka̱ní! Kuinga, kiskoésíni ntsja je chjota xi ya tjíokao nga kikao ya Damasco.

Je Jesús jngo chjota tjenngile tsakjákao xi ya tíjna Damasco, kitsole: “Tisótjain, Ananías. Tʼin ya ndia jña Kixi ʼmi. Kʼoa ya ndʼiale Judas chjónangi jngo chjota xi Saulo ʼmi. Ñaki xá tikjoejinña nga choʼndana koa̱n”.

Kisitjoson Ananías. Kʼianga tsabe je Saulo, tsakájnasonle ntsja kʼoa kitsole: “Je Nainá kasíkasénna nga koa̱ntsen ijngokʼanili kʼoa nga tse nganʼiotsje katasʼeli”. Toxijña jo chxjoatsje kjoan xi kitjongi xko̱n Saulo, kʼoa koantsen ijngokʼanile.

Je Saulo nʼio koanchjén nga nʼio nkjín naxinandáyʼai kitsoyale chjota. Pastro Pablo sʼin tsaʼyale nga je koanni, kʼoa tsesa jme xi jchaa xi tʼatsʼe Pablo. Tonga kuila títjon kataʼya jmeni xi kitsole Niná nga katasʼín je Pedro.